《生活e5台語,台語e5生活》

| | | 轉寄

序:基督新教之光──王世勛ê文化見識kap政治智慧

《台灣海峽國際角色變遷之歷史研究》chit本冊就beh出版loh。作者是台灣鄉土文學作家、現任ê立法委員王世勛。

這是近年以來,王世勛所寫有關文化論述ê第二本冊,是接近十萬字ê長篇碩士學位論文。另外一本是印刻出版社tī 2003年所印行ê《六十七個笑聲》文化短評集。

儘管表面上jōa-ni̍h-á無仝,但是chit兩本冊之間卻隱藏有極深ê關係。

四年前出版ê《六十七個笑聲》共收集了伊ê六十七篇文化短評。品評ê文化種類除了文學作品以外,iáu涵蓋電影、歷史kap宗教;批評ê範圍除了台灣本土作家ê作品之外,iáu涵蓋中國、日本、南亞、捷克、愛爾蘭、美國kap到m̄知名ê國度ê作家作品;被評ê人物包括基督、馬丁•路德、楊逵、東方白、余光中、白先勇、陳履安、張藝謀、葉慈、瓦勒拉、卡夫卡、伊力•卡山、奈波爾、林獻堂、德川家康、西鄉隆盛、福澤諭吉......。Tùi chiah-ê名目來看,四年前,王世勛ê文化見識kap宗教認知早就已經達到非常深入廣博ê境界,當teh等待一個機會,將chiah-ê見識統合起來,構成一個徹底ê屬tī伊自已ê文化見識kap政治智慧。終其尾tī 2007年ê現在,伊chit本碩士學位ê論文集寫出來lah,完善了伊ê文化觀kap政治觀。

一前一後ê chit兩本冊ê lóng真精采,寫作ê立場koh kap chit幾年伊ê信仰脫bōe離關係。

簡單來講,chit兩本冊透出基督新教ê真光,特別是chit本《台灣海峽國際角色變遷之歷史研究》如果無用基督新教ê眼光來照看,就無法度了解中間ê奧義。

Án怎講竟然會án-ne neh?講來並m̄是一個真容易就ē-tàng講清楚ê問題。

Bē記得tùi什麼時chūn開始﹝我應該比王世勛小khóa早幾年﹞,阮兩人lóng被聖經吸引lah。

Tú開始,阮只是單純被聖經裡耶穌博愛ê行止kap智慧ê言談所感動,感覺這是一本不得了ê好冊。跟tòe閱讀kap祈禱,真chē神蹟、啟示、異象、異夢不斷tī阮ê日常生活中出現了,將阮帶入聖經所記載非常特殊ê神秘境界ê中間,hō͘阮koh-khah了解以色列人ê神──耶和華;基督教會ê首腦──耶穌;以及參與創世奇蹟無所不在ê萬民保惠師──聖靈,這聖三位一體ê極深奧秘。阮終其尾受洗lah,成做馬丁路德教派中ê一個教會ê信徒。

既然身為一位基督徒,阮就必須不斷ê聚會。阮聚會ê家庭小組大約有五、六人左右,本來聚會ê地點lóng tī鹿港ê我ê厝,每兩、三個禮拜就聚會一pái;後來為tio̍h替詩人吳晟ê疾病祈禱,阮轉移聚會ê地點到溪州吳晟ê厝裡。Tī聚會ê時,阮bē-tàng避免來談論起目前ê文學kap文化﹝王世勛、吳晟、我kap真chē好朋友bat聯手辦過《台灣新文化》《台灣新文學》chit兩大刊物﹞,因此常常互相紹介一kóa書籍。我會記得阮討論過韋伯ê《基督新教倫理kap資本主義精神》、杭亭頓ê《文明衝突kap世界秩序ê重建》、福山ê《信任》、蘭迪斯ê《新國富論》、杭亭頓主編ê《為什麼文化真重要》、甚至是彼得•杜拉克所寫ê一系列ê有關各國企業ê重要書籍。本來阮並無發現中間有什麼奇怪ê現象,後來chiah發現chiah-ê冊lóng是kap基督新教精神有關ê書籍,儘管寫冊ê人無一定是基督新教徒,但是in一致推崇基督新教徒hit種虔誠信仰、克勤克儉、奮發向上、自由平等獨立ê真精神。當時,我kap王世勛tú被帶向基督新教ê精神境界中。

