《母語e5心靈雞湯》

| | | 轉寄

櫻花

listen









--春天花展8之二
--Chhun-thiⁿ hoe-tián peh chi jī

櫻花是武士ê 靈魂
Eng-hoe sī bú-sū ê lêng-hûn
遵守約束ê 話
Chun-siú iok-sok ê ōe
春天隨到
Chhun-thiⁿ sûi-kàu
伊著報到
I to̍h pò-tò
春天遲到
Chhun-thiⁿ tî-tò
Bē-tàng 怪伊規叢萬蕊
Bē-tàng koài i kui-châng bān-lúi
無一蕊肯出劍
Bô chi̍t-lúi khéng chhut-kiàm
肯hō͘ 春天一寡元氣
Khéng hō͘ chhun-thiⁿ chi̍t-kóa goân-khì

講時遲,彼時緊
Kóng-sî tî, hit-sî kín
斡一下頭
Oat chi̍t-ê thâu
春天講伊來ah
Chhun-thiⁿ kóng i lâi ah
所有ê 武士
Só͘-ū ê bú-sū
準時出劍
Chún-sî chhut-kiàm
白花劍、紅花劍
Peh-hoe-kiàm, âng-hoe-kiàm
一串一支劍
Chi̍t-chhoàn chi̍t-ki kiám
一支一串花
Chi̍t-ki chi̍t-chhoàn hoe
規叢壘壘墜墜
Kui-châng lúi-lúi tūi-tūi
萬劍同齊出招
Bān-kiàm tâng-chê chhut-chiau

所謂武士
Só͘-ūi bú-sū
其實幽雅秀氣
Kî-si̍t iu-ngá siù-khì
沿水邊跳出早春ê 演歌
Iân chúi-piⁿ thiàu-chhut chá-chhun ê ián-koa
原來,櫻花是溫柔ê 舞妓
Goân-lâi, eng-hoe ê un-jiû ê bú-kī
武士ê 靈魂
Bú-sū ê lêng-hûn
化成一群輕盈飄然
Hòa-chiâⁿ chi̍t-kûn khin-êng phiau-jiân
風情萬千ê 春天仕女
Hong-chêng bān-chheng ê chhun-thiⁿ sū-lú
所謂劍
Só͘-ūi kiàm
就是櫻花ê柔情
Chiū-sī eng-hoe ê jiû-chêng

--2003/5/23 Harvard