《各各他e5目屎--苦難得安慰》

 | | | 轉寄

青瞑ê可怕

作者 紀福讚 2006.02.19

美國法律對tī酒醉駛車ê刑罰愈來愈重，因為愈體會一個人tī意識上ê青瞑會造成社會真大ê傷害。親像潘霍華曾比喻希特勒是一個酒醉駛車ê人，tī信仰上，為tio̍h beh保護khah濟人免受傷害，會tàng kā暗殺。這是情況倫理！「khah少ê惡」（less evil）ê做法。Tī法律上當然是犯法，tī道德上卻是會當理解--ê，因為一個有智慧，外表虔誠，soah滿腹邪惡意念，暗中利用人ê疼心kap信心teh犯罪ê人，是非常ê可怕。這種人常常利用人tī心理上、意識上、資訊上、信仰上某種ê青瞑teh欺騙人，beh出賣伊ê兄弟，teh製造家己是英雄ê虛假形象。Tī宗教上出現--ê，就是掛羊頭賣狗肉ê『神棍』；tī政治上出現--ê，就是「政客」；tī男女交往上出現--ê，就是「花花公子」。但是基本上，這種人ê猖行，是因為人真容易tī感情上、信仰上、資訊上、意識上是「青瞑--ê」。

Tī感情上ê青瞑，hō͘一個少女終身承受心靈ê創傷；tī信仰上ê青瞑，hō͘一個人失去得tio̍h永生ê機會；tī資訊上ê青瞑，hō͘人成做無知跟tòe人喊喝ê群眾；tī意識上ê青瞑，hō͘人bē記得伊是啥物款人，伊ê根，伊存在ê目的是啥物。今á日台灣人最悲哀ê所在就是這種ê青瞑。感情ê歸屬beh tī tá落？tī中國？tī台灣？á是tī美國？tī家庭？tī教會？á是tī民族？信仰上ê方向感beh tī tá落？是永恆ê價值觀？á是近利ê投機？是真實ê犧牲？á是形式ê作秀？是為tio̍h群體？á是為tio̍h家己？是遵趁上帝？á是顧面子趁私慾？資訊ê忠實chhìn-chhái「兩百箍」就會當出賣mah？資訊是膨脹家己、打擊異己ê工具？á是報揚真理，表揚善良，宣揚美感neh？資訊是m̄是「青瞑ê gia̍h劍」－－亂thâi neh？á是社會病理ê針炙？是對群眾ê善導，á是誤導？意識上ê驚惶是m̄是嚴重到「看tio̍h草索á親像蛇」？致到烏白不分，是非不明，善惡bē清，真假霧霧，súi bái不管，敵友不詳，五倫不知ê地步。只有一項共同ê意識－－「錢」。錢做頭，啥物lóng會tàng解決。為tio̍h錢無一項bē當出賣。錢hō͘台灣人ê心靈變做「青瞑」。

歷史上最大ê悲劇就是宗教領袖利用群眾ê睛瞑釘死耶穌。耶穌指責法利賽人是青瞑--ê chhōa路（太廿三16-28），看tio̍h小--ê，忽略大--ê。遵守奉獻，忽略公義、憐憫、信實；外面顯出公義，內面裝滿假善kap不法，是像粉白ê墓。Kan-taⁿ顧面子、形象、形式、失去自省ê良心kap犧牲真理，欺騙群眾，欺騙家己，也想beh欺騙上帝，是十足ê青瞑。耶穌講：「Lín若知家己青瞑就無罪啦！但如今lín講『阮有看見』，所以lín ê罪iáu tī teh。」（約九41）。今á日ê台灣人教會是m̄是也墮落tī這種青瞑ê景況neh？喪失做真理ê光ê教會本質呢？對tī社會ê惡咱kiám chhái敢大聲指責，但對教會內ê罪咱就m̄敢出聲。公義ê勇氣tī教會內表現bē出來，因為tī今á日注重人際關係ê社會，伊真容易得罪人，hō͘人無歡喜。致到tī教會內也學習tio̍h「食紅柿」－－揀軟--ê；講壇真少見教導智慧ê判斷，只教示單純ê憨憨á信；只教導「疼」，但無教示「疼ê適當性」kap「beh án-chóaⁿ疼」；只教導tio̍h傳福音，但無教導beh án-chóaⁿ傳；siōng悲哀--ê，是失去kap惡爭戰ê勇氣。掠準「kap惡妥協」是出tī「疼心」；驚得罪人，但無驚得罪上帝，因為人看會tio̍h、會奉獻、會做工；上帝看bē tio̍h，bē講話，koh無錢。這是m̄是教會ê青瞑？注重細--ê，忽略大--ê？這是m̄是教會ê青瞑將上帝釘十字架？

Tī耶利哥ê路上，耶穌問青瞑人講：「Ài我為你做什麼？」青瞑人講：「先生ah！我ài看tio̍h。」耶穌講：「你去罷，你ê信救了你。」今á日，咱ê信，是m̄是hō͘咱ê教會目睭光，會tàng chhōa青瞑ê台灣社會，來跟tòe耶穌，敢kap社會ê惡爭戰？敢對付咱家己ê罪？

無公義ê疼是妥協、青瞑；無識真實ê熱情是可怕、危險，今á日咱ê教會kiám thang做一個這款ê青瞑人？