《宋澤萊新著《天路拾穗》台譯版》

 | | | 轉寄

第二部：聖靈灌AK_主題20. 想beh叫「死人khiā起來」ê驚奇體驗

作者 宋澤萊 2026.07.19

第二部 聖靈灌ak

主題20. 想beh叫「死人khiā起來」ê驚奇體驗

　　 我beh講一个真實ê故事。Chit項tāichì應該是發生tī 2023年正月。　　　　 有一个人tùi 2022年底óa近過年ê時，下決心ta̍k工至少beh做2點鐘ê方言（靈語）祈禱，而且至少ài連續三個月ánne做。Tú開始chitê人to̍h非常認真，無論日時頭á是暗時，有時間to̍h祈禱，結果一工祈禱ê時間加起來算，非常可觀，往往有3~4點鐘hiah chē，chit段長期ê祈禱tī四月底終止，算算leh總共有四個月久。

　　Kiámchhái是chit種連續性ê方言祈禱ētàng hō͘人進入kah聖靈同在ê深層地帶，時常ē帶來某一kóa料想bē到ê神跡。比論來講，tī chit四個月內，有真chē bat kah m̄bat ê朋友一直來鹿港chhōe伊，in要求伊教in講方言，chitê人mā無拒絕過in，凡若前來ê人，差不多有八成ê人lóng tī 10分鐘內to̍h講出了方言，至少ētàng講出單音節ê方言。有一kóa少年人根本無需要加教in啥物，一坐tī伊ê面前，to̍h隨時講出相連續非常liúlia̍h大聲ê方言，真正是hō͘人驚惶憢疑。甚至iáu有人tī電話中kah伊做伙講方言，mā lóng ētàng tī 10分鐘內to̍h講出了方言。Chitê人根本to̍h m̄知是án怎ē發生chit款tāichì，只是感覺後面有一股神祕ê力量teh主導這一切，kah無任何能力ê伊本身無siuⁿ大ê關係。

　　　Tī chit期間，一件koh khah奇怪ê tāichì mā發生；發生ê時間大概是tī 2023年正月底。有一pái chitê人去一間有廣闊空間ê超商看冊kah作方言祈禱，伊坐tī koân腳ê椅á頂tahtah有兩點鐘久，大概是因為時間siuⁿ過久，忽然感覺攝護腺koh bē爽快起來。凡若有攝護腺腫大症頭ê朋友大概lóng知影，hit種無爽快to̍h是一種腫起來ê感覺，先tī下腹肚ê中央部位微微á痛，充滿到kui个下腹肚，了後koh傳到頂腹肚來，往往變kah患者不得不tháu開腰帶，來求暫時ê輕鬆。M̄知是án怎，chit pái攝護腺ê脹痛，hō͘伊非常受氣。大概是因為chìn前chitê人bat tī一pái ê異夢中，發見有一條黃色ê大蛇peh開大嘴，纏tiâu tī伊ê腹肚，tī下kha向頂面，對伊發出非常sáng勢ê挑戰姿態。所以以後凡若攝護腺痛，往往連帶叫伊想tio̍h異夢中ê hit尾蛇。Thang怨嘆ê是，久長以來，chitê人總是去藥房買一kóa藥á來治療脹痛，無gōa願意chhap chit種脹痛；換句話來講to̍h是罔渡罔過。伊ê 態度chhìnchhái thang看做是對攝護腺腫大á是hit尾蛇ê無taôa，甚至thang講是對in將近是一種一點á辦法都無ê反應。M̄koh chit pái，伊做完真長ê一段方言祈禱了後，忽然變kah真受氣，對in非常討厭。有一股力量tùi身軀內升koân，to̍h感覺伊ētàng居高臨下，完全制伏hit種脹痛kah hit尾蛇，而且感覺一定tio̍h對in報仇雪恨。伊先tī心內kah嘴裡粗魯咒罵一chūn'á，忽然奉耶穌ê名hōaⁿ手tī腹肚頂面，而且警告hit尾蛇，對牠講假使m̄離開，ánne to̍h由耶穌先kā牠摔落去地獄裡，á是chitmá to̍h用地獄ê火來燒牠，因為被火燒to̍h是牠oh得避免ê siōng尾運命。伊罵聲連連，一再驅趕牠出去！講mā奇怪，伊ê腹肚隨時開始直直發出咕咕ê響聲，腫真緊to̍h消落去，腹肚尾恢復扁平ê感覺，kantaⁿ tī幾分鐘時間內，脹痛phah無去à，kahná從來無破過病ê款（註：就ánne算起，一直將近五個gōa月了後，腹肚尾狀況照常ánne真好），伊to̍h知影伊已經被醫好à。

