《生活e5台語,台語e5生活》

| | | 轉寄

安全帽ê奮鬥記事


騎機車載gín-á出門,但姊弟兩人lóng無歡喜戴安全帽,因為真燒熱koh真重。特別是姊姊,常ài我kā伊綁兩條辮子,hit種翹得高高ê可愛造型,m̄是古早時代髮辮貼tiâu耳孔邊後面下垂ê閨秀型。梳chit種頭ê時chūn,伊koh-khah boài戴安全帽,因為會kā伊美麗ê髮型破壞掉。

Tú開始,我lóng是採用恐嚇法,「無戴,會hō͘警察掠去oh!」不過我心裡是真討厭chit種講法。而且in發現chia警察真少,甚至有時警察看tio̍h in無戴安全帽mā無掠in。

後來我想了另外一種講詞,kā-in講:「媽媽細漢ê時chūn,安全帽ē-sái講是奢侈品,有錢人chiah ē-tàng戴。(當時連o-to-bái lóng真少看tio̍h,多數人是行路或騎腳踏車,mā無容易買tio̍h安全帽。)

外公是工程師,常常tio̍h騎o-to-bái到真遠ê工地監工。伊無安全帽thang戴,只ē-tàng戴hit種防止落石擊頭ê工程帽,但有帽á戴已經是真了不起loh。媽媽kap a舅細漢ê時chūn lóng看卡通《科學小飛俠》,安全帽ná親像科學小飛俠ê頭盔。有時sńg遊戲,會偷the̍h外公ê帽á來戴。Lín戴安全帽,就會kap科學小飛俠仝款帥oh!」

不過,án-ne講mā無用,現在ê gín-á真聰明,in bē感覺戴了安全帽會變成科學小飛俠。特別是in現在無流行科學小飛俠。姊弟兩人iáu是無歡喜戴安全帽。革命iáu未成功,我這做媽ê iáu tio̍h繼續努力。

有一工我想tio̍h家己ê車禍經驗,kā in講:「Lín tio̍h感謝安全帽oh,有一pái安全帽保護媽媽。若無安全帽,lín今á日就無一個súi ê媽咪,只ē-tàng有一個面bái ê媽媽。」chiah-ni̍h驚人ê話題,姊弟兩人就有興趣loh,豎(khiā)直耳孔專心teh聽。

「媽媽大學畢業工作,thàn了錢買一台o-to-bái,koh開了一千gōa kho͘買一頂全罩式安全帽。Hit時別人lóng羨慕我有o-to-bái,但lóng感覺我真戇、koh浪費,根本無需要買全罩式安全帽。但事後證明我chiah是聰明ê。

因為,有一pái我kap爸爸騎o-to-bái去郊遊,突然hō͘汽車撞tio̍h後pêng邊a。爸爸因為手掠tiâu車頭,所以跟tòe一歪,連人帶車摔到路邊田裡;媽媽坐tī後座,kui-ê人像超人án-ne縱身向前飛出去,頭、胸坎先落地,並滑行一小段距離。

媽媽當時胸坎á痛kah仆tī地上bē振動,爸爸行過來,認為我死去ah,竟然kā我翻身過來,抱tio̍h hoah我ê名,我痛kah大叫「mài動我lah。」hit台汽車就趁chit-ê làng縫溜soan去。

後來,我kap爸爸身軀lóng是輕傷,但車毀了,安全帽磨損嚴重。兩人不約而同lóng感覺好佳哉有戴全罩式安全帽,若無下頦骨頭一定碎裂,嘴齒m̄知boeh落幾齒。」 (註:根據統計,騎士ê下頦區域有高達35% ê機率會遭遇tio̍h衝撞)

姊弟兩人聽了kah-ná有曉悟,每pái騎o-to-bái出門就自動乖乖á戴安全帽,lóng m̄免我提醒。但是人類僥倖、省事態度kap唯美心理,實在遠超過人身安全意識。若是騎真短距離,in有時mā會懶得戴安全帽。想講橫直chiah一下á,bē發生什麼意外pah?tú應驗聖經所講ê無m̄-tio̍h,每一個人內底有嚴重ê自我毀滅趨勢。

