《台語荒漠甘泉（全羅版）》

"Si̍p-jī-kè"

作者 陳清俊 翻譯

listen


Káu ge̍h cha̍p-sì (Káu ge̍h cha̍p-sì ji̍t)

"Nā ū lâng ài tè góa, chīu ti̍oh khòaⁿ-bô ka-kī, gîa i ê si̍p-jī-kè lâi tè góa." (Má-khó 8:34)

Chú hō͘ góa pē ê si̍p-jī-kè ū chin-chōe khóan chin-chōe hêng. Bô-tīaⁿ-ti̍oh sī kìo góa tī íu-hān ê ho̍k-bū hōan-ûi lāi chòe pêng-hôan, tan-tīau ê khang-khè, sui-jîan góa sīuⁿ góa ū lêng-le̍k chòe khah tōa ê sū-kang. Īa khó-lêng sī iau-kîu góa múi nî keng-chok sîang chi̍t tè thó͘-tē, sīm-chì lóng bô tit-ti̍oh siu-sêng. Mā ū-sî Sīong-tè ài góa tùi siong góa ê lâng ū hó-kám, tùi i khin-siaⁿ sòe-seh, hó-hó-á tùi i kóng ōe, koh tngg pa̍t-lâng hóan-tùi i ê sî, ōe khīa tī i chit pêng, tông-chêng i, an-ùi i. Á-sī tī hóan-tùi Sīong-tè ê lâng bīn-chêng kong-khai ūi Chú chòe kìan-chèng. Īa khó-lêng sī ài góa tī siong-sim ê sî, bīn íau ōe tòa chhìo-îong lâi seng-o̍ah.

Sī, Chin chōe si̍p-jī-kè lóng chin tāng, koh ū khó͘-thàng, kìo góa chi̍t lâng ka-kī sóan-te̍k khì gîa sī bô khó-lêng ê. Chóng-sī góa nā kam-gōan gîa si̍p-jī-kè, hē tī keng-kah, koh ōe ēng jím-nāi, bô chhut òan-gîan ê thāi-tō͘ ê sî, Îa-so͘ chīu tī góa sin-piⁿ, góa ōe tit-ti̍oh só͘ m̄-bat kám-sīu-ti̍oh kap I chiah-nih chhin-kūn.

I kūn-óa góa sī ài góa tì-hūi tíong-tōa sêng-se̍k, hō͘ góa kèng-ka pêng-an, koh cheng-ka góa ê íong-khì, ke-thiⁿ góa ê le̍k-līong. Án-ni hō͘ góa ōe thong-kè sīu khó͘-thàng ê keng-gīam, chîaⁿ-chòe tùi pa̍t-lâng koh-khah ū lō͘-ēng ê lâng. Góa tùi chi̍t ê in-ūi sìn lâi sīu koaiⁿ-kaⁿ ê cha̍p-chhit sè-kí So͘-kek-lân sèng-tô͘ kóng ê chi̍t kù ōe ū tông-kám, "Góa tùi pē tāng-tàⁿ lâi sêng-tíong." --- Alexander Smellie

Ēng si̍p-jī-kè tòng-chòe kóaiⁿ-á îan-tô͘ pang-chō͘,
M̄-sī khòaⁿ chòe pòan-kha-chi̍oh teh tòng-lō͘.

Nā-sī ēng chhìo-îong lâi gîa si̍p-jī-kè,
Ōe hō͘ pa̍t-lâng iu-chhîu pìan hoaⁿ-hí hó-kè.

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com