《賴永祥講書》

| | | 轉寄

《教會史話》修訂1_016, 百年禧慶馬偕三傳

1972年是馬偕來台百週年。為tio̍h記念禧年,有三本華語傳記單行本,to̍h是陳宏文著《馬偕博士在台灣》、陳宏文譯《馬偕博士略傳.日記》kah郭和烈著《偕叡理牧師傳》,tī台灣續接出版。

《馬偕博士在台灣》,原題《馬偕博士傳說》,bat連載tī《基督教論壇》,後來koh再配合郭水龍牧師、柯偕以利女士、柯設偕長老、郭和烈牧師提供資料來寫完成。初版tī 1971年底由基督教論壇報社刊行。修訂版tī 1982年由中國主日學協會刊出;附圖片,相片真chē,本文共169頁。《馬偕博士略傳.日記》,Bat tī《台灣教會公報》連載,後來結集由台灣教會公報社tī 1972年3月發刊單行本,本文共208頁,列做公報叢書。

著譯者陳宏文牧師,桃園人,1943年生。台灣神學院道學碩士。當北部教會籌備慶祝設教一百週年ê時,伊tú踏出神學院,就án-ne受命擔任慶祝大會歷史組幹事。伊bat擔任《基督教論壇報》記者、台北中山教會傳道師,新屋、台北大直、花蓮港(中山)教會牧師。1985年起擔任美國雙城福音教會牧師。當伊知影宣教師郭德士(John E. Geddes)有偕叡廉牧師娘tńg來國內前託管一kha松木製ê大箱á ê時,伊要求查閱,ē-tàng見tio̍h三本《馬偕日記摘譯》,是偕叡廉tùi英文摘譯做台語白話字(羅馬字)ê。伊就kā白話字koh再譯做華語刊出,mā利用chit-ê日記摘譯ê記錄來編定年代、月份、日期等,親像北部教會第一pái洗禮、聖餐,牛津學堂落成、開學……等等ê日期。

《偕叡理牧師傳》,tī 1971年12月由嘉義台灣宣道社刊行,本文共485頁,除了淡水砲台埔差會房地契圖以外,無附相片。M̄-koh,考證khah詳細,大多數是利用偕叡廉譯ê《馬偕日記摘譯》、郭水龍牧師手寫ê《北部教會歷史事實》kah偕牧師留落來ê行洗禮名冊、土地契約等。
郭和烈牧師,1906年生,1974年過往。東京神學校畢業,美國西敏斯德(Westminster)神學院深造。Bat牧會頭城、三重埔、中壢、濟南街、大甲等教會,而且擔任聖經學院教務長、台灣神學院教授(bat兼代院長kah教務長),而且著有《北部教會歷史》、《台灣各種宗教》、《台灣民間宗教》等。
Chit三冊所共同根據ê《馬偕日記摘譯》,tú親像偕叡廉tī然後記述講「我kan-taⁿ是kā馬偕博士(to̍h是老父)ê日記簡單翻譯一部分而已」。收自1871年11月1日起到1901年2月10日,馬偕博士tī chit年6月2日安息。每條簡單,漏譯一定真chē;親像1883年未列一條。偕牧師日記原本ê存放處,待查。

──《台灣教會公報》1889期 主後1988年8月15日