《台語荒漠甘泉（全羅版）》

"Ôan-chôan kau-thok"

作者 陳清俊 翻譯

listen

Sì ge̍h jī-cha̍p (Sì ge̍h jī-cha̍p ji̍t)

"M̄-sī ēng kôan-sè, m̄-sī ēng lêng-le̍k, chīu-sī ēng Góa ê Sîn; che sī bān-kun ê Îa-hô-hoa kóng ê." (Sat-ka-lī-a 4:6)

Ū chi̍t pái, góa tī chi̍t ê chin kīa ê soaⁿ-lō͘ kîaⁿ, khòaⁿ ti̍oh chi̍t ê cha-po͘ gín-ná tī soaⁿ-kha khîa kha-ta̍h-chhia teh peh-soaⁿ, khîa kah chin chhut-la̍t, koh tú-ti̍oh tùi-thâu-hong teh chhe, hut-jîan ū chi̍t-chiah kong-chhia (streetcar) īa bān-bān teh peh-soaⁿ. Chit ê gín-ná chīu ēng chhíu khíu-tîau chhia ê chi̍t ki hôaiⁿ-koaiⁿ, lí thang chai, chit ê gín-ná chīu bô su-ìau hùi chin chōe la̍t lâi chīuⁿ soaⁿ lah.
Góa sīuⁿ ti̍oh "Góa ê ìa-sīan kap lóan-ji̍ok ná chhin-chhīuⁿ hit ê gín-ná teh ta̍h kha-ta̍h-chhia, chīuⁿ soaⁿ ê sî, tú-ti̍oh chíong-chíong ê hóan-tùi, hō͘ góa tì-kàu bô khùi-la̍t. Chóng-sī tī hū-kūn ū chin-tōa ê pang-chān sûi chhíu thang lâi li̍ah-ti̍oh, Chīu-sī Chú Îa-so͘ ê le̍k-līong. Góa só͘ su-ìau ê, chīu-sī kap I chiap-chhiok sio-lîan, góa só͘ su-ìau ēng lâi li̍ah-tîau ê sī chhin-chhīuⁿ sío chéng-thâu-á ê sìn-sim. Án-ni I ê le̍k-līong chîaⁿ chòe góa ê, góa chīu beh sêng-chīu góa só͘ bô kàu-la̍t chòe ê sū-hōng."
Khòaⁿ-ti̍oh khîa kha-ta̍h-chhia ê gín-ná, góa pàng-hē góa ê ìa-sīan, jīm-sek ti̍oh chit ê úi-tāi ê chin-lí. --- "Khah hong-sēng ê sìⁿ-mīa"

Ôan-chôan kau-thok

Hòng-khì ka-kī kau-thok Sèng-lêng!
Bô sioh tāi-kè, chhē-kîu I ê hong-sēng,
Chām tn̄g só͘-ū ê tîⁿ-pòaⁿ, soh-lîan khôan-kéng,
Sái ǹg chhim-chhim chín-kìu kap pó-síu ê tāi-lêng.

Hòng-khì ka-kī kau-thok Sèng-lêng!
Tîm lo̍h-khì, bô koh ū ka-kī, pìaⁿ kàu chheng,
Ti̍t-kàu khang-khang phòa-chhùi tī I kha-chêng,
Tán I chhiong-móa, hō͘ sū-kang ôan-sêng.

Ôan-chôan sūn-ho̍k Sīong-tè lâi kî-tó,
Tû-líau I ê lō͘, bô beh chhē kî-thaⁿ chi tō,
Hòng-khì an-i̍at an-lo̍k, sóan-te̍k I, chòe chì-pó,
Thiaⁿ I ê siaⁿ, Tán I ê chí-tō.

Ôan-chôan sūn-ho̍k, bô thàn ka-kī ì-chì,
Bô-lūn Chīam-sî á éng-óan, lóng sī I, īa chí sī I,
Góa ê kè-ōe kap bo̍k-piau lóng siau-sit tī I ê hó-ì,
Lóng-chóng bô, khiok sím-mi̍h lóng ū, nā-sī tìam-tī I.

Ôan-chôan kau-thok sūn-ho̍k sī kam-tiⁿ,
Sīu I thìaⁿ ê sok-pa̍k, khiok ū kî-bīau chū-îu ì-gī,
Bô chōe ê tîⁿ-pòaⁿ, bô kiaⁿ bô gîau-gî,
Bô-hôan bô-ló, bô tāng-tàⁿ, bô siong-pi.

Ôan-chôan kau-thok sūn-ho̍k, tiⁿ-bi̍t an-hioh,
Thèng-hāu tī I sù-hok ê ta̍h-kha-chi̍oh,
Tán-thāi Sîn-sèng lâng-kheh lâi thìaⁿ-sioh,
Thòan-līan góa sim-lêng ha̍p ôan-bí chhùn-chhioh.

Khòaⁿ ah! Sèng-lêng lâi, góa chhiong-móa, sìn-ho̍k!
Tī I, góa bóan-chiok, tī I, góa ôan-sêng kang-chok,
Góa lêng ê kngg bô koh àm, chin-chìaⁿ hēng-hok,
Tngg góa síu sè-iok, ôan-chôan kau-thok.


附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw