《Kah陳小小做伙讀台語》

 | | | 轉寄

看ah！一切lóng是timing

作者 陳小小，台譯：Lîm ChùnIo̍k 2025.11.09

看ah！一切lóng是timing

陳鳳翔








《波阿斯kah路得》（Ruth and Boaz），大衛·威爾基·溫菲爾德（David Wilkie Wynfield）。（圖片來源／Harris Museum, Art Gallery & Library）


Timing is everything.（時間點決定一切。）chit句話常常hông用tī愛情頂面。Tī某一个時間點相tú了，m̄ koh兩人無來電；á是你對我有感覺ê時，我soah對你無感覺；á是你對我無感覺ê時，我soah對你有感覺，愛情to̍h bē開始。

出名ê偶像劇《我可能bē愛你》就是teh講timing m̄ tio̍h ê愛情故事。程又青kah李大仁兩人tī學生時代相tú，起初是友情。畢業入社會，隨人結交異性朋友，tú tio̍h生活中各種難題，發見對方是siōng好ê陪伴kah守護，兩人關係有變化，tùi友情行向愛情，m̄ koh timing m̄ tio̍h，幾nā pái tāⁿ失。故事siōng尾，兩人timing tio̍h lah，ánne chiah終成眷屬。

聖經中ê路得記，mā是一个timing ê故事，幾个所在「tú好是、tútn̄g、tú好」，說明耶和華是掌握控制timing ê上主。

倒tńg來ê timing

約公元前1020到1200年間，以色列發生饑荒。災情嚴重到連伯利恆（希伯來文ê意思是「米糧ê家」）lóng無糧。一个chapo͘人以利米勒chhōa in bó͘拿俄米kah兩个kiáⁿ兒遷徙到摩押國，無想tio̍h，chitê个 chapo͘人就死tī異鄉，留落來牽手kah兩个kiáⁿ兒。後來，兩个kiáⁿ兒娶摩押地方ê chabó͘ gíná─俄珥巴kah路得。M̄ koh十年了後，kiáⁿ兒續接過往，留落來三个chabó͘人。

拿俄米聽講耶和華眷顧祂ê子民，hō͘ in有好收成，to̍h想beh帶兩个新婦離開摩押tńg來以色列。M̄ koh tī回鄉途中，拿俄米躊躇了，她想tio̍h帶chit兩个外國新婦tńg去，恐驚害tio̍h in，tō勸in tńg去後頭厝、koh再婚。

俄珥巴選擇留tī摩押，路得soah不忍心棄sak take，她對拿俄米講：「請m̄ thang hō͘ 我離開妳。Hō͘我kah妳做伙去lah！妳到tó位，我mā到hia；妳tòa tó位，我mā tòa hia；妳ê民族to̍h是我ê民族；妳ê上主to̍h是我ê上主。妳死tī tó位，我mā死tī hia，葬tī hia。除了死，任何事lóng bē tàng hō͘咱分離！若是我背誓，願耶和華重重處罰我！」這是路得以耶和華ê名做ê決志祈禱，她選擇拿俄米ê上主耶和華為kakī ê上主。

第一个timing！路得成做耶和華ê子民，á耶和華眷顧祂ê子民。就ánne tútú好，take新婦兩人去到伯利恆，「tú好是起手割大麥ê時」！tńg去ê timing，tú好是收成ê時，bē餓死。上主頒hō͘祂ê子民以色列「允准拾麥穗」制度（申命記24章19節；利未記19章9節、23章22節），土地屬tī耶和華，地主一定tio̍h許可sànchhiah人teh收割ê時拾麥穗，上主關心貧苦族群。

憐憫ê timing

第二个timing！路得對take講：「hō͘我到田裡去拾麥穗，我tī啥人ê眼中蒙恩，就跟tòe tī啥人ê khachiah後。」以色列境內有hiahni̍h chē田，就ánne tútú好，人地生（chheⁿ）疏ê路得khioh麥穗ê chit塊田是波阿斯ê，伊tú好是拿俄米in翁以利米勒ê親族。

第三个timing！路得去khioh麥穗hit一工，就ánne tútú好，波阿斯tùi伯利恆來到chit塊田。華語聖經路得記2章4節chia有一个希伯來文「הִנֵּה」（看ah！）無翻譯出來。「看ah！」提醒讀者tio̍h注意chitê奇妙ê timing。

