《母語e5心靈雞湯》

| | | 轉寄

Kái Ki-phiò...改機票

SARS 五之三
Kin-á-jit chit-chūn góa èng-kai tī ki-tiûⁿ
今á日這陣我應該tī 機場
Èng-kai teh thong-koan
應該teh通關
Èng-kai teh tán chi̍t-pan Se-pak747
應該teh等一班西北747
Poe óng Tâi-oân ê hui-ki
飛往台灣ê飛行機

Kiat-kó, góa iáu chē tī chia siá si
結果,我iáu坐tī chia寫詩
Beh chē góa ê si
Beh 坐我ê 詩
Chi̍t-pan su-liām kò͘-hiong ê phùn-siā-ki
一班思念故鄉ê噴射機
Poe tńg-khì Tâi-oân
飛轉去台灣

SARS í-keng kā góa ê ho͘-khip-tō
SARS已經kā我ê呼吸道
Chhòng kah chin bô sūn-lī
Chhòng kah真無順利
Kā góa khò suh chó͘-kok iông-khì seng-chûn ê
Kā我靠suh祖國氧氣生存ê
Chit-ê ho͘-khip-tō
這個呼吸道
Tòng khí-lâi
Tòng起來
Beh kā góa chham kò͘-hiong keh-kī
Beh kā我chham故鄉隔離
Hō͘ góa ê hì-hio̍h lian khì
Hō͘我ê肺葉lian去
Ū kàu iau-siū ê Tiong-kok pēⁿ-to̍k
有夠夭壽ê中國病毒

Bi-kok chèng-hú thò-hia̍p tī Tiong-kok pēⁿ-to̍k ê khióng-hat
美國政府妥協tī中國病毒ê恐嚇
Hi-bōng góa mài chhut-ji̍p Tâi-oân
希望阮mài出入台灣
Mài chhut-ji̍p SARS chiàn-cheng-tiong ê Tâi-oân
Mài出入SARS戰爭中ê台灣
Mài chhut-ji̍p Tiong-kok pēⁿ-to̍k kong-táⁿ ê Tâi-oân
Mài出入中國病毒攻打ê台灣

Hâng-khong-kong-si kóng ki-phiò ē-tàng iân-kî
航空公司講機票會tàng延期
In-ūi sī chiàn-cheng bô beh hoa̍t-chîⁿ
因為是戰爭無beh罰錢
Ē-tàng it-ti̍t iân lo̍h-khì
會tàng一直延落去
Iân kàu chiàn-cheng kiat-sok chiah tńg-khì
延到戰爭結束才轉去

Chó͘-kok teh chiàn-cheng
祖國teh戰爭
Chó͘-kok pī Tiong-kok pēⁿ-to̍k ji̍p-chhim
祖國被中國病毒入侵
Tông-pau tī chiàn-cheng ê khó͘-hái-tiong
同胞tī戰爭ê苦海中

Góa tán-leh tio̍h khà tiān-ōe
我等leh tio̍h khà電話
Kā ki-phiò kài chò tan-thêng
Kā機票改做單程
Ti̍t-ti̍t chi̍t-chōa poe tńg-khì Tâi-oân
直直一chōa飛轉去台灣
Poe tńg-khì Tâi-oân chham-chiàn
飛轉去台灣參戰
Bô-koán ū khó-lêng sī sím-mi̍h goân-in
無管有可能是甚物原因
Chit-tiuⁿ ki-phiò
這張機票
Bô beh koh poe tńg-lâi Bi-kok.
無beh koh 飛轉來美國
--2003/5/31 Harvard