《台語遊戲教學》

| | | 轉寄

語詞tàu腳手

學習ê技能:台語造句ê能力。

使用ê時機:利用學生已經學過ê台語詞來造句,練習表達長句ê能力。

需要ê教具:烏枋(抑是白枋)、吸鐵(用來固定詞卡)、各種語詞ê詞卡

活動前ê準備:將全部ê台語詞詞卡固定tī烏枋。

按怎sńg:
1. 老師利用詞卡幫學生複習已經學過ê台語詞。
2. 然後老師提出1個詞做中心詞,要求每1個學生tī chit個中心詞ê頭前、後壁增加修飾成分,hō͘ chit個詞變成詞組(phrase),然後koh慢慢加添附加成分,hō͘詞組變成文句。譬如:冊→故事冊→一本故事冊→一本真好看ê故事冊→媽媽買hō͘我一本真好看ê故事冊→昨昏媽媽買hō͘我一本真好看ê故事冊→昨昏媽媽tī冊店買hō͘我一本真好看ê故事冊→昨昏媽媽tī民生路ê冊店買hō͘我一本真好看ê故事冊。
3. 每1個學生每擺加添1個成分,後面ê同學ài先講出頭前hit個同學所講ê了後chiah將家己加添ê成分加--入去,講出完整ê詞組抑是語句。
4. 當語句擴展到一定ê長度時,老師to̍h換另外1個詞來造句。

請注意:
1. Tī活動進行ê時,老師ài注意學生所造ê語句有正確--無,mài hō͘學生重覆錯誤抑是奇怪ê語句。
2. 當學生想bē出來ê時,請老師做適當ê提示,增加學生ê自信kap造句ê能力。