《台語荒漠甘泉（全羅版）》

"Hōan-lān sī ki-hōe"

作者 陳清俊 翻譯

listen


Káu ge̍h chhoe-chhit (Káu ge̍h chhit ji̍t)

"Sīong-tè sī góan tô-síam ê só͘-chāi kap khùi-la̍t. I̍ah sī hōan-lān-tiong ki̍p-sî ê pang-chān." (Si-phian 46:1)

"Sīong-tè ūi-sím-mi̍h m̄ khah chá lâi pang-chān góa ah?" Che sī sîong-sîong thiaⁿ-ti̍oh ê būn-tê. Ài-chai, Sīong-tè m̄-sī chìau lí ê sî-kan-pío lâi chòe-kang. I ê hó-ì sī ēng hōan-lān lâi kái-chō lí, hō͘ lí ha̍k-si̍p ti̍oh kà-sī. I èng-ún, "I tī gûi-kip ê sî, Góa chīu beh kap i tī-teh; Góa beh kìu i, hō͘ i chun-kùi." (Si-phian 91:15) Tngg lí tú-ti̍oh hōan-lān ê sî, I mî-ji̍t kap lí tông-chāi, líau-āu kā lí kìu chhut hiah ê hōan-lān. Tngg lí bô koh kip-sèng, hôan-ló, lí pìan an-chēng, I chīu kìu lí chhut-lâi, hit-sî I kóng, "Í-keng kàu-gi̍ah lah."

Sīong-tè ēng hōan-lān kàu-i̍ok I ê kíaⁿ-jî chin pó-kùi ê kong-khò. Thong-kè khùn-lân lâi kàu-i̍ok lán, tngg tāi-chì kè líau-āu, lán beh tit-ti̍oh êng-īau ê pò-síuⁿ. Só͘-í hōan-lān tiong chûn-chāi tiⁿ-bi̍t ê hí-lo̍k kap chin-si̍t ê kè-ta̍t. I jīm-ûi hōan-lān m̄-sī chó͘-tòng, sī chi̍t ê ki-hōe.

Bô tû-khì hōan-lān,Kap kîong-li̍at cheng-chìan ê khùn-lân,Chin-chìaⁿ an-hioh sù hō͘ lán,Tī I lāi-bīn, tit pêng-an. --- Annie Johnson Flint

Góa bat thiaⁿ-kè chi̍t ê phok-si̍t ê lāu-tōa-lâng kóng, "Sīong-tè chhì-gīam lí ê sî, īa sī lí chhì-gīam Sīong-tè ê sî. Khòaⁿ sī-m̄-sī I ê èng-ún, lí ōe tit-ti̍oh, tngg lí thong-kè I só͘ chhì-gīam ê."

Thoat-lī chhì-gīam ū nn̄g chíong. Thâu chi̍t chíong chīu-sī kán-tan tô-thoat chhì-gīam, líau-āu kám-sīa Sīong-tè. Lēng-gōa chi̍t-chíong sī chiong chhì-gīam khòaⁿ-chòe Sīong-tè lâi ê thiau-chìan, iau-kîu pí kè-khì koh-khah tōa ê chiok-hok, lo̍k-ì chiong chhì-gīam tòng-chòe chi̍t pái ki-hōe, khì cheng-chhú Sīong-tè khah chōe ê un-tían.

Án-ni chi̍t ē lâi, lîan kap lán chok-tùi ê mô͘-kúi īa beh pìan-chòe pang-chān lán ê. Khòaⁿ, sī tùi lán put-lī ê it-chhè, lóng teh chi-chhî lán. Che chīu-sī "Hóan-tńg tī chiah ê lóng-chóng ê sū, lán tùi thìaⁿ lán ê, tek-sèng kàu ū chhun." (Lô-má 8:37) chit kù ōe ê ì-sù. ---A.B. Simpson


附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com