我想,王世勛對chiah-ê冊ê閱讀比我koh-khah詳細、全面。因為兩年前,伊考入去中興大學ê「國際政治研究所」,開始對「地緣政治學」中ê文化問題做專門ê研究,阮所討論過ê書籍tú好lóng牽涉tio̍h廣闊ê目前世界文化•政治•經濟現況,ē-tàng提供真chē ê資料hō͘伊進行研究。但是,我萬萬無想tio̍h,chiah-ê書籍kah-ná非常猛烈刺激tio̍h伊,替伊型塑一種優美ê、堅定ê、正確ê文化•政治觀,一下á就hō͘伊掌握世界文明•政治ê大趨向,這正是目前台灣ê文化•政治界ê學者所缺乏ê真少有ê實用觀點……chit-ê結果,有點á hō͘我tio̍h驚。

大部分看起來,東方ê學者tī研究世界文化•政治ê時因為siuⁿ過了解家己ê東方文化,就高估儒家文化、印度文化,真容易陷入東方本位主義ê陷阱,對西方文化採用了過度ê扺擋、拒絕排斥ê態度。準講有kóa學者去過西方研究機構從事文化研究,卻因為缺乏對基督新教ê真實體驗,對tī基督新教ê精神下腳發展起來ê目前西方文化無法度了解,甚至真chē所在誤解,終其尾hō͘ in ê研究無法度客觀,埋落來夜郎自大ê東方本位主義ê pháiⁿ判斷,對tī文明ê未來路向就採行倒退論或虛無論,致使kui-ê結論lóng m̄-tio̍h去,對他者ê西方kap家己ê東方終其尾無一點點ê好處。

對tī東方學者ê chit-ê普遍缺點,以前我kap王世勛lóng bat有過。

原來,我kap王世勛lóng bat花費無數ê精神kap體力,身軀力行,對東方ê儒學、佛學甚至是道術做了[撒身懸崖]ê追求。但是因為m̄是西方人,儘管真用功閱讀世界文明ê書籍,可惜總是感覺對西方ê瞭解隔了一層,無法度徹底了解其深義,西方文明hit-ê區塊變成一個無法度塡補ê烏洞,論起世界ê文化文明就感覺真心虛。Ē-sái講是,當阮有基督新教ê信仰了後,對西方ê文明就變kah真ē-tàng掌握,阮變kah忽然ē-tàng知影今á日ê西方為什麼會變成án-ne ê深層原因,對韋伯、杭亭頓、福山、蘭迪斯chiah-ê當代學者ê言論有高度ê理解。Hit-ê烏洞被填補起來,對西方文化文明無koh生份,soah變kah真親切起來。

另外,以前因為無法度理解西方文化,到最後患tio̍h一種不斷退回東方文化自我中心主義ê病症,頭尾無法度真正來做一個自我整頓ê工作。後來因為對基督新教ê精神有所體會,就提供hō͘阮一個極高ê文明參考座標。阮ē-tàng通過基督新教ê眼光來了解、品評其他文明。以前雖然mā知影家己ê東方文明出了問題、缺陷一定真chē,若無bē演變到chiah-ni̍h衰弱ê地步,可惜lóng是指bē出來,chit-má就真清楚,阮開始掌khiā-tī一個世界文化ê制高點,ē-tàng照看一切,阮無koh盲目,擁有chit種自我khàng粒á疕ê chiah ē-tàng hō͘家己因此感覺無比清醒,是真愉快ê經驗。

