《台語荒漠甘泉（全羅版）》

“Chì bî-sòe”

作者 陳清俊 翻譯

listen
Jī ge̍h jī-sì (Jī ge̍h jī-cha̍p-sì ji̍t)

“Iok-hān lóng bô kîaⁿ sîn-jiah, to̍k-to̍k Iok-hān só͘ kóng chí chit lâng ê, lóng sī chin.” (Iok-hān hok-im 10:41)

Lí khó-lêng bô móa-ì lí pún-sin, lí m̄-sī thian-châi, bô te̍k-sû ê châi-lêng, it-seng pêng-pêng tām-tām kè-ji̍t. Seng-o̍ah tan-tīau, bô sím-mi̍h chhù-bī, ta̍t-tit thang lâi thê-khí ê sū. Sui-jîan sī án-ni, lí íau sī o̍ah kah chin ū kè-ta̍t.
Kîaⁿ sóe-lé Iok-hān it-seng bô kîaⁿ chi̍t-kīaⁿ ê sîn-jiah, Îa-so͘ khiok kóng,"Hū-jîn-lâng só͘ siⁿ bē ū khah tōa Iok-hān ê;" (Lō͘-ka 7:28) I ê sù-bēng sī "ūi-ti̍oh kngg chòe kan-chèng nā-tīaⁿ." (Iok-hān hok-im 1:8) Che īa sī lí góa ê sù-bēng. Kîaⁿ sóe-lé Iok-hān bóan-chiok chòe chit ê siaⁿ-im, chí-ìau ū lâng thiaⁿ-ti̍oh, ōe sīuⁿ ti̍oh Ki-tok chīu kàu-gi̍ah.
Lâng eng-kai kam-sim chòe hit ê hō͘ lâng ōe thiaⁿ-kìⁿ, khiok bōe thang khòaⁿ-ti̍oh ê siaⁿ-im, á-sī chi̍t-ê kìaⁿ ê po-lê, lâng bīn-tùi kìaⁿ, khòaⁿ ti̍oh ê sī Jîn-chú Îa-so͘ ê chhàn-lān êng-kngg, m̄-sī po-lê. Lâng eng-kai kam-sim lo̍k-ì chòe thiⁿ kngg sî ê lîang-hong, soan-kò "lê-bêng kàu lah," "lê-bêng lâi lah," īa koh khòaⁿ bōe ti̍oh, chēng-chēng siau-sit khì.
Lán múi chi̍t ji̍t ê kang-chok sui-jîan bô sím-mi̍h tōa líau-put-khí ê sū, tān-sī Sīong-tè lóng chai, lóng khòaⁿ ti̍oh lah. Siat-sú seng-o̍ah tī kap chin oh tîⁿ ê lâng ê tiong-kan, siat-hoat ēng thìaⁿ lâi îaⁿ i. Nā-sī bat chòe-kè tōa sit-chhò, m̄-thang hō͘ sit-chhò ê ìm-íaⁿ éng-híong lí í-āu ê jîn-seng, chiong che só tī sim-té, hóan-tńg tùi che lâi tit le̍k-līong, thòan-līan ka-kī ê phín-keh.
Lán kî-si̍t chòe líau chin chōe hó sū, chhiau-kè lán só͘ chai. Kim-ji̍t lán īa-chéng, kap lâng hun-híong Ki-tok ê chin-tō. Ū chi̍t kang, ū lâng kóng, i sīong tāi-seng chai Ki-tok sī tùi lí hia. Tngg góa lī-pi̍at ê sî, góa bô khòa-sim bōng-pâi ê súi-bái, tōa-sòe, góa só͘ ài chai ê sī phó͘-phó͘ thong-thong ê lâng tī góa ê bōng chêng kóng, “i sī chi̍t ê hó-lâng, i bô kîaⁿ kè sím-mi̍h sîn-jiah, chóng-sī i chiong Ki-tok kài-sīau hō͘ góa, hō͘ góa thang jīn-bat Chú Îa-so͘” chīu kàu-gi̍ah lah. --- George Matheson


Lí só͘ khǹg-ba̍t ê lâng (Si-phian 83:3)

Chhīu-hi̍oh ē,
Thô͘-ni̍h hoat-chhut chhiⁿ-chhiⁿ ê hi̍oh,
Hoaⁿ-hí chhun-thiⁿ ê ho͘-kìo,
Chháu pàng chhut hun-hong phang-bī teh chhìo,
Tap-èng jo̍ah-thiⁿ hoe khui, ji̍t chìo.

Chhīu-hi̍oh ē,
Poah-khui chhīu-hi̍oh, hían-chhut bí-lē,
Lán só͘ bô sīuⁿ-ti̍oh ê tē,
Ū âng, ū pe̍h ê gō͘-ge̍h hoe,
Thu̍t-jîan ê kngg lâi tían chhut in ê hoe.

Chhīu-hi̍oh ē,
Sè-kan kíam ū chhin-chhīuⁿ chit khóan hoe ê jîn-châi?
Sèng koh sīan ê kîaⁿ-chòe, chí hō͘ Thiⁿ-pē chai.
Siuⁿ hó, kîaⁿ sīan, tīam-tīam lâi,
Hoe m̂, hoe lúi khui, hán tit khòaⁿ ti̍oh ê hong-chhái.

Chhīu-hi̍oh ē,
Sìn-sim sìn-khò sûn-kiat ê hoe sūi,
Chiap-chhiok ti̍oh thiⁿ ni̍h ê êng-kngg kap kong-hui,
Sīu ap, sīu teh ê sim-lêng tían khui,
Hían-chhut bí-lē, thìaⁿ ê hoe lúi.

Chhīu-hi̍oh ē,
Tī im-íaⁿ, tíong-sêng chi̍t tōa tui
Súi-súi tíong-sêng ê hoe-lúi,
Ún-chông tī hoe-ni̍h, ûi-lûi
Kam-tiⁿ, te̍k-íu ê phang-bī chin ko-kùi.

Lán ba̍k-chiu só͘ khòaⁿ bōe ti̍oh,
Chú khiok chai múi chi̍t lúi, múi chi̍t hi̍oh,
Kam-sim thèng-hāu I ê kngg chìo,
Ti̍t kàu I koh-lâi ê sî, ê thìaⁿ-sioh.
Chhin-chū hian-khui chiah ê chhīu-hi̍oh.

Sīong-tè tùi phó͘-thong ê jîn-kûn tiong, kéng-sóan I sīong pó-kùi ê kang-lâng. (chham-khó Lō͘-ka 14:23)

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw