《生活e5台語,台語e5生活》

| | | 轉寄

M型社會下基督教事工策略省思

中產階級ê崛起,不過是chit兩、三百年ê事。十八世紀中葉工業革命了後,chiah漸漸phah破貧富貴賤兩造極端ê社會型態。工業革命造成銀行家、工商業者、律師、醫生、工程師、教授、小店主、公務員、藝術家……,in構成了chit-ê新興ê社會階層。Chiah-ê人ê成功是因為自身ê努力,以及社會ê變遷所造成。In具有專業能力、ē-tàng獨立謀生,kap hiah-ê靠微薄工資為生ê工、農人無仝。君主政體ê瓦解kap民主制度ê建立,mā thang講kap tio̍h中產階級ê崛起,有真大ê關係。

M̄-koh如今全球競爭化財富重新分配,經濟活動造成ê社會型態倒退,hō͘真無簡單chiah嶄露頭角ê中產階級,竟然漸漸消失。日本學者大前研一指稱tī當今全球競爭下,中產階級漸漸淪落到中下階層,ná親像英文字母「M」仝款,tò-pêng ê sàn-chhiah人pianze 變chē,正pêng ê富人mā變chē,中產階級消失,就是「M型社會」。日本已經有八成人口,淪入中低收入階層,á美國比日本koh-khah早步入M型社會,台灣當teh行向M型社會。

「中產階級消失」對台灣人民生活方式帶來ê影響,有真chē例顯見。數一數二ê知名劇團果陀,面臨經營kap票房上ê困境,劇團導演呼籲政府有關單位應對文化團體有補助機制kap扶植計畫。慘淡經營ê劇團並m̄是只有果陀,其他頂港有名聲下港有出名ê知名劇團mā lóng teh度寒冬,講到基督教劇團,亞東、天藝、晨星、烏門山頂ê劇團…,則雪上加霜。這to̍h是teh說明了M型社會ê來臨,對藝文產業造成ê威脅。

藝文產業蓬勃發展,原kap中產階級崛起帶有密切bē-tàng分割ê關係。Tī十九世紀以前,藝文工作者服務ê對象是社會ê上流階級,繪畫、音樂、寫作是為tio̍h滿足chiah-ê人。到了中產階級興起,成做藝文ê新觀眾,藝文chiah行出貴族殿堂,大都市tùi án-ne有了公共ê音樂廳、歌劇院、博物館、圖書館。但如今,中產階級漸漸漸漸淪落到sàn-chhiah ê下階層,無夠額ê經濟能力來進行文藝賞析活動,只chhun金字塔頂端ê少數有錢人有能力,自然藝文團體會面臨經營瓶頸。

對tī一般人來講,食衣住行育樂,tī收入變少,或大環境物價上漲但薪水無漲chit種變相減薪ê情況下,會先刪減ê預算,khah大面tùi「樂」開刀。The̍h視覺享受來講,看現場表演tio̍h開ê錢siōng chē,就改看電影;首輪院線片看bē起,就看二輪,甚至tī厝租影片,或是收看第四台電影頻道。

Ē-tàng預見繪畫、音樂、寫作、攝影、舞蹈、雕刻ê等相關八大藝術文化產業,若M型趨勢繼續延燒落去,無久結局會面臨重新洗牌。Ná親像十幾年前,台灣經濟繁榮,各家傳媒林立。以出版社為例,koh-khah是chē到台灣每月出冊量以萬為計。但,當M型社會來臨,購冊ê主流群體—中產階級經濟能力降低,m̄是無買bē-sai2e5冊,就會改為去圖書館借冊,小型、經濟困窘ê出版社,自然會應聲先倒。觀察敏感局勢ê團體,早to̍h構思如何針對chit-ê M型社會現象,來重擬獲利策略。

加上,這是一個「全有,不然就全無」ê競爭時代。Ná親像搜尋引擎,一般網友kan-ta會知影google kap奇摩,而bē曉/bōe/bē知影第三名以後ê搜尋引擎。Mā就是任何一項產業,若做未到前三名,就無jōa有生存立足之地。M型社會則hō͘ chit-ê情況koh-khah明顯,若m̄是前三大ê團體,大概lóng oh得支持落去。

對tī教會界,各種教會機構ê奉獻收入,主要mā來自中產階級。M型社會ê來臨,thang預見整體ê奉獻(以十一奉獻來估算)mā會跟tòe漸漸變少。Chiah-ê奉獻分配到各項事工,ē-tàng想像以藝文等福音事工方式ê機構,會是第一波面臨奉獻不足困境ê,ná親像頂面所講ê福音劇團。社會救助類ê機構,其次。教會應該是到最後chiah受tio̍h衝擊。

Tī整體教會界資源有限、並可能跟tòe中產階級消失而jú來jú緊縮ê情況下,各種教會機構(音樂、文字出版社、劇團、社會公益救助…)應該tio̍h嚴肅來進行思考,家己存在ê意義kap價值。是m̄是自身存在帶有其他機構無法度取代ê獨有特殊意義?á是目前ê存在,kan-ta只為tio̍h證明家己有法度,卻是浪費整體神國資源?若是後者應該謙卑來考慮退出,hō͘其他同性質ê主內機構會得thang取得夠額ê資源,繼續為主奮鬥。

M型社會究竟kám bē遍及台灣,bē-ōe確定。但是tī外面社會ê資源重新分配iáu無來臨chìn前,教會界應該以耶穌ê心為心,先行智慧來對教會資源進行整合。若準想beh家己創立詩歌音樂出版社者,不妨加思考是m̄是ē-tàng借助現有ê音樂出版社力量達到仝款ê目的?各樣傳媒(文字廣播、電腦電視)機構,是m̄是有合併ê必要?

目前台灣社會大多數ê人,當teh為tio̍h油價kap各樣民生物資價格猛漲所苦,民生問題siōng重要,娛樂活動放一邊,lóng已經學會曉kā資源khǹg tī刀口。Ná親像陳水扁總統最近參加台北音響影視大展開幕活動,便遭民眾嗆聲:「人民kiōng-beh活bē落去lah!」教會資源運用,也tio̍h有宏大ê普世教會觀,以基督為首,百體聯絡得合宜,紮實來將資源用tī上帝所喜樂ê所在。

Tī chit-ê艱困ê時chūn,為家己ê存在大聲疾呼奉獻、發動連鎖禁食祈禱,可能並m̄是siōng要緊ê項目,卻是beh先為家己祈求擁有上帝國度ê眼光,chiah bē致使têng-tâⁿ因應M型社會將boeh帶來ê嚴峻考驗。