《台語荒漠甘泉（全羅版）》

"Àm-tiong seng-tíong"

作者 陳清俊 翻譯

listen



Poeh ge̍h jī-sì (Poeh ge̍h jī-cha̍p-sì ji̍t)


"Góa ū chiah ê mi̍h, kàu-gi̍ah ū chhun, góa í-keng chhiong-chiok." (Hui-li̍p-pí 4:18)

Góa ū chi̍t-pún ôan-gē ê chu, kî-tiong chi̍t chiuⁿ ê mîa chin chhù-bī, kìo-chòe “Tī im-àm-chhù seng-tíong ê hoe.” Chu nih kóng-kàu hoe-hn̂g lāi ū ji̍t-kngg chìo bōe-ti̍oh ê só͘-chāi, tān-sī ū ê hoe m̄-nā ōe tī àm-àm ê kak-lo̍h tōa-châng, īa sī su-ìau im-àm ê só͘-chāi, hō͘ i seng-tíong khah hó-sè, koh ōe khui hoe.

Lêng-sèng ê sè-kài īa ū lūi-sū ê chêng-hêng. Ki-tok-tô͘ tī bu̍t-chit khôan-kéng ke̍k khùn-lân ê sî, hóan-tńg bō͘-sēng khui hoe. Tī im-àm tiong tíong-tōa. Chit ê chêng-hêng nā-sī phàⁿ-kó͘ bô chin-si̍t, lán chóaⁿ-īuⁿ ōe lâi kái-sek sù-tô͘ Pó-lô ê it-seng keng-le̍k ah?

I sía téng-bīn keng-bûn ê sî, sī sīu koaiⁿ tī Lô-má, i chú-ìau ê sù-bēng ná chhin-chhīuⁿ sīu chhiat-tn̄g. Chóng-sī chīu tī che o͘-àm ê khôan-kéng, i ê hoe tōa-tōa khui chhut-lâi, chi̍t-phìan chhàn-lān. Pó-lô í-chêng khó-lêng sī khòaⁿ-chòe tōa-lō͘ piⁿ híaⁿ-ba̍k ê hoe, ū ji̍t-kngg chin bō͘-sēng, hīan-chāi i sīu khéng-tēng, i só͘ píau-hīan bô-pí ê kian-kîong kap bí-lē. Sīong-tè ê èng-ún phah-khui i só͘ chîong-lâi bōe-bat thé-gīam kè ê pó-chông.

Chiah-ê pó-chông tiong ū Ki-tok ê un-tían, thìaⁿ-thàng, hí-lo̍k, pêng-an téng-téng ê kî-bīau phín-chit, in tī o͘-àm tiong chiah ōe hían-lō͘ chhut ún-chông tī lōe-chāi ê kong-hui. Àm, sip, lah-sap ê kaⁿ-lô pìan-chòe Sīong-tè chin-tō ê tîuⁿ-só͘. Pó-lô sêng-sīu ti̍oh i í-chêng só͘ bōe-bat keng-le̍k ti̍oh ê hiah-nih hong-hù hiah-nih khoah-tōa ê lêng-sèng sán-gi̍ap!

Lán kíam m̄-chai, Sè-kan lâng, bô-lūn lâm á-sī lú tú-ti̍oh o͘-àm, ko͘-toaⁿ ê sî, chīu ná chhin-chhīuⁿ teh chhēng kùi-tīong ê ông-phàu, ū tit-ti̍oh le̍k-līong, kôan-ui, kap hi-bāng mah? Lâng sīu koaiⁿ-kaⁿ, chiong i ê châi-sán hong khí-lâi, chóng-sī bōe-thang hong-tîau i cheng-sîn-sīong ê chin-chìaⁿ châi-sán. In ê bu̍t-chit khôan-kéng sī khoat-ho̍at ná soa-bô͘ khòng-ía, chóng-sī “Khòng-ía kap ta-sò ê tōe tek-khak hoaⁿ-hí; soa-bô͘ i̍ah beh khòai-lo̍k, koh chhin-chhīuⁿ mûi-kùi khui-hoe.” (Í-sài-a 35:1). --- John Henry Jowett

Lîan sīong súi ê hoe, tī ji̍t-thâu ê kngg ē, i ê ē-bīn īa ū ka-kī ê íaⁿ. Kngg ná kîong, i ê íaⁿ, ná bêng-hían.

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com