《台語荒漠甘泉（全羅版）》

 | | | 轉寄

"Khó͘-lān tiong ê an-chēng"

作者 陳清俊 翻譯 2012.11.04

listen


Cha̍p-it ge̍h chhoe-sì (Cha̍p-it ge̍h sì ji̍t)

"góa tī Ka-pa-lô͘ ê hô-piⁿ, siū-lia̍h ê lâng ê tiong-kan; hit-sî thiⁿ khui. Góa khòaⁿ-kìⁿ Siōng-tè ê īⁿ-siōng. ... Iâ-hô-hoa ê chhiú hē tī i ê sin-chiūⁿ." (Í-se-kiat 1:1-3)

Bô ū sím-mi̍h sî pí "siū-lia̍h" ê sî ê sèng-keng ōe-gú khah pó-kùi. Si-phian án-ni kóng, "goán bat chē tī Pá-pí-lûn ê hô-piⁿ," (Si-phian 137:1) kám-khài ê si-koa. Iā khòaⁿ tio̍h Chú chhōa goán tùi siū-lia̍h tiong kiù chhut-lâi ê hí-lo̍k, "Iâ-hô-hoa chhōa hiah ê siū-lia̍h ê lâng tò-tńg lâi, ... chhin-chhiūⁿ lâm-hng ê khoe-chúi koh lâu." (Si-phian 126:1, 4)

Bat keng-le̍k kè tōa khùn-khó͘ ê lâng, chiū chin oh chiong i kap sèng-keng pun-khui. Chāi pa̍t-lâng khòaⁿ sèng-keng kap kî-thaⁿ ê chu bô sím-mi̍h hun-pia̍t, chāi i khòaⁿ, chiū choân-jiân ê bô siâng. Tng i ba̍k-sái tih tī sèng-keng só͘ siá ê keng-le̍k ji̍t-kì, hiah ê jī chí-ū i khòaⁿ ōe tio̍h, thong-kè chiah ê jī-ia̍h, i hôe kàu Siōng-tè tiān-īⁿ ê thiāu-á, "kàu Í-lîm, tī-hia ū ... chúi-chôaⁿ, ... chó-chhiū." (Chhut-ai-ki̍p-kì 15:27) Múi ki thiāu, múi châng chhiū, tùi i lóng-sī i sìⁿ-miā tiōng-iàu sî-kî ê kì-ek.

Siūⁿ tio̍h lán siū-lia̍h ōe tit hó-chhù, lán ài chiap-siū chit ê chêng-sè, chīn-liōng lī-iōng i. Ūi tio̍h lán sit-lo̍h á-sī tùi lán sin-chiūⁿ chhiúⁿ khì ê mi̍h hoân-ló, pēng bōe kái-siān lán ê chhù-kéng, hoán-tńg ōe chó͘-chí lán kái-siān só͘ chhun ê mi̍h. Lán ná cheng-chat, khún-tîⁿ tī lán ām-kún ê soh chiū ná ân.

Siâng-khoán, phî-khì bái ê bé siūⁿ beh ka-kī cheng-thoat bé-soh, chí ōe chiong ka-kī lek-sí. Ū-la̍t ê cheng-siⁿ siūⁿ beh chōaⁿ-lo̍h ām-kún ê kê, chí ōe siong tio̍h ka-kī ê keng-kah. Lâng-lâng lóng chai cha̍p-poeh sè-kí Eng-kok bo̍k-su kiam chok-ka, Laurence Sterne, ê phì-jū. Kóng, chi̍t-chiah pe̍h-thâu-khok-á kap chi̍t-chiah kim-si-chhiok siū koaiⁿ tī lông-á lāi. Pe̍h-thâu-khok-á cheng-chat beh pe chhut-khì, chiū siong tio̍h i ê si̍t, iáu-sī koaiⁿ teh hoah kóng "góa bōe-tàng chhut-khì, góa bōe-tàng chhut-khì." Kim-si-chhiok an-chēng khiā tī chhâ téng, chhiùⁿ koa, pí tī gōa-bīn chū-iû pe ê hûn-chhiok só͘ chhiùⁿ ê koa khah hó thiaⁿ.

Chai-lān lîm-kàu lán, pēng bô it-tēng sī bái, thê-chhíⁿ lán ōe má-siōng jia̍t-jia̍t ǹg Siōng-tè kî-tó. Tōa-hō͘ tiong tī chhiū kha bih hō͘, bô it-tēng ōe khòaⁿ-tio̍h chúi-kó tī chhiū-téng. Lán cháu ǹg Siōng-tè, tī I ê si̍t-ē pì-ìm, tī hia lóng ōe chhē tio̍h koh-khah chōe só͘ m̄-bat khòaⁿ-kè, m̄-chai ê mi̍h-kiāⁿ.

Siōng-tè chiah-tio̍h khó-giām kap khó͘-lān chiong I sin ê khé-sī sù hō͘ lán. Chhin-chhiūⁿ Ngá-kok, lán ài hoâiⁿ-kè "Nga-po̍k ê tō͘-thâu" chiah ōe kàu Piān-í-lī, (Chhòng-sè-kì 32:22, 32) tī hia i kap Chú sio-ián, iā siū I chiok-hok, thang khoa-kháu kóng, "Góa tng thâu tùi-bīn kìⁿ-tio̍h Siōng-tè, góa ê sìⁿ-miā iáu tit-tio̍h pó-choân." (Chhòng-sè-kì 32:30) Chiong chit ê kò͘-sū piàn-chòe lí ê keng-le̍k, chhin-ài siū-lia̍h ê lâng, Siōng-tè ōe hō͘ lí "mî-sî chhiùⁿ-koa," (Iok-pek-kì 35:10) iā ōe hō͘ lí ê "sí-ìm piàn-chòe chá-khí-sî." (A-mô͘-sū 5:8) --- Nathaniel William Taylor

Sūn-ho̍k Siōng-tè ê sèng chí-ì, chiū ū siōng nńg ê chím-thâu thang khòa, an-bîn.

Góa ê sìⁿ-miā, góa ê pâng-keng,
Chhiong-móa khòaⁿ bōe-tio̍h ê kong-êng.
Hō͘ góa tī hùn-tàu tiong tìn-chēng,
Hō͘ góa sim tī tang-thiⁿ iáu chhiⁿ-leng-leng,
Tng po̍k-hong-hō͘ sàu tī chiu-ûi khoân-kéng,
Èng-ún ê chiáu iáu chhiùⁿ-koa tī chhiū téng.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org