我最後只好kā好朋友王醫師搬出來。我對姊弟兩人講:「Lín知m̄知影,是誰推動『騎機車tio̍h戴安全帽』ê法律?lín mā認識伊oh!」姊弟兩人lóng真好奇,「是誰ah?」我回答講:「就是王醫師in發現:當發生o-to-bái交通事故ê時,因為速度慣性,頭部往往首當其衝或tāi先墜地。」

並講kah有聲有影,「lín去過病院急診室loh!m̄是有真chē少年人全身鮮血被送入來?hiah-ê真chē是車禍肇事。王醫師in做醫生ê,tī急診室裡看siuⁿ-chē了chiah-ê悲劇lah。所以in努力推動『騎機車tio̍h戴安全帽』ê法律通過。」

續落來對姊弟兩人講:「Ē-sái講是大家lóng像lín仝款,感覺王醫師in真無聊,國家chhòng啥boeh立chit種法?安全帽戴起來真燒熱koh真重。警察koh-khah是討厭,四界掠無戴安全帽ê人。被掠tio̍h iáu-beh罰錢。

Ē-sái講是lín知影mah?因為chit條法律通過,所以全國車禍死亡率大幅降低。真chē家庭ê爸爸因為有戴安全帽無死,所以iáu ē-tàng繼續thàn錢飼一家人;真chē家庭ê媽媽因為有戴安全帽無死,所以iáu ē-tàng繼續做家事。根據統計,一個人死去,平均會有六個人難過傷心。Lín想看,若爸爸媽媽無戴安全帽車禍死去,kám bē真傷心neh?

王醫師in雖然hō͘真chē人罵,但實際上卻拯救了真chē家庭bē致使破碎neh!卻無人知影,beh向in道謝。Lín戴安全帽ê時,也tio̍h紀念王醫師in ê努力oh。」

講到chia,禁bē-tiâu想tio̍h上帝ê律法,mā是án-ne。咱lóng是感覺真麻煩,真無方便。Ná親像十誡裡ê「bē-tàng作假見證」,就是bē-tàng講白賊。Bē少基督徒可能tú信主ê時,會努力遵守。但是久了就頑皮。因應時勢、考慮大局,小講一個白賊或是做一個假見證有什麼關係,上帝何必凡事lóng hiah-ni̍h認真?

這就kap戴安全帽有點á類似,當伊成了習慣,無戴就會感覺怪怪ê。但是戴安全帽iáu無成做習慣chìn前,表面看起來是每pái騎車chìn前,不斷來做選擇「戴?或是m̄戴?」實際上,心裡每pái ê念頭lóng是「m̄戴」,卻是靠各種理性思辯或罰款壓力來幫助家己戴起lih。

仝款ê,「bē-tàng作假見證」若無變成咱ê生命習慣chìn前,事實上心裡每pái ê念頭lóng是「講白賊比較khah方便」,卻是靠各種理性思辯或白賊被拆破ê壓力來幫助家己mài講白賊。

遵守上帝ê律法看起來kah-ná麻煩或愚戇,事實上透過遵守律法,thang幫助咱將chiah-ê行為規範化成生命內涵,成做習慣,mā就是所謂ê「脫去舊我」,一步一步提升成做配得耶穌十架代贖所hō͘咱「新造ê人」身份,享受真自由。

Thang悲哀ê是,上帝所設ê律法kap王醫師in努力推動ê『騎機車tio̍h戴安全帽』ê法律仝款,雖然救人無數、會帶hō͘ hiah-ê人幸福,但是卻被無知ê hiah-ê人咒罵「無聊,真是teh chhōe麻煩」,hiah-ê人khah大面看bē-tio̍h律法ê設立,原是帶有無限ê愛kap恩典tī背後。

姊弟兩人自從瞭解『騎機車tio̍h戴安全帽』ê法律形成原因,現在即使只有一分鐘ê o-to-bái車程,in mā主動戴安全帽。雖然我m̄知影王醫師chit張牌ē-tàng用jōa久,畢竟我koh-khah深知人類內底僥倖、省事態度ê趨勢是thang驚ê強大,但是至少我hō͘ in看見律法kap恩典是常常同時存在ê。