續接koh發生tī siōng頭前所講ê想beh叫「一个死人khiā起來」ê奇怪tāichì，to̍h發生tī攝護腺腫痛被醫好ê了後兩工。

Chitê人ē記得是tī hit工下晡，伊去khiā家邊á ê萊爾富超商買kóa飲料，了後，行過鹿港基督教病院，沿大街路行tńg去厝裡。伊手the̍h飲料，沿路行路，沿路作方言祈禱，身心感覺真快樂。To̍h tī離厝無遠ê青紅燈十字路口，發現街路tòpêng，有一戶人家當teh做喪禮，一个大大ê布棚架搭tī大廳門口，頂面已經罩帆布，內面開始teh做一kóa排設，mā有囤積一kóa喪禮用ê物件。大概是庫錢金紙iáu未開始燒，親chiâⁿ朋友mā iáu未來，kantaⁿ有一對少年ê男女tī棚架內外teh無閒進出，看起來iáu有kóa清淨。

伊tùi棚架頭前經過，to̍h親像hōaⁿ手tī攝護腺hit一pái仝款，有一股仝款ê力量高升起來，而且koh khah起koân聲，想beh制伏某種對立物ê hit種感覺koh出現à。伊忽然一時tī棚架頭前停步，m̄行à。Chitê舉動連chitê人kakī lóng驚惶憢疑起來，m̄知原因出tī tó位！

Chit種舉動是違反chitê人以往面對別人喪禮ê一貫態度。自細漢，伊to̍h是一个真驚看tio̍h喪禮ê人，大概自細漢to̍h是身軀衰弱，意志力軟chiáⁿ，凡若去到喪禮現場，lóng直覺感覺hit頭有亡靈存在，有tang時á iáu看tio̍h內面ê所謂西方三聖、地藏王菩薩á是十八層ê地獄圖，koh khah hō͘伊感覺恐怖kah oh得抵擋，感覺he是非常不吉祥ê所在。大漢以後，chitê人照常ánne；因為ánne，無論喪禮大細，只要伊看見一點點á形影，to̍h se̍h遠路避開，m̄ hō͘ kakī bak tio̍h一點點á衰運。算命ê人講這是「八字siuⁿ輕」所致，m̄koh伊ê八字是四兩，並無算輕，應該是kah八字無啥物關係。Koh khah深ê原因講這是自從青少年時期開始，伊to̍h一直感覺kakī性地無好，意愛犯罪，無人ētàng救伊，死了後註定難免ē漂流去冥界á是地獄，kah亡靈做伙teh過無ǹg望ê生活有關，「死亡了後」chit種物件真早to̍h成做伊人生ê一種咒詛。

M̄koh，講mā奇怪，chit pái chitê人竟然ētàng m̄驚別人ê喪禮，顛倒是tī喪禮ê頭前khiā定腳步。

　　一時á，hit股升koân ê力量變成一種衝動，hō͘伊感覺需要行過棚架，進入去客廳，叫hitê 已經死去ê人khiā起來，意思to̍h是去叫死人koh活起來，chit股力量koh khah是非常ê大湧。

　　M̄koh，仝款有一絲á細細ê擔憂感tùi hitê人ê心內升起，he to̍h是煩惱bóngtóng chông入去喪家，硬beh叫死人活起來，對m̄是一件無後果ê tāichì。假使伊to̍h ánne入去大hoah一回，若是死人活起來to̍h無事，若是無法度活起來，喪家ê人一定bē放伊soah，in定ē嚴厲指責，講伊是想beh破壞喪禮。

