《台語荒漠甘泉（全羅版）》

 | | | 轉寄

"Pek-chhiat kî-tó"

作者 陳清俊 翻譯 2007.12.30

listen

Cha̍p-jī ge̍h saⁿ-cha̍p (Cha̍p-jī ge̍h saⁿ-cha̍p ji̍t)

"Tùi án-ni Pí-tek lâu tī kaⁿ-ni̍h; to̍k-to̍k kàu-hōe thòe i chhiat-chhiat kiû Siōng-tè." (Sù-tô͘ hêng-toān 12:5)

Pí-tek tī kaⁿ-nih thèng-hāu siū chhù sí, kàu-hōe tī lâng ê hong-bīn bô lêng-le̍k, á-sī éng-hióng-la̍t lâi kiù i. Tē chiūⁿ bô pang-chān i ê hong-hoat, tān-sī pang-chān thang tùi thiⁿ nih lâi tit-tio̍h. Kàu-hōe ūi i hé-jia̍t khún-kiû ê kî-tó. Siōng-tè phài chi̍t ê thiⁿ-sài, "thiⁿ-sài tah Pí-tek ê hia̍p-ē, kiò i chhíⁿ." (Sù-tô͘ hêng-toān 12:7) Jiân-āu thiⁿ-sài chhōa i "keng-kè tē it kap tē jī kò͘-siú ê só͘-chāi, kàu thàu siâⁿ ê thih mn̂g; hit ê mn̂g ūi-tio̍h in ka-kī khui;" (Sù-tô͘ hêng-toān 12:10) Pí-tek tit-tio̍h chū-iû.

Tī lí ê sìⁿ-miā khó-lêng ū bó͘-chióng ê thih-mn̂g tòng lí ê lō͘. Chhin-chhiūⁿ tī lâng-á lāi ê chiáu siông-siông cheng lâng-á koaiⁿ, che m̄-nā bōe kái-koat būn-tê, hoán-tńg hō͘ lí phî-lô ià-siān. Tī chia lí thang o̍h ê pì-koat, chiū-sī siong-sìn kî-tó. Tán lí kiâⁿ kàu thih-mn̂g piⁿ ê sî, ōe chhin-chhiūⁿ Pí-tek chi̍t-iūⁿ, thih-mn̂g chū-tōng ka-kī khui lah.

Lí nā o̍h tio̍h chá-kî kàu-hōe hit-iūⁿ tī "lâu-téng pâng" nih ê kî-tó, lí beh chat-séng chin-chōe ê cheng-le̍k, kap chōe-chōe ê kan-khó͘ sit-bāng. Lí nā o̍h tio̍h che kî-tó, sī ēng Siōng-tè ê sìn-sim m̄-sī ēng lí ê sìn-sim lâi kî-tó, bōe thang khek-ho̍k ê khùn-lân ōe siau-sit, ge̍k-kéng piàn sūn-kéng. Lí ê chin-chōe chhin-lâng í-keng hō͘ Sat-tàn khún-pa̍k tī kaⁿ-nih chin-chōe nî ah, in teh thèng-hāu thih-mn̂g khui, tng lí pêng sìn-sim khiân-sêng put-toān ǹg Siōng-tè kî-tó, in beh tī Ki-tok ê lāi-bīn tit tháu-pàng. --- C.H.P.

Tú-tio̍h kín-kip ê chōng-hóng su-iàu jia̍t-chhiat ê kî-tó. Tng kî-tó ê lâng pún-sin chiâⁿ chòe kî-tó ê sî, Sím-mi̍h to chó͘-tòng i bōe tiâu. Í-lī-a tī Ka-bi̍t soaⁿ phak tī thô͘-kha, bīn giap tī kha-thâu-u tiong, i chiâⁿ-chòe kî-tó.

Kî-tó bô it-tēng ài chhut siaⁿ, jia̍t-chhiat ê kî-tó, bô it-tēng ōe thang ēng gú-giân lâi piáu-ta̍t. Ēng Í-lī-a ê chōng-hóng, i kui ê lâng kap Siōng-tè chiap-chhiok, kap Siōng-tè liâm chòe chi̍t thé, liân-ha̍p tí-te̍k ok sè-le̍k. Í-lī-a ê tùi-te̍k chiū tòng bōe-tiâu chit chióng ê kî-tó lâng. Hiān-kim te̍k-pia̍t su-iàu chit chióng lâng. --- tùi "Kūi-lo̍h ê sî-khek"

"Kóng bōe chhut ê thó͘-khùi" (Lô-má 8:26) siông-siông sī Siōng-tè só͘ bōe-thang kū-choa̍t ê. --- Charles H. Spurgeon


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw