《台語荒漠甘泉（全羅版）》

"Kîu Chú ín-chhōa, tài-nía"

作者 陳清俊 翻譯

listen



Chhit ge̍h chhoe-la̍k (Chhit ge̍h la̍k ji̍t)

"Góan īa m̄-chai ti̍oh cháiⁿ-īuⁿ kîaⁿ, góan ê ba̍k-chiu choan-choan ǹg Lí." (Ṳ Le̍k-tāi-chì-li̍ok 20:12)

Ū chi̍t lâng kìo, Ou-sat, “chhun-chhíu hû Sīong-tè ê iok-kūi,” chīu sit-khì sìⁿ-mīa. I chhun-chhíu hû, ôan-chôan sī chi̍t-phìⁿ hó-ì, “in-ūi gû ti̍oh-tak.” (Ṳ Sat-bó͘-jíⁿ 6:6) chóng-sī in-ūi i chhiok-hōan ti̍oh Sīong-tè ê sū-kang lâi chòe chhò-gō͘ ê sū, Sīong-tè chīu phah-sí i. (Ṳ Sat-bó͘-jíⁿ 6:7) Kè sìn-sim ê seng-o̍ah, sîong-sîong ài lán m̄-thang sûi-pīan chhap-chhíu.

Lán nā chiong chi̍t-kīaⁿ tāi-chì kau-thok Chú, chīu bô tit koh kè-mn̄g, I ê chìau-kò͘ pí lán khah hó, īa bô su-ìau lán ê pang-chān. “Ti̍oh chēng-chēng tī Îa-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, kap hit-hō pháiⁿ kè-bô͘ tit-ti̍oh chîaⁿ ê, lâi put-pêng.” (Si-phian 37:7)

Lán tī seng-o̍ah sīong ū ê sū khòaⁿ khí-lâi ôan-chôan m̄-ti̍oh, chóng-sī Sīong-tè tùi lán ê chêng-hêng líau-kái chai-íaⁿ pí lán khah chheng-chhó. Lán chí-ìau ôan-chôan sìn-jīm I, chìau I ka-kī ê hong-sek, I ê sî-kan chòe kang, I beh tī sīong sek-tòng ê sî-khek ôan-sêng. Lán bô hêng-tōng sîong-sîong pí hêng-tōng khah ha̍h Sīong-tè ê chí-ì. Bô-thêng ê kang-chok á tōng-chok chí-ū sī siong-hāi, in-ūi Sīong-tè í-keng tap-èng I ê chí-ì beh sêng-chīu. --- A. B. Simpson

Góa bông-bông bíau-bíau bōe-bêng, tùi Chú kóng,
Chú ah, kā góa chhòng hō͘ i hó koh bêng!
Tùi Lí, àm-sî ná ji̍t-tàu,
Ou-àm ná kngg-bêng,
Góa kiaⁿ tú-ti̍oh khùn-lân ho̍k-cha̍p ê sū-chêng,
Góa siang-chhíu îo bōe thêng,
Kâu-kha kâu-chhíu lâi phòa-húi,
Lí ê chhíu éng bô chhò-gō͘ ê chêng-hêng.

Góa gîau-gî put-tēng, tùi Chú kóng,
Chú ah, chhíaⁿ soat-bêng,
Tó-chi̍t-tîau lō͘ sī chin-chìaⁿ pêng-chēng?
Tó-chi̍t-tîau lō͘ ū lī-ek ê chêng-kéng?
Góa ê tì-hūi khòaⁿ bōe bêng,
Īa m̄-chai án-chóaⁿ chìn hêng;
Tùi Lí sī chheng-chhó,
Chú ah, hō͘ góa khòaⁿ ōe chheng!

Chiong jîn-seng ê kau-tîⁿ, khùn-jíau ê sū kau-thok tī Chú ê chhíu, îu I khì chhù-lí, sī jōa-chîaⁿ sóng-khòai, hoaⁿ-hí ê sū.

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com