第四个timing！波阿斯是一个敬畏耶和華ê人。伊祝福收割ê工人：「願耶和華kah lín同在！」in mā祝福波阿斯：「耶和華賜福hō͘你！」to̍h tī hō͘道祝福ê hitê時刻，就ánne tútú好，波阿斯看tio̍h路得。

第五个timing！波阿斯問領班：「he是啥人tau ê chabó͘ gíná？」領班回答：「她to̍h是kah 拿俄米tùi摩押tńg來ê hitê外國chabó͘ gíná。她要求我hō͘她跟tòe tī工人ê後頭khioh麥穗，透早to̍h開始工作到chitmá，kantaⁿ有tī涼棚kha歇睏一時á。」就ánne tútú好，領班對波阿斯ê報告，有講tio̍h路得是一个拚勢ê chabó͘ gíná。

波阿斯對路得講：「妳免到別人田裡去khioh麥穗，就留tī chia kah女工做伙。看男工到tó位收割，妳就tòe teh女工khioh。我已經吩咐我ê男工bē tàng欺負妳。妳嘴ta，to̍h到水罐hia lim in 捾來ê水。」路得一聽chiahni̍h大ê恩典，隨phak在土腳向波阿斯說感謝：「你是án怎待我chiahni̍h好？Chiahni̍h關心我chit種个外國人？」

波阿斯講：「Lín翁死了後，妳對take ê種種孝行，我lóng聽見à。我知影妳án怎離開父母kah kakī ê故鄉，án怎來tòa tī chit个chheⁿ疏ê民族中。願耶和華照妳所做ê報答妳，願以色列ê上主──妳所投靠ê耶和華厚厚賞賜妳！」就ánne tútú好，波阿斯tùi領班聽tio̍h ê，kah chìn前聽tio̍h ê，lóng是有關路得ê好話，違反真實世界tiāⁿtiāⁿ聽tio̍h ê抹烏八卦。而且，就ánne tútú好，波阿斯ê老母喇合mā是外國人，所以波阿斯知影外國人離開故鄉、tòa tī chheⁿ疏民族中ê辛苦。

波阿斯對路得偷偷á施恩惠。Tī路得行開koh去khioh麥穗ê時，波阿斯吩咐伊ê工人：「hō͘她隨意khioh，準講tùi堆好 ê禾綑中去khioh mā bē tàng為難她；甚至beh tùi紮好ê麥綑中抽kóa出來，hō͘她khioh，bē tàng責備她。」

路得一直工作到beh暗á，收成滿滿。Tńg到厝，kā麥á hō͘ take看，拿俄米大大tio̍h驚，問講：「妳今á日tī tó位khioh麥穗？妳tī啥人tau ê田裡工作？願上主賜福hō͘關心妳ê hitê人！」路得kā take講是波阿斯ê田。真正是siuⁿ tú好ah，竟然是波阿斯！拿俄米kā 她講：「波阿斯是咱ê至親，有義務照顧咱。」

眷顧ê timing

此後，路得ta̍k工去波阿斯ê田拾麥穗，直到收完了大麥kah小麥。拿俄米忽然心頭有按算，她ài路得去色誘波阿斯，hō͘伊不得不盡照顧ê義務。她對路得講：「êng暗波阿斯ē tī五穀場上簸麥á。妳去洗身軀，拭點香水，穿siōng好ê衫褲，了後到五穀場去。M̄ koh無beh hō͘伊知影妳tī hia，tio̍h等伊食完了，lim有夠，看準伊倒ê所在，伊睏去了，妳to̍h去，掀開被（phōe），倒tī伊腳邊。伊ē kā 妳講該做啥物。」路得照take ê吩咐去做。

第六个timing！波阿斯食完了，lim有夠，心情快樂，to̍h到麥堆旁倒落去睏à。就ánne tútú好，波阿斯是睏tī麥堆盡頭，卻m̄是睏tī一陣工人之間，ánne 路得chiah有機會偷偷á行過去，不驚動伊ê他人，倒tī波阿斯腳邊。半暝，波阿斯驚醒，翻過身來，有一个chabó͘ gíná倒tī伊ê腳旁。3章8節chia ê希伯來文「הִנֵּה」（看ah！），照常無翻譯出來。「看ah！」提醒讀者tio̍h注意chitê奇妙ê timing。若是波阿斯酒lim siuⁿ過chē，lim茫了，睏kah像死豬，一睏到天光，ánne路得mā pìⁿ無báng。

波阿斯問：「妳是啥人？」路得講：「我是路得，你ê女婢。你是我ê至親，有義務照顧我。請你娶我！」波阿斯講：「願耶和華賜福hō͘妳！以前妳對take忠誠，chitmá妳對已經過往翁婿ê家族koh khah忠誠。妳thèng好去chhōe少年人，m̄管伊有錢無錢，妳卻無ánne做。路得，mài煩惱！無論妳要求啥物，我lóng ē替妳辦到，城裡ê人lóng知影妳是一个賢慧ê chabó͘ gíná。我的確是妳ê至親，對妳有義務，m̄ koh另外有一個人比我koh khah親。Êng暗妳就留tī chia，明á載早起，咱看伊有願意對妳盡至親ê義務無。若是伊願意，ánne真好；若是伊無願意，我對tio̍h永生ê耶和華咒誓：我一定盡chitê義務。」

波阿斯是一个敬畏上主ê人，伊無親像拿俄米亂chhòng、用烏手段，伊照tio̍h上主歡喜ê方式辦tāichì，hō͘上主當上主，hō͘上主表現祂是耶和華！

恩典ê timing

第七个timing！隔工，波阿斯到城門口公眾集合ê所在，坐tī hia，波阿斯所講ê hit位至親「tú好」tùi hia經過。4章1節chia koh出現希伯來文「הִנֵּה」（看ah！），提醒讀者tio̍h注意chitê奇妙ê timing。

第八个timing！波阿斯講：「某某人ah！請過來chia坐。」hitê人就過來坐落來。就ánne tútú好，chitê人並無重要ê tāichì beh辦，伊坐tī hia等，等到波阿斯去請城裡十位長老來，處理拿俄米家有關盡至親義務ê tāichì。Beh知影，長老m̄是時間真自由ê家庭主婦，長老等於現代社會ê主管、頭家、教授、工程師等等有社經地位ê人，行事曆排滿滿。Beh chhōe齊十个長老，並無容易，tio̍h用kóa功夫kah時間。

第九个timing！大家lóng坐定了，波阿斯對hitê至親講：「拿俄米beh賣咱親族以利米勒ê hit塊地，我想你應該知影chit項tāichì。若是你beh買tńg來，當做在座ê眾長老面前買；若是boài，請講清楚，因為你有優先權，了後chiah輪到我。」hitê人講：「我beh買。」波阿斯講：「你買hit塊地，就mā tio̍h娶hit位摩押ê寡婦路得。Ánne，hit塊地chiah ē保留tī已經死去ê人名下。」hitê人一聽，to̍h表示放棄買tńg來chit塊地ê權利。就ánne tútú好，chitê人chùnbūn kakī ê產業ē受損，若是伊無chùnbūn，ánne路得to̍h ē嫁hō͘這個人。

故事尾站，4章13節有記載：「就ánne，波阿斯娶路得做bó͘，kah她同房。耶和華hō͘她有娠生一个kiáⁿ兒。」直接表明了路得ē tàng有娠生kiáⁿ，是耶和華ê大作為。M̄ koh，頭前這九个timing背後是掩蓋版ê上主大作為。這九加一ê神跡，九个時間（timing）加一个空間（有娠生kiáⁿ）註ê神跡，向世間人昭告耶和華名ê意義。耶和華ê意思是「我是」（אֶהְיֶה）ê未完成式，說明chitê「我是」穿越過去、chitmá kah未來。時間、空間iáu未去hông創造chìn前，chitê「我」就存在；tī時間、空間結束了後，chitê「我」mā繼續存在。耶和華chit个名字說明祂是時間、空間ê創造主！祂掌握控制時間kah空間。

機緣ê timing

我ê婚姻愛情mā是timing ê故事。我ê先生是大學團契koân我兩屆ê學長，伊相貌平凡，身koân無到170公分，bē hō͘人看tio̍h目chiu展大蕊，無法度hō͘人一眼就陷落去情網。伊是團契主席，ta̍k pái tī台頂宣布tāichì，lóng愛參雜幾句笑話暖場，下底學長姊就吐槽：「好冷oh！無好笑。」koh真正是無好笑。

