《台語荒漠甘泉(全羅版)》

| | | 轉寄

"Tióng-chìn"

listen

Káu ge̍h saⁿ-cha̍p (Káu ge̍h saⁿ-cha̍p ji̍t)

"I ûi-se̍h i, khòaⁿ-kò͘ i, ... koh chhin-chhiūⁿ eng-chiáu lā i ê siū, tī eng-á téng-bīn ia̍t i ê si̍t, thí-khui si̍t-kó͘ lâi sîn i, chài i tī i ê si̍t-kó͘. Chí-ū Iâ-hô-hoa chhōa i, bô pa̍t ê siōng-tè kap i tī-teh." (Sīn-bēng-kì 32:10-12)

Lán choân-lêng ê Siōng-tè, chhin-chhiūⁿ tōa eng-chiáu, pó-hō͘ tài-niá i ê sòe-chiah eng-á, chhōa i kàu soaⁿ-gâi téng, sak i lo̍h khàm, án-ni chòe sī ài eng-á hoat-chhut i í-chêng só͘ m̄-chai ōe pe ê lêng-le̍k, chit ê pe ê lêng-le̍k hō͘ i thang it-seng hióng-siū an-choân kap khoài-lo̍k. Chóng-sī nā-sī ū gûi-hiám, i ōe kín-kín pe kàu eng-á ê ē-bīn ēng i tōa si̍t-kó͘ sîn khí-lâi. Siōng-tè chhōa I ê kiáⁿ-jî tī hui-siông ê khùn-kéng tiong, iā sī án-ni, lán thang khò I tit chín-kiù. --- tùi "Sèng-lī ê koa"

I chiong tàⁿ hē tī lí sin chiūⁿ, iā ōe chiong I ê keng-kah chhiú-kut, hē tī lí ê ē-bīn.

Í-chêng ū chi̍t châng sòe-sòe ê chhiū siⁿ tī tōa siōng-chhiū kha, siū siōng-chhiū ê tì-ìm. Sòe châng chhiū chin hoaⁿ-hí ū tōa chhiū ê pó-hō͘, kap an-chēng. Chóng-sī chit châng sió chhiū m̄-chai khah tōa ê un-hūi beh lîm-kàu i lah.

Ū chi̍t ji̍t, chi̍t ê chhò-chhâ lâng tòa pó͘-thâu kàu tī chi̍t ê chhiū-nâ, chiong hit châng tōa siōng-chhiū phut tó tī tē bīn. Sió chhiū khai-sí khàu kóng, góa ê jia-phè hō͘ lâng the̍h khì lah. Hiān-chāi nā khí tōa hong, á-sī tōa-hō͘, chiū ōe chiong góa liân-kun khau khí-lâi.

Pó-hō͘ sió chhiū ê thiⁿ-sài tùi i kóng, "M̄-sī án-ni, hiān-chāi ji̍t-thâu ōe chiò tio̍h lí, hō͘ ōe ak tio̍h lí, pí í-chêng ke chiâⁿ chōe pē. Lí oeh-oeh ê seng-khu beh tōa-châng, tōa kàu chin súi. Lí tī ìm-iáⁿ ē bōe hoat-io̍k ê hoe-m̂ beh tī ji̍t-kng ē khui chhut chhiò-iông. Lâng beh gōng-ngia̍h kóng, khòaⁿ ah, hit châng chhiū tōa kah hiah tōa châng ah! Kè-khì hoaⁿ-hí ê jia-phè tû-khì āu, tióng-tōa kàu chiah tōa chiah súi!"

Chhin-ài ê sìn-tô͘, lín kiám bêng-pe̍k Siōng-tè ūi-hô chiong lín ê an-e̍k, te̍k-koân tû-khì sī beh hō͘ lín piàn chòe kian-kiông ê ki-tok-tô͘ mah? Lín kiám bêng-pe̍k Siōng-tè ūi-hô hùn-liān lâng chòe I ê cheng-peng, bô hō͘ in tó tī sóng-khoài ê bîn-chhn̂g, khiok hō͘ in chòe kan-khó͘ ê hêng-kun mah? I kiò in kiâⁿ kè sió khoe, siû kè tōa hô, pôaⁿ kè koâiⁿ niá, pē iu-siong tîm-tāng ê pōe-pau tiông-hok ê tn̂g-kî hêng-kun. Che sī hùn-liān cheng-peng ê hong-hoat. M̄-sī hō͘ in chhēng súi-súi ê kun-ho̍k, tī iâⁿ-mn̂g gōa lâi-hôe tōa pō͘ kiâⁿ, á-sī khì kong-hn̂g hông him-sióng in ê ui-hong. Siōng-tè ê cheng-peng chí ū tī chiàn-tàu tiong sán-seng, bōe thang tī thài-pêng tiong liān chhut-lâi. Lán khó-lêng thang chè-chō cheng-peng ê kok-chióng châi-liāu, tān-sī ài in piàn-chòe chin-chiàⁿ ê bú-sū, chiū in su-iàu phīⁿ-tio̍h hé-io̍h bī, tī chhèng-chí pe-kè, chà-tôaⁿ la̍k-lo̍h po̍k-chà tiong siū hùn-liān, kan-taⁿ tī su-sek hô-pêng tiong ê seng-oa̍h sī bōe-ēng-tit.

Só͘-í chhin-ài ê sìn-tô͘, che ōe thang soat-bêng lí ê chêng-hóng mah? Chú sī-m̄-sī hoat-hiān lí ê châi-lêng lâi pôe-ióng? I sī-m̄-sī ke-thiⁿ lí sin chiūⁿ cheng-peng ê phín-chit, chiong lí sak hiòng chiàn-tàu ke̍k-lia̍t ê só͘-chāi mah? Lí kiám bōe thang chiong I só͘ sù ê it-chhè un-sù kap bú-khì ēng lâi tit-tio̍h sèng-lī mah? --- Charles H. Spurgeon


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.org