《台語荒漠甘泉（全羅版）》

 | | | 轉寄

"Chhut tī Siōng-tè"

作者 陳清俊 翻譯 2009.02.01

listen

Jī ge̍h chhoe-it (Jī ge̍h it ji̍t)

"Iâ-hô-hoa án-ni kóng, in-ūi chit ê tāi-chì chhut tī Góa." (I Lia̍t-ông-kì 12:24)

Jîn-seng chin chōe sū put-jû-ì, sī Siōng-tè ê thiàⁿ àm-tiong lâi an-pâi. --- C.A. Fox

Góa ê kiáⁿ ah, kin-á-ji̍t ū chi̍t ê sìn-sit hō͘ lí. Tī lí ê hīⁿ-khang piⁿ sòe-sòe siaⁿ tùi lí kóng. Po̍k-hong ê hûn iā ōe hoat-chhut kng-liōng, lí só͘ kiâⁿ khi-khu ê lō͘ iā ōe piàn pîⁿ-tháⁿ. Chhiáⁿ lí kì tī sim-lāi, ià-siān tó lo̍h-khì khùn ê sî khǹg tī chím-thâu ē, chiū-sī chiah ê sū lóng "chhut tī Góa".

Lí kiám chai lí só͘ koan-sim ê, iā sī góa teh koan-sim, "hoān-tio̍h lín ê, sī hoān-tio̍h Góa ba̍k-chiu-tiong ê tông-chú." (Sat-ka-lī-a 2:8) "Góa khòaⁿ lí chòe pó-pòe, chòe chun-kùi," (Í-sài-a 43:4) Só͘-í góa ke̍k-tōa hoaⁿ-hí ài kà lí.

Góa ài lí chai, tng lí siū chhì-thàm ê sî, tùi-te̍k "chhin-chhiūⁿ kín-lâu ê hô-chúi," lâi, Chit ê sū sī ‘chhut-tī góa.’ Lí ê loán-jio̍k su-iàu góa ê le̍k-liōng, lí ê an-choân sī chāi-tī góa ūi lí lâi cheng-chiàn, té-khòng.

Lí ê chhù-kéng chin khùn-lân mah? Lí ê piⁿ-á lóng sī bōe thé-liōng lí ê lâng, in iā bô mn̄g lí ê ì-sù, chiū kā lí sak tī chi̍t pêng, m̄ chhap lí. Che iā sī "chhut-tī góa." Góa sī chiáng-koán khoân-kéng ê Siōng-tè. Lí tú-tio̍h chit-khoán tē-pō͘, m̄-sī ngó͘-jiân ê, sī góa hō͘ lí án-ni.

Lí kiám ū tùi góa kiû khiam-pi mah? Lí hiān-sî ê chhù-kéng chiū-sī ha̍k-si̍p khiam-pi siōng-hó ê sî. Lí ê khoân-kéng kap lí chiu-ûi ê lâng sī ēng lâi oân-sêng góa ê chí-ì.

Lí ū kim-chîⁿ būn-tê mah? Che iā sī "chhut-tī góa." Lí ê chîⁿ-châi la̍k tī góa ê chhiú, ài ha̍k-si̍p óa-khò góa, góa chiah ū bô-thêng ê kiòng-èng, hō͘ lí só͘ su-iàu ê it-chhè chhiong-chiok. (Hui-li̍p-pí 4:19) Góa beh ēng lí lâi chèng-bêng, bô lâng ōe kóng, "lín tī chit ê sū m̄-sìn Iâ-hô-hoa lín ê Siōng-tè;" (Sin-bēng-kì 1:32)

Lí ū iu-siong, hoân-ló mah? Che sī "chhut tī góa." Góa pún-sin "siū chōe-chōe khó͘-thàng, siông-siông tú-tio̍h iu-būn;" (Í-sài-a 53:3) Hō͘ lí bōe thang tit-tio̍h sè-kan ê an-ùi, hō͘ lí ōe choán-hiòng góa, thang tit-tio̍h "éng-oán ê an-ùi kap hó ê ǹg-bāng." (Ṳ Thiap-sat-lô-nî-ka 2:16) Lí hi-bāng ōe ūi góa chòe tōa sū, khiok in-ūi phòa-pīⁿ tó tī chhn̂g ni̍h. Che sī "chhut-tī góa", in-ūi lí bô êng, bô sî-kan lâi gióng-bōng góa, góa siūⁿ beh chiong chhim-ò ê chin-lí kà-sī lí. "Hiah ê kan-taⁿ khiā teh tán, iā sī chi̍t chióng sū-hōng." Góa ū chin-chōe úi-tāi ê kang-lâng, in ê sin-thé bōe-thang sū-hōng, khiok in chai ēng siōng-kiông ê bú-khì, le̍k-liōng, chiū-sī "kî-tó" lâi sū-hōng.

Kin-á-ji̍t góa chiong chi̍t-poe sèng-iû kau hō͘ lí, chhut-chāi lí beh ēng jōa-chōe. Góa ê kiáⁿ ah, chiong sèng-iû boah tī múi chi̍t ê sin khoân-kéng téng, boah tī múi chi̍t-kù siong lí ê ōe-gú téng, boah tī lí ê bô nāi-hoân téng, boah tī lí ê loán-jio̍k ê só͘-chāi. Lí nā chai hoân-sū "chhut-tī góa", thòng-khó͘ chiū bô khì lah. --- Laura A. Barter Snow

Kiù-chú kóng, "Che sī chhut-tī góa"
I oan sin lâi chim góa, kiâⁿ óa,
Chhōa lí ê sī thiàⁿ lí, kā lí sioh,
Thang nāi-sim tī góa chia an-hioh.
Thiⁿ-pē chai lí ê su-iàu,
Khó-lêng hiān-chāi m̄-chai, bōe-hiáu.
Bo̍h-tit ūi sit-khì ê mi̍h iu-siong,
Góa beh sù lí siōng-hó ê hūn-liōng.

Góa ēng ba̍k-sái lâi khún-kiû,
Chú ah, sià-bián góa, góa teh bo̍k-bo̍k-siû,
Góa kiâⁿ ê lō͘ bô kan-lân, oh-siū,
Sī tè Lí ê kha-pō͘ kiâⁿ, khan góa chhiú.
Múi chi̍t hāng sū lóng sī hó,
I ê un-hūi kàu góa kiû-thó,
Góa beh tōa-siaⁿ kóng-kò
"Siōng-tè ê lō͘ éng-oán sī siōng hó."


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com