《台語荒漠甘泉(全羅版)》

| | | 轉寄

"Iâ-so͘ iáu chhōa lō͘"

listen


Chhit ge̍h sam-it (Chhit ge̍h saⁿ-cha̍p-it ji̍t)

"I chiū chiàu i sim-lāi ê chèng-ti̍t iúⁿ-chhī in; Koh ēng i khiáu-biāu ê chhiú ín-chhōa in." (Si-phian 78:72)

Tng lí m̄-chai beh soán tó chi̍t tiâu lō͘ ê sî, tio̍h hō͘ Sèng-lêng ín-chhōa, kiû I koaiⁿ só͘ ū ê lō͘ mn̂g, chí lâu hit tiâu chèng-khak ê lō͘ mn̂g khui. Kè-sio̍k kiâⁿ, sui-jiân bô Siōng-tè ti̍t-chiap ê chí-sī, in-ūi I kiâⁿ tī lí ê thâu-chêng, ū-sî ōe koaiⁿ lí só͘ beh ji̍p-khì ê mn̂g, chóng-sī, bô gōa-hn̄g, lí beh khòaⁿ-kìⁿ lēng-gōa chi̍t ê mn̂g ūi lí lâi khui, thang kiâⁿ ji̍p-khì. Lí beh khòaⁿ tio̍h ki-hōe ê hô-liû, pí lí ê sióng-siōng khah khoah, lí thang khui pâng thang tī chit ê hô sái-chûn, in-ūi chit ê hô thàu kàu tōa hái.

Siōng-tè siông-siông ēng khoân-kéng lâi chhōa lán jîn-seng ê lō͘-tô͘. Ū-sî, lán só͘ teh kiâⁿ ê lō͘ lóng-chóng that sí-sí lah. Chóng-sī tī ì-gōa ê chi̍t ê sió-sió ê tāi-chì hoat-seng, pa̍t lâng bô kám-kak tio̍h, tī ū sìn-sim ê lâng ēng chin lāi ê gán-kong ōe khòaⁿ chhut i ê tiōng-iàu-sèng. Chiah ê sū siông-siông ēng bô siāng-khoán ê hong-sek lâi hôe-èng lán ê kî-tó. Che m̄-sī chháu-tú-khám, sī Siōng-tè chioh khoân-kéng lâi chí-sī lán. Ēng khoân-kéng kā lán khui chhut chi̍t tiâu lō͘, lán ná hó-táⁿ hiòng chêng kiâⁿ, ná bêng-hián, ōe ná tit koh-khah chōe ê chí-sī. Chhin-chhiūⁿ àm-sî khui chhia, ná óa-kūn to͘-chhī, khòaⁿ-kìⁿ ná khah chōe ê teng-hé chi̍t-iūⁿ. --- F.B. Meyer Ká-sú lí kiû Siōng-tè ín-chhōa, I ōe ín-chhōa lí. Tān-sī lí nā m̄ siōng-sìn I, pòaⁿ-sìn pòaⁿ-gî ê sî, m̄-bián siáu-siōng I ōe an-ùi lí, ōe kā lí ê bo̍k-piau chí-sī lí. Nā-sī lí siong-sìn I, tī I ê chí-sī, lí thang tōa-táⁿ hiòng chêng, I ōe chhōa lí kiâⁿ lo̍h-khì. --- Horace Bushnell

Sió-chûn hoâiⁿ-kè po̍k-hong tōa-éng ê hái,
Tōa-éng siàu lâi, kiông-hong chhè lâi,
O͘-àm tiong, ū àm-chio̍h gûi-hiám tē-kài,
Só͘-ū chiah ê, Tōa chûn-tiúⁿ lóng-chóng chai.

Ū-sî àm-bū lâi, só͘-ū teng-hé lóng hoa khì,
M̄-chai che sió-chûn beh tó-ūi khì,
Tn̂g-tn̂g ê àm-mî, bô thang hioh ê sî,
Tōa chûn-tiúⁿ bêng-pe̍k góa khak-sìn ê sim-ì.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.org