《台語荒漠甘泉（全羅版）》

"Îa-so͘ só͘ thìaⁿ ê lâng"

作者 陳清俊 翻譯

listen


Poeh ge̍h chhoe-cha̍p (Poeh ge̍h cha̍p ji̍t)

"Kì-jîan thiaⁿ-kìⁿ I phòa-pīⁿ, chīu tī só͘ tòa ê só͘-chāi îu-gôan tòa nn̄g ji̍t." (Iok-hān 11:6)

Chú Îa-so͘ hō͘ Li̍ap-sat-lō͘ tùi sí koh-o̍ah ê sîn-jiah kì-sū, sī ēng “Má-tāi, kap I ê chí-bē, kap Li̍ap-sat-lō͘, lóng sī Îa-so͘ só͘ thìaⁿ ê lâng.” (Iok-hān 11:5) chi̍t kù ōe chòe khai-sí. Sīong-tè ná chhin-chhīuⁿ ài ēng chit ê keng-bûn kà-sī lán, I tùi-hù lán ê hong-hoat bô-lūn jōa am-khàm, jōa sîn-pì, i ê tiong-sim-tíam, ki-pún-sīong sī ài lán káⁿ siong-sìn koh khéng-tēng I bû-hān, lán put-phòe, éng-óan put-pìan ê thìaⁿ-thàng. Chóng-sī tī thìaⁿ ê lāi-bīn ū thòng-khó͘ hoat-seng.

Má-tāi, Má-lī-a bô hôai-gî, Îa-so͘ ōe chīn-līong pâi-tû it-chhè ê chó͘-tòng, bô hō͘ in ê hiaⁿ-tī sí-khì. Chóng-sī I thiaⁿ-kìⁿ Li̍ap-sat-lō͘ phòa-pīⁿ líau-āu, îu-gôan tī só͘ khīa-khí ê só͘-chāi tòa nn̄g ji̍t.

“Chóng-sī” “kì-jîan” hō͘ lán thang khì sīuⁿ, Îa-so͘ bô li̍p-khek kàu Má-tāi, Má-lī-a ê chhù, m̄-sī in-ūi bô thìaⁿ in, si̍t-chāi sûn-sùi sī ūi ti̍oh thìaⁿ. Nā m̄-sī ūi-ti̍oh bû-hān ê thìaⁿ, I pún ōe kín-kín khì kái-tû I só͘ thìaⁿ ê lâng ê siong-pi, chhit khì in ê ba̍k-sái, bô koh siong-pi khó͘-thàng. Chí ū Sīong-tè thìaⁿ ê le̍k-līong hō͘ Kìu-chú ap-chè I chû-ài ê sim-tn̂g, thèng-hāu khó͘-thàng ê thiⁿ-sài ôan-sêng i ê kang-chok.

Síaⁿ lâng ōe kó͘-kè thoa-bôa kap khó͘-thàng tùi lán ū lī-ek? Nā m̄-sī ū in, lán thái ōe tit-ti̍oh ki-tok-tô͘ seng-o̍ah ê chin-chōe hó ê tek-hēng. Nā m̄-sī ū khó-gīam sìn-sim ê bôa-līan, lán ná ōe ū sìn-sim? Nā sī bô tn̂g-tn̂g sīu-khó͘ ê thé-gīam, bô khó͘-lān ê pôe-íong, lán thái ōe ū jím-nāi ah?

Chhin-ài ê! Thâu-chêng ê lō͘ bô thang kiaⁿ,
Lán só͘ bat ê Chú tī sin-piⁿ saⁿ kap kîaⁿ,
Chheng-chheng chhó-chhó tī lán sim-íaⁿ,
Lán sī I só͘ thìaⁿ ê kíaⁿ.

I thìaⁿ lán tngg o͘-im thiⁿ,
Siong-sim ji̍t hō͘ lán oh tam khí,
Íau sī beh sìn-khò I,
In-ūi lán sī I só͘ thìaⁿ kíaⁿ-jî,

Sî-kan, kái-pìan it-chhè sū,
Khiok bōe kái-pìan I ê un-hūi,
Ki-tok ê sim chhiong-móa jîn-chû,
In-ūi lán sī I só͘ thìaⁿ kíaⁿ-lūi.



附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com