《台語荒漠甘泉（全羅版）》

"Tē it hó ê sū"

作者 陳清俊 翻譯

listen


Káu ge̍h jī-it (Káu ge̍h jī-cha̍p-it ji̍t)

"Góa chin-chìaⁿ khòaⁿ bān sū chòe sún-hāi, in-ūi góa li̍ah bat góa ê Chú Ki-tok Îa-so͘ chòe tē it hó." (Hui-li̍p-pí 3:8)

Hīan-chāi chìn-ji̍p chhiu-thiⁿ, chhân-hn̂g ê tīu-á í-keng se̍k, sī siu-koah ê cheh-kî, īa sī siu-koah ngó͘-kok ê lâng hoaⁿ-hí chhìuⁿ-koa, kap tīu-á ji̍p chhngg-khò͘ ê sî. Só͘-í lán lâi thiaⁿ sèng-keng tiong ê chit ê "ía-gōa pó-hùn." Sìn-sit sī án-ni: "Ài tit-ti̍oh o̍ah chīu ài seng ū sí. Bô ūi ka-kī ê seng-o̍ah hó-kè kap hēng-hok iu-lū. Ti̍oh tèng-sí tī si̍p-jī-kè ê, m̄-nā sī lí ê pháiⁿ hêng-ûi kap si̍p-kòan, īa ti̍oh tèng-sí chi̍t kóa hiah ê khòaⁿ-khí-lâi sī bô hāi koh chèng-tong ê mi̍h-kīaⁿ. Sīuⁿ beh kìu lâng, ài seng hi-seng ka-kī. Ài kiat chin chōe ké-chí, tāi-seng chiong ka-kī khǹg tī o͘-àm kap ko͘-to̍k ê tiong-kan.”

Thiaⁿ ti̍oh chiah ê kà-sī, góa ê sim lóng léng khì. Tān-sī chai chiah ê ōe sī chhut tī Îa-so͘ ê chhùi, góa chīu thê-chhíⁿ ka-kī, "lâi tn̂g-tn̂g tìam-tī I, ... í-ki̍p ū hūn I ê sīu-khó͘," (Hui-li̍p-pí 3:10) sī góa ke̍k-tōa ê te̍k-kôan kap êng-kngg. It-seng ū I chòe phōaⁿ sī súi bô pí. Góa īa thê-chhíⁿ ka-kī góa ê sīu-khó͘, sī beh chòe I ū lō͘-ēng ê khì-khū. Góa īa chai I ê Kok-kok-thaⁿ í-keng khui-hoe kiat-kó, chin hong-sēng, góa īa ǹg-bāng góa ê Kok-kok-thaⁿ ōe chhin-chhīuⁿ án-ni ū kiat-kó.

Seng ū thòng-khó͘ chiah tit hong-sēng, seng ū sí chiah tit ti̍oh o̍ah, che sī thian-kok ê kui-lē! --- tùi "be̍k-síong"

Tngg hoe-m̂ khui chhut hoe ê sî, lán sī-m̄-sī kóng hoe-m̂ sí khì ah?

Chhē I, tè I, kîu I, khò I,
I ōe sù hok bōe?
Thiⁿ-sài, sèng-jîn, sìn-tô͘, sian-ti,
Ìn kóng, "Ōe".

Ē-bīn sī chit síu si ê koa-phó͘ (chhîa ê sò͘-jī sī kē-im; kàng E tīau)

3 3 3 2 | 3 5 5 3, | 3 3 2 1 | 2 - - - |

5 67 1 7 | 1 23 4 3, | 2 - 2 - | 1 - - - |


附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com