《台語荒漠甘泉(全羅版)》

| | | 轉寄

"Chhì-giām-so͘"

listen


Poeh ge̍h jī-poeh (Poeh ge̍h jī-cha̍p-poeh ji̍t)

“I tī-hia, ūi in tēng lu̍t-lē hoat-tō͘, tī-hia chhì-giām in." (Chhut-Ai-ki̍p-kì 15:25)

Góa bat chham-koan chi̍t keng kǹg-thih kang-tiûⁿ. In ū chin-chōe chhek-giām kǹg-pán ê kok chióng gî-khì kap siat-pī. Ū kǹg-phìⁿ í-keng siū teh oan khì, téng-bīn piau-chhut i ōe sêng-siū ê ap-le̍k; ū-ê siū khiú tn̄g, téng-bīn piau-chhut i ê hān-tō͘; iā ū-ê siū ko-ap géng-kè, iā niû chhut i siū-ap ê le̍k-tō͘. In-ūi ū chiah ê chhì-giām, só͘-í múi chi̍t tè kǹg-thih ēng lâi chō chûn, khí chhù, pho͘ kiô ê sî, in lóng chai chiah ê kǹg-thih ōe thang sêng-siū jōa-tōa ê ap-le̍k hān-tō͘.

Siōng-tè ê kiáⁿ-jî iā sī án-ni. I bô ài lán chhin-chhiūⁿ po-lê á-sī hûi-á chin chhè, chhùi-jio̍k, iông-ì phòa, I thoàn-liān lán chòe hó-kǹg, ōe sêng-siū chin-tōa ê ap-le̍k kap khiú-tō͘, teh lóng bōe chhùi khì.

Siōng-tè bô ài lán chhin-chhiūⁿ un-sek lāi ê hoe-chháu, tòng bōe tiâu hong-chhe hō͘-ak. I ài lán chhin-chhiūⁿ sek-gōa ê chhiūⁿ-chhiū, tòng-ōe-tiâu tōa-hong po̍k-ú. I iā bô ài lán chhin-chhiūⁿ soa-tui, hō͘ hong chhe-lâi chhe-khì, bô tiāⁿ-tio̍h ê só͘-chāi, I ài lán chhin-chhiūⁿ tōa giâm-chio̍h, tòng-ōe-kè po̍k-hong-hō͘ ê tá-kek. Ūi-tio̍h beh hō͘ lán chiâⁿ mi̍h, I ōe tòa lán kàu I ê chhì-giām tiûⁿ. Siū-khó͘ khak-si̍t sī I tùi lán sìn-sim ê chhì-giām, lán tiong-kan ū chin-chōe lâng lóng ū chhin-sin ê thé-giām. --- J.H.M.

Lí-lūn sìn-sim, “kóng khah khoài, chòe chiah chai.” Siōng-tè khǹg lán tī I ê khó͘-lān, ko-un ê e-á lāi, sī beh chiong cha̍p-chit tùi n̂g-kim thiu-chhut-lâi, chhì-giām lâi thê-koân kim ê sûn-tō͘. Tng lán keng-kè po̍k-hong tōa-hō͘, koâiⁿ-lōng tōa-hái āu, koh-khah ōe thé-giām Iâ-so͘ pó-kùi ê tông-chāi lâi hoaⁿ-hí. Lêng-khó ū Iâ-so͘ ê tī-teh tú-tio̍h po̍k-hong-hō͘, khah-iâⁿ tī pêng-sūn kiâⁿ-chûn bô Iâ-so͘ tông-chāi ê ji̍t-chí. --- J.R. Macduff

Nā m̄-sī ū Siōng-tè ēng khó͘-lān hō͘ lán ê sìⁿ-miā sêng-tióng, lán m̄-chai ōe piàn-chòe sím-mi̍h khoán?


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.org