王世勛chit本《台灣海峽國際角色變遷之歷史研究》ê論著,就是tī chit種精神狀態中寫成ê,絕對m̄是東方本位主義者ê書籍thang比ê。這是閱讀chit本冊第一重要ê一個認知。

其次,雖然chit本冊看起來是kā杭亭頓「文明衝突理論」運用到台灣海峽ê歷史現實做分析,指出世界各大文明如何tī台灣海峽奪取霸權ê經過kap影響,但是王世勛mā採用杭亭頓ê論敵福山ê一kóa主張,認為將來民主自由會tī台灣海峽兩岸實現開來﹝儘管目前iáu無充分ê條件﹞。可見chit本論著m̄是完全kā重點khǹg-tī「區域衝突論」頂面ê論著,卻是兼具「全球化」觀點ê一本論文。

Koh再其次,tī chit本冊內底,伊對台灣海峽ê歷史考察非常深刻,已經超出我chit-ê學歷史ê人ê學養範圍,假使m̄是對台灣ê有深切ê關懷,無人願意花費chiah-ni̍h-chē時間來進行chit種ê考察。

Tùi頂面chit兩點看起來就知影,王世勛一向所關懷ê「普世ê自由民主價值」kap「本土價值」tī chit本冊佔有極特殊ê地位。

Tńg來到頭前來談,我講chit本冊是khiā-tī基督新教精神ê立場來寫作ê,因為對基督新教有一定ê熱誠,就koh有全球化ê觀點,致使伊對後殖民主義ê理論家薩伊德有做深刻ê批評。伊指出,薩伊德批評奈波爾﹝生長tī千里達ê印度人,2001年ê諾貝爾文學獎ê得主,揭露回教文化弊病ê作家﹞是自暴其短ê行為,因為薩伊德只ē-tàng寫出《被遮蔽ê伊斯蘭》chit種冊,認為阿拉伯人ê形象被西方國家百般扭曲,但是對tī「無被遮蔽ê伊斯蘭」卻無法度寫出半句話語,伊非常受氣來批判ē-tàng寫出阿拉伯文化真相ê奈波爾是一件非常可笑ê tāi-chì。王世勛特別引述路易斯(Bernard Lewis)所講ê:當hiah-ê人發覺tāi-chì出了差錯ê時,可能會問兩個問題,一個是:「我做錯了什麼?」另外一個是:「誰害阮ê?」前者是近代日本明治維新ê思考,後者是近代拉丁美洲ê思考。王世勛暗示薩伊德ê思考是拉丁美洲ê思考,只是一種kā家己ê失敗一直往別人身上推ê pháiⁿ思考,無值得來重視。王世勛ê看法真值得台灣文化•文學界ê學者注意,因為後殖民理論tī台灣已經流行十年以上,已經變成所有文化•文學ê研究生必修ê課程,有人早to̍h將薩伊德奉為神明,從來無思考伊ê理論tī現實上究竟起了什麼作用﹝mā可能一點作用都無!﹞,將來可能iáu會繼續推崇chit-ê主義。根據我個人ê看法,薩伊德ê後殖民理論如果用來批判國民黨對台灣ê殖民,the̍h來引chhōa台灣人「脫國民黨ê中國化」,我認為是適當ê,因為國民黨所帶來ê文化是一個封建性•藩鎮性極強ê pháiⁿ文化,反科學、反民主、好貪污、自私自利ê文化,tú好應該將伊掃地出門。如果是用來「脫歐美化」,我看免lah!台灣目前ê文化非常無競爭性,科學、民主ê根基薄弱,當teh需要koh再全盤西化ê時chūn,「脫亞入歐美論」chiah是正論,無算是boeh 對歐美日chiah-ê國家去殖民化。

總講一句,tī批評薩伊德ê時,koh-khah顯出王世勛是一個全球化理論者,伊是一個竭力主張台灣改變家己,全力介入全球競爭ê論者。伊批評薩伊德,chit點ē-sái講是目前盲目ê台灣學文化•文學界ê一件大事!

Án-ne為序! ──2007、09、01 tī鹿港寓所