《台語荒漠甘泉（全羅版）》

 | | | 轉寄

"Sèng-lêng chhiong-moa"

作者 陳清俊 翻譯 2011.08.07

listen


Poeh ge̍h chhoe-chhit (Poeh ge̍h chhit ji̍t)

"Kî-tó soah, chū-chi̍p ê só͘-chāi tōa tín-tāng; chèng-lâng lóng siū Sèng-sîn chhiong-móa, hó táⁿ kóng Siōng-tè ê tō-lí. Sù-tô͘ ēng tōa koân-lêng kan-chèng Chú Iâ-so͘ ê koh-oa̍h; chèng-lâng iā tit-tio̍h tōa un-tián." (Sù-tô͘ hêng-toān 4:31,33)

Tī cha̍p-poeh sè-kì bé, cha̍p-káu sè-kì chho͘, ū chi̍t ê Ōe-su (Welsh) ê bo̍k-su, miâ kiò-chòe Í-būn-su (Christmas Evens), tī i ê ji̍t-kì ū án-ni siá:

“Tī bó͘ chi̍t ê lé-pài ji̍t ē-po͘, góa khiâ bé khì hù iok, hut-jiân tī chi̍t ê phian-phiah ê lō͘-tiong, góa ê sim-lêng chin ùi-kôaⁿ. Góa chiū lo̍h bé, chiong bé pa̍k teh chhiū-á piⁿ, chhē chi̍t ê bô lâng kàu ê só͘-chāi, tī hia hoân-ló teh kiâⁿ-lâi kiâⁿ-khì. Kiám-thó ka-kī ê it-seng. Tī Siōng-tè ê bīn-chêng, góa siong-sim, sit-sîn, iu-būn teh thèng-hāu, iok ū saⁿ tiám-cheng kú. Chòe-āu góa kám-kak tio̍h ū I sià-bián ê thiàⁿ hō͘ góa sóng-khoài khí-lâi, góa iā tiông-sin tit-tio̍h Sèng-lêng ê koàn-ak.

Ji̍t-thâu teh-beh lo̍h soaⁿ, góa kiâⁿ tò-tńg-khì hit tiâu lō͘, chhē tio̍h bé, khiâ bé khì hù iok. Tē jī ji̍t góa tī soaⁿ-phiâⁿ ǹg chi̍t tōa tīn ê lâng káng-tō, chhiong-móa liáu sin ê le̍k-liōng, hùn-heng ê hé chiū khai-sí thòaⁿ khui. Chit ê éng-hióng ta̍t kàu choân Ōe-su (Welsh).”

Che kì-sū kái-soeh “têng-thâu-siⁿ” ê tōa tāi-chì, iā sī chho͘-tāi sìn-tô͘ ê piau-kì. -- “Tng lín sìn ê sî, ū siū-tio̍h Sèng-lêng bô?” (Sù-tô͘ hêng-toān 19:2)

Oh, Sèng-lêng chhiong-móa ê seng-oa̍h, lí ū bô?
Lí ê lêng ū chhiong-móa Sèng-lêng bô?
Chòe chi̍t ê Bān-ông ê kiáⁿ-jî, lí ū tit khòaⁿ-siú bô?
I ū tī lí ê lêng chiáng-koân bô?
Tī lí ê sin-chiūⁿ ū hián chhut I ê hêng-siōng bô?

I ū, ná hái-éng, siông-siông chheng-khì lí ê lêng bô?
Siōng-tè ê lêng ū tī lí ê lāi-bīn bô?
I ū hō͘ lí seng-oa̍h ū ì-gī, bô-hoân bô-ló bô?
I ū ín-chhōa lí, chiok-hok lí, thiaⁿ lí ê kî-tó bô?
Lí ū sî-sî tòa Chú ê hí-lo̍k, kàu ta̍k só͘-chāi bô?

I ū sî-sî khek-khek tī lí ê sin piⁿ bô?
I ū hō͘ lí lêng-le̍k, kap lí saⁿ-kap tī-teh bô?
Lí ū choân-sim khò Si̍p-jī-kè ê un-tián kap le̍k-liōng bô?
I ū kà-sī lí, hō͘ lí sū-sū tit sêng-kong bô?
I ū kan-chèng êng-iāu ê Sèng-kiáⁿ hō͘ lí bô?

I bat ēng thiⁿ-nih ê hé chheng-khì lí bô?
Lí ū chiong I chòe tāi-seng, choân-sim thiàⁿ I bô?
Lí ū kam-goān sū-hōng I, ūi I lâi hi-seng bô?
Lí ê lim-chia̍h ū ha̍p tī I ê chí-ì bô?
Lí ū chīn-la̍t phah-piàⁿ chun-siú I ê ho͘-tiàu bô?

Lí ê chū-su, tham-sim, I ū kā lí tháu-pàng chhut lâi bô?
Lí ū chhiat-chhiat khì an-ùi hiah ê su-iàu pang-chān ê hiaⁿ-tī bô?
Chòe Ki-tok ê cheng-peng, lí ū kú-tn̂g kàu-gia̍h ê lêng-le̍k bô?
Tī Chú ê ǹg-bāng, Lí ū khak-sìn, éng bōe piàn bô?
Lí ū nāi-sim, khiam-pi, un-jiû kap sèng-kiat bô?

Khó-lêng oh! Lí í-keng ū chhiong-móa Sèng-lêng ê seng-oa̍h,
Siōng-tè ê êng-kng tī lí ê lêng lāi-bīn éng-tòa,
Lí sìⁿ-miā ê hong-hō͘ lóng beh soah,
Lí it-seng ū Siōng-tè ê lêng chhiong-móa,
Tī lí ê lāi-bīn, Chú ê chí-ì éng-oán-oa̍h.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org