大一升大二ê暑假，我聽講有人奉獻團契一棟大樓，beh全面整修施工當做chapo͘ chabó͘宿舍。就ánne tútú好，hit工我過去看māi二樓chabó͘宿舍ê房間，考慮beh搬入去。Tī一樓，看tio̍h學長tī全是engia ê所在看冊，伊禮貌性teh請安我幾句，交談中知影伊暑假留落來幫忙做臨時大樓監工kah管理員。

我看完房間，續接去看公共便所kah浴間，就ánne tútú好，親目看tio̍h學長àn落來，動手kā in khoán起來tio̍h已經滿出糞埽桶ê女性ê 垃圾物，tú準備phah包the̍h去tàn。我恬恬khiā tī後面看，無hō͘伊知影。當時我to̍h teh想，姊妹sīánchóaⁿ無ài排清潔輪值表，竟然hō͘兄弟整理chiahê心慒ê糞埽？to̍h是hitê timing，我早一分鐘、晚一分鐘經過，lóng bōe看tio̍h hitê對上主忠心排出ê背影。

當然，我mā無當場就愛tio̍h伊，只是學長對我來講，to̍h無koh是隱形人à。續落來，看tio̍h伊tiāmtiām做真chē檯面下ê雜chhùitāi、雜事，koh khah chē感受tio̍h伊對上主ê忠心。伊hō͘我想起耶穌ê教導：「bē tàng kā善事行tī人ê面前，thiau故意叫in看見，若是ánne，to̍h bē tàng得lín天父ê賞賜à。」（馬太福音6章1節）我感覺學長ê性命是我學習ê模樣。

兩年了後，伊畢業beh去做兵。一个設計科系ê學妹，有真chē創意kah tia̍p人ê齣頭，她就在學長tio̍h離開ê siōng尾一工約食冰。她沿路食，沿路kā伊講：「你kám知影陳鳳翔暗戀你？」驚kah學長嘴裡ê冰差點噴出來。伊煩惱chit時開始交往，未來ē有真chē困難，就講等伊兵做完，若陳鳳翔iáubōe 有男朋友，伊koh再追，koh請學妹mài kā我講chit項tāichì。

M̄ koh學妹根本無beh chhap伊，一食完冰，隨時衝tńg來宿舍對我tèⁿ大細目講：「鳳翔，我tú kah學長食冰。伊暗戀妳oh！伊講等伊兵做完，ē來追妳。」了後，學長做我ê男友，成做我ê先生。

幾年後，chit位學妹已經成做端莊得定ê傳道人。兩人相tú講起往事，她完全bē記得當年hit件事，真驚疑少年ê家己ná ē ánne幼稚。她ê反應hō͘我gîn大目chiu，to̍h親像隱藏tī經文內底ê「הֵּנ ִה」（看ah！），提醒我tio̍h注意chitê奇妙ê安排。我恬恬，敬畏上主，知影chitêchhòngtī是出tī上主控制ê timing。

一生ê timing

信主三十年，發生tī kakī身軀頂ê神跡，lóng是timing。我ê性命充滿「tú好是、tútn̄g、tú好」chiahê掩蓋版ê上主大作為。

成功大學畢業了後，第一份工作應徵系裡助教，我ê總成績中上，m̄ koh其中有一科三修，根本不可能上。卻因為chìn前想beh用電腦服事主，早to̍h修遍所有電腦課程，á這助教tú好tio̍hài管理電腦室，就ánne我hō͘錄取à。

Hit時tú好是網際網路開始興旺ê時。學長當完兵、考碩士，考tiâu成大候補第一名、交通大學第八名，阮希望ētàng候添補成大，兩人lóng留在台南。M̄ koh上帝beh伊去新竹，hia是資訊科技、網路tāi先進ê都市。

兩年了後，我嫁hō͘伊，阮tī交大團契做伙推動網路福音事工，帶學弟學妹chiūⁿ網傳福音。Tú好交大邊á有一間信義神學院，我入去讀道學碩士受裝備。Tú好美國宣教師丁偉佑博士（G. Waldemar Degner）來台灣教授新約，伊phah開咱原文讀經ê目chiu。一老兩小仝款有感動beh架設華語解經網站，提供siōng基礎、頂真ê聖經研究資料，提昇華人基督徒ê聖經水準。

「tú好是、tútn̄g、tú好」ê故事講bē盡，ta̍k pái lóng見證耶和華名「我是」ê意義。祂是時間、空間ê創造主！祂掌握控制時空，耶和華hō͘祂ê旨意行tī地上，親像同行tī天頂。看ah！一切lóng是祂ê timing！