《台語荒漠甘泉（全羅版）》

 | | | 轉寄

"Chhì-liān"

作者 陳清俊 翻譯 2013.02.03

listen


Jī ge̍h chhoe-saⁿ (Jī ge̍h saⁿ ji̍t)

"Sèng sîn chek-sî pek I khì khòng-iá." (Má-khó 1:12)

Siōng-tè ēng chin kî-koài ê hong-sek lâi piáu-sī I ê hoaⁿ-hí. "Chek-sî" sī sím-mi̍h tāi-chì lah, sī tī "thiⁿ li̍h-khui, Sèng-sîn chhin-chhiūⁿ chíⁿ-á kàng-lîm tī I ê téng-bīn;" koh ū Siōng-tè ê chiok-hok kóng, "Lí sī góa só͘ thiàⁿ ê Kiáⁿ, góa hoaⁿ-hí lí." (Má-khó 1:10-11) Che sī chin bô pêng-siông ê keng-giām.

Góa ê lêng ah, lí iā ū chit khoán ê keng-giām. Lán tī siōng hoaⁿ-hí khoài-lo̍k ê sî, hut-jiân siak lo̍h tī sit-bāng, sit-chì tiong. Cha-hng lí iáu sī pe tī khong-tiong, tōa-siaⁿ chhiùⁿ koa; kin-á-ji̍t, lí ê si̍t siu khí-lâi, lí ê koa-siaⁿ bô khì ah. Tiong-tàu, Siōng-tè chhiò-chhiò ū ji̍t-kng chiò lí, àm-sî, lí tī hong-iá hoat siaⁿ kóng, "góa ê tō-lō͘ ún-ba̍t tī Iâ-hô-hoa." (Í-sài-a 40:27)

Góa ê lêng ah, chit chióng ê tōa choán-piàn pēng m̄-sī put-chèng-siông. Lí kiám ū siūⁿ tio̍h "Chek-sî" sī an-ùi ê jī-gán mah? Ūi sím-mi̍h tī chiok-hok āu, hut-jiân khí piàn-hòa? Goân-lâi, che chiū-sī chi̍t liân-chhoàn chiok-hok ê hong-sek. Siōng-tè ê kng chiò, sī hùn-liān lí ōe sek-èng jîn-seng ê khòng-hān, Khek-se-má-nî, kap Kok-kok-thaⁿ ê khó͘-lān. I thê seng lí kàu khah koân ê kéng-kài, sī cheng-ka lí ê le̍k-liōng, thang phài lí ji̍p tī o͘-àm, pang-chān hiah ê sit-lo̍h, su-iàu pang-chān ê lâng.

Lâng pēng m̄-sī chhut-sì chiū ōe sek-èng khòng-iá ê seng-oa̍h. Ài ū keng-le̍k tio̍h "kè Iok-tàn hô" ê pó-kùi keng-giām, chiah ta̍t tit tī khòng-iá ê seng-oa̍h. Chí ū Jîn-chú Iâ-so͘ ê īⁿ-siōng ê chong-pī, lí chiah ōe kham-tit hū-khí Sèng-lêng ê kau-thok. Iā chí ū Chú Iâ-so͘ siū-sóe só͘ tit ê êng-kng, chiah ōe tòng tit khòng-iá sì-cha̍p ji̍t ê iau-gō. --- George Matheson

Chiok-hok liáu-āu chiū ū cheng-chiàn.

Chhì-liān sī hong-hù sio̍k-lêng ê sū-gia̍p, sī chin te̍k-pia̍t ê sî-chūn. Chhì-liān sī ná tē-ge̍k ê le̍k-liōng lóng pàng chhut lâi hoán-tùi lí, sī ná chhin-chhiūⁿ lán ê lêng-hûn hām-lo̍h tī lô-bāng tiong. Lán ài chai Siōng-tè ín-chún mô͘-kúi ê chhiú giú lán. Chóng-sī lán khak-sìn chit ê sî-khek lóng sī hō͘ lán tit sèng-lī chòe kiat-kio̍k. Kìⁿ-nā chiong lêng-hûn kau-thok tī Siōng-tè ê lâng lóng beh án-ni tit sèng-lī. Chhì-liān liáu-āu ōe kiat chèng-gī kap hô-pêng ê ké-chí. (Hi-pek-lâi 12:11), iā beh ū saⁿ-cha̍p pē, chi̍t-pah pē ê siu-sêng. (Má-thài 13:23) --- Aphra White


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org