《台語荒漠甘泉(全羅版)》

| | | 轉寄

"Bô bêng-pe̍k ê sū"

listen


Káu ge̍h jī-cha̍p (Káu ge̍h jī-cha̍p ji̍t)

"Góa kiám bô kā lí kóng, lí nā sìn, ōe khòaⁿ-kìⁿ Siōng-tè ê êng-kng mah?" (Iok-hān 11:40)


Má-tāi kap Má-lī-a bōe-tàng bêng-pe̍k in ê Chú teh chòe sím-mi̍h. In lóng tùi I kóng, "Chú ah, lí nā tī chia, góa ê hiaⁿ-tī chiū bōe sí." (Iok-hān 11:21,32) Chit-kù ōe pōe-āu chin-chiàⁿ ê ì-sù sī "Chú ah, goán bōe bêng-pe̍k lí iân-chhiân chiah kú chiah lâi, soah hō͘ lí só͘ thiàⁿ ê lâng sí-khì. Goán bōe bêng-pe̍k lí hō͘ chit ê iu-siong thòng-khó͘ lîm-kàu goán. Lí nā tī-teh, it-chhè ê sū chiū bōe hoat-seng, lí thài ōe bô kín-kín lâi? Hiān-chāi í-keng siuⁿ bān lah. In-ūi Lia̍p-sat-lō͘ í-keng sí sì-kang lah!" Tān-sī Iâ-so͘ ū chi̍t ê tōa tō-lí beh hôe-tap chiah ê būn-tê. I ê tiōng-tiám sī "Lín khó-lêng bô bêng-pe̍k, tān-sī góa kā lín kóng, lín nā sìn, chiū beh bêng-pe̍k."

A-pek-la̍h-hán bô bêng-pe̍k Siōng-tè ūi-hô ài i chiong kiáⁿ lâi hiàn-chè, tān-sī i siong-sìn Siōng-tè. Tng i khòaⁿ tio̍h i sim-ài ê kiáⁿ koh hôe tńg lâi sin-piⁿ, i khòaⁿ-tio̍h Siōng-tè ê êng-kng. Mô͘-se bô bêng-pe̍k Siōng-tè ūi-hô ài i tī khòng-iá khiā-khí sì-cha̍p nî kú. Tān-sī i iā siong-sìn Siōng-tè, āu-lâi i kìⁿ-tio̍h Siōng-tè kiò i chhōa Í-sek-lia̍t thoat-lī chòe Ai-ki̍p ê lô͘-lē kang-chok.

Iok-sek bô bêng-pe̍k i ê hiaⁿ-ko ūi-sím-mi̍h ge̍k-thāi i, hit ê kan-chà Ai-ki̍p hū-lú ūi-sím-mi̍h chòe ké ê kan-chèng hām-hāi i, á-sī ūi-sím-mi̍h ài siū hiah chōe nî ê bô kong-pêng ê kaⁿ-kìm. Tān-sī i siong-sìn Siōng-tè, kàu bé i khòaⁿ-tio̍h só͘ tòa lâi ê êng-kng. Iáu-ū Iok-sek ê lāu-pē Ngá-kok, i bô bêng-pe̍k ūi-hô Siōng-tè ēng kî-koài ê hong-sek chiong Iok-sek tùi i sin-piⁿ tòa cháu. Chóng-sī āu-lâi i tùi Iok-sek ê bīn khòaⁿ-tio̍h Siōng-tè ê êng-iāu, in-ūi hit-sî Iok-sek í-keng chòe chi̍t-ūi tōa kun-ông hoat-ló ê chái-siòng, m̄-nā chín-kiù liáu ka-kī, iā chín-kiù liáu choân-kok ê kok-bîn.

Bô-tiāⁿ-tio̍h tī lí ê sìⁿ-miā nih iā ū chin-chōe sū lí ōe hoâi-gî Siōng-tè. Lí khó-lêng beh án-ni kóng, "Góa bô bêng-pe̍k ūi-hô Siōng-tè hō͘ góa só͘ thiàⁿ ê lâng kè-sin, sí-khì. Góa bô bêng-pe̍k Siōng-tè ūi-hô hō͘ khùn-khó͘ chhim-hoān góa. Góa bô bêng-pe̍k Siōng-tè ūi-hó chhōa góa kiâⁿ che oan-oan khiau-khiau ê sió-lō͘. Góa bô bêng-pe̍k góa chiah-nih chiu-choân ê kè-ōe thài ōe sit-pāi. Góa bô bêng-pe̍k góa só͘ kín-kip su-iàu ê chiok-hok, thài ōe chiah-nih bān, m̄ lâi."

Chhin-ài ê pêng-iú, lí m̄-bián oân-choân bêng-pe̍k Siōng-tè ê an-pâi. I iā bô kî-thāi lí ê bêng-pe̍k. Chhin-chhiūⁿ lí bô kî-thāi lí ê kiáⁿ-jî bêng-pe̍k lí ūi in só͘ chòe ê it-chhè, lí chí-sī ài in siong-sìn lí chiū hó. Ū chi̍t ji̍t lí iā ōe tī lí só͘ bô bêng-pe̍k ê sū khòaⁿ-tio̍h Siōng-tè ê êng-kng. --- J.H.M.

Lán nā chiong sìⁿ-miā ê mn̂g phah khui,
Tī lāi-bīn khòaⁿ-tio̍h Siōng-tè ê chok-ûi,
Chiū bêng-pe̍k só͘-ū ê hoâi-gî kap hoán-tùi,
Chai múi chi̍t ê ò-pì lóng ū i ê só-sî saⁿ sûi.

Tān-sī, sim-ài ê, m̄-sī hiān-chāi, sim pàng hō͘ khui,
Siōng-tè ê kè-ōe ná pek-ha̍p-hoe ê hoe-lúi,
M̄-thang kā hoe-m̂ ēng hong-hoat ngī chhui,
Sî nā kàu hoe chū-jiân khui kàu chin súi.

Nā ū nāi-sim, chiū ōe kàu bí-hó ê tē,
Ià-siān ê kha thang hioh, thang thǹg khì ôe,
Kàu hit-sî, lán beh bêng-pe̍k só͘ ū it-chhè,
Góa beh kóng, "Siōng-tè si̍t-hêng siōng-hó ê kè-ōe."



附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.com