《主編e5話》

| | | 轉寄

台語文jú來jú甘甜

(2008年教育部推廣母語傑出貢獻獎 得獎感言)

感謝教育部對我所做台語文運動ê肯定,得tio̍h「母語推廣表揚」ê獎,除了歡喜以外,我也感覺tio̍h今後對台語文運動ê負擔kap使命。

事(tāi)先tio̍h感謝教育部杜正勝部長有氣魄來整合台語拼音系統,hō͘台語文運動tsiah有使/著力點,hō͘阮tsit陣台語文運動者tsiah有努力ê目標kap ǹg望。

Koh來tio̍h感謝2001年tī Harvard大學教台語課ê李勤岸教授,伊認真指導我ùi華語行向台語寫作,也引tshuā我行台語tsit條路。Mā tio̍h感謝tī台語tsit條路頂面,真tsē前輩對我ê指導kap牽教,尤其是台語電腦ê專家,因為篇幅ê關係,請原諒無法度一一列名。

續落來也tio̍h感謝我ê團隊,尤其是波士頓ê陳清俊長老,台語信望愛網站內面所有ê白話字文獻,差不多lóng是伊phah入電腦。Koh ài感謝洛杉磯ê鄭良光長老,伊建議並支援成立「台語文工讀基金」,thang hō͘我訓練中山醫學大學台語系我ê學生,來tàu整理台語文資料上網,也hō͘學生感覺讀台語系有頭路。

最後tio̍h ài感謝上主(上帝)引tshuā我行入信望愛網站,kap蔡哲民教授合作努力開設台語信望愛、客語信望愛(http://hakka.fhl.net) 、思羅安信望愛( http://sloan.fhl.net ,台語點字),並開發tsē-tsē台語文工具。

1945年6月19日,我出生tī台灣南投縣國姓鄉。大學畢業了後,因為家境ê關係無koh進修。在學中對各種語言lóng有趣味,尤其是後來tam-tio̍h母語滋味,對我ê母語─台語kap客語重新建立甜蜜ê關係,這是我一生中siōng大ê喜樂。

Taⁿ我感覺台語文jú來jú甘甜,也深深感覺台語文電腦工具kap網路技術ê重要性,阮決定繼續開發,thang對台語文運動有所貢獻,這是我ê希望。