　　M̄koh，hit股力量實在漲kah真koân，衝動照常真大。Tī相牽連亂講之下，伊開始躊躇頓teⁿ，tī棚架前lōalōasô起來，tùi chit pêng行過去，koh行tńg來，sio連續行幾nā遍，siōng起碼有５分鐘久。終其尾，chitê人放棄à，行過青紅燈，氣chhoahchhoah tńg去到厝！

　　為啥物伊終其尾無行入去叫死人khiā起來leh？事後初步想tio̍h，應該是當時聖靈無koh再指示伊進一步ê行動，若是當時聖靈koh再hō͘伊有可靠ê信息，叫伊勇敢行入去，ánne伊一定一屑á都無懷疑，去叫死人khiā起來！

伊koh khah詳細分析，感覺hit股力量kah衝動to̍h是保羅tī《哥林多前書》所講ê九種恩賜ê「信心」，tī十二章裡保羅講：「聖靈彰顯tī各人身軀頂，是beh hō͘人得tio̍h好處。 有人藉着聖靈領受智慧ê言語；有人mā靠着仝一个聖靈領受智識ê言語； koh有人由仝一个聖靈領受信心；iáu有人tùi仝一个聖靈領受醫病ê恩賜； koh有人ētàng行異能，koh有人ētàng作先知，koh有人ētàng辨別各種靈，koh有人ētàng講方言，koh有人ētàng翻方言。」 Chia所講ê「信心」kah「因信稱義」所講ê信心chē少有kóa無仝，它是聖靈賜hō͘信徒ê超自然能力，hō͘信徒有醫病、趕鬼等等ê權能，通常衝動lóng是高漲ê。耶穌tī《馬可福音》11：23節講：「我實在kā lín講，無論啥人對chit座山講：『你徙開chit所在投tī海內底！』伊若心內無giâu疑，kantaⁿ信伊所講ê一定成，to̍h一定hō͘伊成à。」to̍h是teh指chit種「信心」。

Chitê人就ánne明白耶穌是án怎ētàng hō͘死人koh活ê原因。Tī〈約翰福音〉11章，tī伯大尼ê所在，耶穌bat叫一个拉撒路ê少年人koh活。當時拉撒路已經死去四工，而且已經埋tī墳墓裡。耶穌來到墳墓前，叫旁觀ê人kā墳墓前ê石頭徙開，了後gia̍h目ǹg天，講：「父ah，我感謝你，因為你已經聽我。我mā知影你tiāⁿtiāⁿ聽我，m̄koh我講chit句話是為周圍khiā leh ê眾人，叫in信是你差我來ê。」 講chit句話了後，to̍h大聲hoah講：「拉撒路出來！」Hit个死人to̍h出來à，腳手用布包leh，面chiūⁿ包手巾。耶穌對in講：「Tháu開，叫伊行！」拉撒路to̍h完全復活。像chit種能力，to̍h是來自極koân ê信心能力。

仝款ê，chit種ētàng叫死人koh活ê能力，tī今á日ê 20、21世紀照常存在，出世tī 1859年ê英國人史密斯‧維格氏維爾（Smith Wigglesworth）mā有chitê能力，伊tiāⁿtiāⁿ為破病á是臨死ê人做連續性ê祈禱，一生大概hō͘ 20人tùi死裡koh活。有一pái伊為一个叫做米齊（Mitchell）ê信徒祈禱，tī米齊ê厝，米齊ê牽手已經證實講kakī ê翁婿死去，維格氏維爾ê牽手mā叫伊停止祈禱，伊to̍h是m̄信邪，連續大聲祈禱，了後，米齊有koh活，而且自ánne 活kah好勢好勢。Chiahê tāichì lóng記載tī《無停增長ê信心》chit本冊裡（註1）。可見ētàng hō͘死人koh活ê能力，tī現代mā無看做是絕對ê稀奇！

──2023、07、01 tī鹿港

註1：史密斯‧維格氏維niâ tio̍h：《無停增長ê信心》（台中：瑞馬出版社，2009年初版），beh/ài/tio̍h/會買chit本冊請點擊下kha網址：https://www.rhemapublishing.com/all/allproducts1.html