《台語荒漠甘泉（全羅版）》

"Sìn só͘ kîu ê"

作者 陳清俊 翻譯

listen

Jī ge̍h cha̍p-chhit (Jī ge̍h cha̍p-chhit ji̍t)

"taⁿ lí ti̍oh khí-lâi, ... khì Góa só͘ síuⁿ-sù Í-sek-li̍at ê tōe." (Iok-su-a 1:2)

Tī chit ê keng-bûn, sī kóng tāi-chì má-sīong beh hoat-seng ê, m̄-sī kóng chiong-lâi ē hoat-seng, sī hīan-chhú-sî teh chìn-hêng ê tāi-chì. Kim-ji̍t, I hō͘ lí kim-ji̍t ê só͘-kîu, lâi chhì lí ê sìn-sim. Tngg lí pêng sìn-sim kîu, Sīong-tè chīu put-tōan beh hō͘ lí. Ká-sú lí it-bī thèng-hāu, ǹg-bāng, chhē-kîu, che m̄-sī sìn-sim. Ji̍at-chhiat ê ǹg-bāng, sī bô kàu-gi̍ah, m̄-sī sìn-sim. In-ūi "Sìn chīu-sī só͘ ǹg-bāng ê ê si̍t-chāi, kap bē khòaⁿ-kìⁿ ê sū ê pîn-chún." (Hi-pek-lâi 11:1) Chú ài lán pêng sìn-sim ê kî-tó sī án-ni, "Kìⁿ-nā lín só͘ kî-tó lâi kîu ê, ti̍oh sìn sī í-keng tit-ti̍oh, chīu beh kā lín chîaⁿ." (Má-khó 11:24) Lán hīan-chāi ài sìn sī í-keng tit-ti̍oh lah. Lán beh kap Sīong-tè tī éng-óan ê Hīan-chāi saⁿ tú-ti̍oh, lán ū chòe kàu án-ni mah? --- tùi "Iok-su-a" A.B. Simpson tù-chok
Chin-si̍t ê sìn-sim sī khò Sīong-tè, īa íau bōe hoat-seng chīu sìn ū. Tong-jîan lán sîong-sîong su-ìau ū chèng-kù chai lán ê só͘ kîu ū sīu èng-ún, chiah beh siong-sìn. Chóng-sī lán sī "in-ūi góan teh kîaⁿ, sī tùi sìn" (Ṳ Ko-lîm-to 5:7) bô su-ìau chèng-kù, kan-taⁿ su-ìau Sīong-tè ê ōe-gú chīu kàu-gi̍ah. I bat kóng, lán siong-sìn, tāi-chì chīu án-ni beh chîaⁿ. Sīm-chì, tngg khôan-kéng kap sū-chêng teh hoat-seng lóng chhin-chhīuⁿ kap Sīong-tè só͘ kóng ê, teh siong-hóan, chin-si̍t ê sìn-sim beh kian-kò͘ pēng chi-chhî lán.
Si-jîn kóng, "Góa nā m̄-sìn tī o̍ah-lâng ê tōe tit-ti̍oh khòaⁿ-kìⁿ Îa-hô-hoa ê un-hūi, chīu tek-khak cho̍at-bāng." (Si-phian 27:13) Si-jîn pēng bô kìⁿ-ti̍oh i ê kî-tó sīu èng-ún, tān-sī i kian-sìn it-tēng ōe, i ê sìn kian-kò͘ i.
Ū it-tēng ōe tit-ti̍oh ê sìn-sim, ōe pó-síu lán bô sit-táⁿ. Lán beh chhìo kóng, he sī bô khó-lêng ê sū, tī Âng-hái tiong beh khui chi̍t tîau lō͘. Chóng-sī Sīong-tè ū án-ni chòe lah. Tī lâng só͘ khòaⁿ chòe bô khó-lêng ê khôan-kéng ē, che sī gîam-keh sìn-sim ê khó-gīam, sī ēng lâi hō͘ sìn-sim ê tíong-tōa, kap ka-kîong.
Hām-lo̍h tī kan-lân tiong, kè líau tn̂g-tn̂g ê o͘-àm-mî, kap chhau-hôan ê ji̍t-sî, teh thèng-hāu Sīong-tè ōe tāng-kang, beh tam-sim I kíam m̄ chhap á mah? Gîa khí lí ê thâu, khui-chhùi o-ló I, chín-kìu chīu hìong lí lâi lah. --- tùi "O-ló ê seng-o̍ah"

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw