《台語荒漠甘泉（全羅版）》

"Thiⁿ-pē ê lō͘"

作者 陳清俊 翻譯

listen
Saⁿ ge̍h saⁿ-cha̍p (Saⁿ ge̍h saⁿ-cha̍p ji̍t)

"Khòaⁿ ah, hōan-nā lín tíam-hé, ēng hé-pé ûi ka-kī--ê, thang lâi kîaⁿ tī lín ê hé-īam lāi, kap lín só͘ tíam ê hé-pé tiong. Che sī Góa ê chhíu só͘ tīaⁿ ti̍oh ê; lín beh tó tī kan-khó͘ ê tiong-kan." (Í-sài-a 50:11)

"Che sī kā kîaⁿ tī o͘-àm tiong, ka-kī teh chhē kngg ê lâng kū-thé ê kèng-kò. In beh chhin-chhīuⁿ tíam to̍h ê hé, hé-chhiⁿ ǹg sì-bīn sīa chhut-lâi. Che sī sím-mi̍h ì-sù?
Ì-sù sī, lán kîaⁿ tī o͘-àm tiong, sīu ín-íu bô khì sìn-khò Chú, bô óa-khò I, khiok óa-khò ka-kī khì chhē chhut-lō͘. Lán bô hō͘ Thiⁿ-pē lâi pang-chān, hóan-tńg khò ka-kī ê le̍k-līong. Lán chìau chū-jîan ê hong-hoat khì chhē kngg, khì chhéng-kàu pêng-íu, hō͘ lán pún-sin tit kiat-lūn, sīu gō͘-tō chhōa tī oai-lō͘, pēng bô chhē-kîu Sīong-tè ê chìaⁿ-lō͘.
Lán só͘ khòaⁿ-ti̍oh ê kngg, chin khó-lêng sī ka-kī só͘ tíam-to̍h ê hé-kngg, īa khó-lêng sī kîaⁿ ǹg gûi-híam àm-chi̍oh ê ké teng-thah. Sīong-tè hō͘ chiah-ê hu-ké ê hé-chhiⁿ lâi chìo lō͘, kiat-kó sī pi-siong chhiⁿ-chhám ê.
Chhin-ài ê pêng-íu, tû-líau tī Pē Sīong-tè só͘ tīaⁿ-ti̍oh ê sî-kan kap chìau I ê hong-sek, cho̍at-tùi m̄-thang sīuⁿ beh khò ka-kī kîaⁿ chhut o͘-àm. Lí tú-ti̍oh khùn-lân, hām-lo̍h tī o͘-àm tiong, sī ài lí tit-ti̍oh chi̍t kóa kín-kip su-ìau ê kà-sī á kong-khò. Kè-thâu chá ê chín-kìu khó-lêng ōe hông-gāi ti̍oh Sīong-tè ê un-tían tī lí sin-chīuⁿ ê ūn-chok. Ôan-chôan kau-thok Chú, kam-sim tī o͘-àm tiong thèng-hāu, khak-si̍t chai, ū I kap lán tông-chāi.
Chhíaⁿ kì-tit, tī o͘-àm tiong kap Chú tâng-kîaⁿ pí ka-kī chi̍t lâng kîaⁿ tī kngg tiong khah hó. – tùi "Sòe-sòe ê siaⁿ-im"
Bo̍h-tit jíau-lōan kan-si̍ap Sīong-tè ê kè-ōe kap I ê chí-ì. Lām-sám tāng, lóng sī ōe phò-hōai I ê kang. Chiong sî-cheng ê hun-chiam, sî-chiam kā kái-pìan, kā tńg-se̍h, pēng bōe kái-pìan ti̍oh khak-si̍t ê sî-kan. Khó-lêng lí ōe ka-sok Sīong-tè ê ì-sù tī bó͘ chi̍t hong-bīn hoat-tían, tān-sī tn̂g-kî kú-tn̂g lâi khòaⁿ, lí sún-hāi I ê kang-chok. Lí thang chiong chi̍t-lúi ê hoe-m̂ kā i thìⁿ-khui, án-ni chòe, khiok sī húi-líau chi̍t lúi hoe. Chiong it-chhè lóng kau-thok I, chi̍t-tíam-á mā bô pit-ìau pó-lîu. "Chóng-sī m̄ sī chìau góa só͘ ài; sī chìau lí só͘ ài." (Má-khó 14:36) --- Stephen Merritt

I ê lō͘

Góa ài thêng, I khiok ài góa kè-si̍ok kîaⁿ,
Tī hân-léng ê chhīu-nâ kiaⁿ-hîaⁿ;
Gôan-in sī síaⁿ?
Hut-jîan ū tōa chi̍oh-thâu lak lo̍h lâi ê siaⁿ,
Kòng tī thâu-tú-á só͘ khīa hia.

Góa ài beh kîaⁿ, I khiok ài góa tòng-tīaⁿ;
Ko͘-put-chiong, "chìau Lí ê ì-sù chîaⁿ."
Kè ji̍t thàu-chá, In kîaⁿ
Tī góa só͘ beh kîaⁿ ê lō͘-tîaⁿ,
Tī hia ū chi̍t bé tōa chôa sí tīaⁿ-tīaⁿ.

Góa bô beh koh mn̄g gôan-in,
Sui-jîan góa khòaⁿ bōe ti̍oh chêng-bīn.
Tè I ê tài-ín,
Góa sui gōng, I khiok chin koh thang sìn,
Kà góa chhē sóan an-chôan ê lō͘-kèng. --- tùi "Chú-ji̍t-o̍h ha̍k-pò"

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw