《台語荒漠甘泉(全羅版)》

| | | 轉寄

“Óa-khò Chú, Sim pêng-an”

listen


Chiaⁿ ge̍h chhoe la̍k. (It ge̍h la̍k ji̍t)

“Lí tùi chúi-tiong keng-kè, Góa tek-khak kap lí saⁿ-kap tī-teh; lí keng-kè kang-hô, chúi tek-khak bô im-ba̍t lí;”(Í-sài-a 43:2)

Bô kiâⁿ kàu bô lō͘, Siōng-tè bô khui lō͘; bô kàu bô hoat-tō͘, I ê pang-chān bô hián-lō͘; bô tú-tio̍h that-gāi, I bô chiong khùn-lân î-khai. Tng lí chin-chiàⁿ su-iàu pang-chān ê sî, I ê chhiú chek-sî kàu-ūi, bô iân-ngō͘.

Chin-chōe lâng lóng hoân-ló chìn-chêng, bōe kàu ê sū hiān-chāi chiū teh chhau-hoân, hi-bōng Siōng-tè hō͘ lâng ê chiân-tô͘ sī pîⁿ-tháⁿ ê tōa-lō͘, it-seng sūn-lī, sūn-ì, bô-hong bô-éng ê lō͘-kèng. Chóng-sī Siōng-tè ê èng-ún sī: tú-tio̍h khùn-lân ê sî, I ōe chi̍t-pō͘ chi̍t-pō͘ chhōa lí kiâⁿ, thè lí khui-lō͘. Tng kha ta̍h tio̍h tōa-chúi ê sî, Siōng-tè ê èng-ún chiah ōe si̍t-hiān, bô kín, iā bô bān.

Ū lâng sin-thé ióng-ióng chiū teh hoân-ló sí-āu ê tāi-chì; án-ni, thài ōe thang hióng-siū Siōng-tè só͘ hō͘ lâng “Hiān-kim ê un-tián” -- Chāi-siⁿ ho̍k-bū jîn-kûn kap siā-hōe. (J.R.Miller)

Tng lí kiâⁿ tī tōa-chúi,
Hân-léng tōa-éng thang kiaⁿ-ùi,
Iâ-hô-hoa chòe lí ê an-ùi,
I ê èng-ún kā lí pau-ûi.
Tùi Chú ê chhùi,
Sī sìn-si̍t, chin-si̍t ê choa̍t-tùi
“Tng lí kiâⁿ tī tōa-chúi,
bōe tîm lo̍h-khì, I ōe kā i poah-khui”

Chin-chōe chhì-thàm ê khó͘-hái,
Iu-siong, siū-khì, thòng-khó͘, pi-ai,
Put-thêng ê chhì-liān kap hām-hāi,
Siong-sim sit-chì móa pak-lāi.
Lán chai I ê ōe sī siōng chán
Chiah-ê chai-lān bōe iâⁿ lán,
Tōa-éng hong-lōng sī I só͘ ān,
I ōe chhōa lán kàu pêng-an.

Tōa húi-hoāi-sèng ê tsu-na-mí,
Chúi-té lāi ê soân-chúi khiⁿ,
Chhin-chhiūⁿ hái-iûⁿ chhim ê chai-hō
Iā bōe kā lán im-sí.
Siōng-tè ê èng-ún khak-si̍t,
O-ló Chú, I ê ōe sìn-si̍t,
Bián-kiaⁿ sìⁿ-miā ōe sit-khì,
I kóng,
“Lí ōe pêng-an tùi chúi-lāi peh-khí”
-- Annie Johnson Flint


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.com.tw