《台語荒漠甘泉（全羅版）》

"Sìn-khò Îa-so͘ chin-chìaⁿ tiⁿ-bi̍t"

作者 陳清俊 翻譯

listen


La̍k ge̍h chhoe-it (La̍k ge̍h it ji̍t)

"I bat tùi in kóng, Chit-ê chīu-sī an-hioh , lín ti̍oh hō͘ ìa-sīan ê lâng tit-ti̍oh an-hioh ; koh kóng, Chit-ê chīu-sī khùiⁿ-o̍ah; chóng-sī in m̄-khéng thiaⁿ." (Í-sài-a 28:12)

Lí ūi-sím-mi̍h hôan-ló? Hôan-ló ū sím-mi̍h lō͘-ēng? Lí sī tī chi̍t-chiah tōa chûn téng, lí bōe thang ka-kī sái-chûn, lîan khíu phâng ê hūn īa bô, chóng-sī khiok sîong-sîong hôan-ló, chhin-chhīuⁿ lí teh sái-chûn, ná chhin-chhīuⁿ lí sī chûn-tíuⁿ, ài-chai, chûn-tíuⁿ sī Sīong-tè. Lêng-hûn ah, ài an-chēng, Sīong-tè sī chú-lâng!
Lí ê seng-o̍ah tōa jíau-tōng koh soan-hôa, kíam ōe chèng-bêng Sīong-tè í-keng lī-khui I ê pó-chō mah? I pēng bô án-ni. I ê bé chīn-la̍t hìong-chêng pun-pháu, I ê chhia ná hong-thai kín-kín teh kîaⁿ, chóng-sī bé ū bé-le̍k-soh, Sīong-tè the̍h tī chhíu ni̍h, Sīong-tè chìau I ê ì-sù sái chhia!
Lán ê Sīong-tè Îa-hô-hoa sī Chú-cháiⁿ! Siong-sìn I, lí ōe pêng-an. “M̄ bían kiaⁿ.” (Má-thài 14:27). --- Charles H. Spurgeon

Góa ê lêng ah, kim-àm an-chēng hioh-khùn,
Hong-thai sàu tī Sīong-tè tōa-chûn,
Sī Sīong-tè ê chûn, m̄-sī lí ê, an-sim khùn.

Góa ê lêng ah, kim-àm an-chēng hioh-khùn,
Sīong-tè ê chhíu chó͘-chí mô͘-kúi chìn-kun,
Sī Sīong-tè ê chhíu, m̄-sī lí ê, an-sim khùn.

Góa ê lêng ah, kim-àm an-chēng hioh-khùn,
Àm-mî tiong, Sīong-tè ê thìaⁿ kîong koh ún,
Ū Sīong-tè ê thìaⁿ, m̄-sī lí, an-sim khùn.

Góa ê lêng ah, kim-àm an-chēng hioh-khùn,
Sīong-tè an-ùi siong-sim thî-khàu ê jîn-kûn,
Sī Sīong-tè teh an-ùi, m̄-sī lí, an-sim khùn.

Góa khǹg lín m̄-thang hoe-sim, sit-bāng. Hoe-sim khut-ho̍k sī chin tōa ê íu-he̍k, in-ūi tùi-te̍k chiong hoe-sim pau-chong kah chin súi, khòaⁿ bōe chhut i ê gûi-híam. Bô-bāng hō͘ lán ê sim ko͘-ta, hō͘ lán kám-kak bōe ti̍oh Sīong-tè ê chiok-hok kap un-tían, hō͘ lán siuⁿ khòaⁿ-tāng ge̍k-kéng, tāng-tàⁿ ná chhin-chhīuⁿ siuⁿ tāng pē bōe khí. Chóng-sī Sīong-tè tùi lí ê kè-ōe kap si̍t-si sī tōa tì-hūi bô pí. --- Madame Guyon

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw