《宋澤萊新著《天路拾穗》台譯版》

 | | | 轉寄

第二部：聖靈灌AK_主題13：宋澤萊kah吳錦發筆談講方言（靈語）ê經驗

作者 宋澤萊 2026.05.31

第二部 聖靈灌ak

主題13：宋澤萊kah吳錦發筆談講方言（靈語）ê經驗

踏話頭：這是筆者kah吳錦發ê一篇面冊筆談。內面siōng重要ê部分是解破吳錦發講方言（靈語）ê神奇經驗，ētàng chiahni̍h詳細koh詳實陳述出來ê真少！吳錦發ê講方言經驗過程真獨有特殊，是tùi聖靈降tī伊身軀頂，了後由伊自發性講出來ê，看起來chiok有氣勢！伊因為ánne經過聖靈ê洗禮，深lònglòng感受tio̍h上主所掩蓋ê無限奧秘。

※ 正月14日早起面冊筆談：

宋澤萊：我tú kah胡長松通電話，伊講你bat講過「方言」，也to̍h是一種kah上主溝通ê語言，講ê人無一定知影he是啥物意思，m̄koh ētàng一直講kah無停，mā有一kóa教會講這叫做「靈語」。下一pái若是聖靈ài你講chit種語言，你m̄thang tī心內阻擋，chhōe一个別人聽bē tio̍h ê所在，大聲講出來，講kui工mā無要緊，直到你thiám à無想beh koh講為止lóng thang。這mā是一種聖靈ê恩賜，m̄免驚惶憢疑。

吳錦發：我大約十年前開始，tiāⁿtiāⁿ tī半暝醒起來，忽然講起我m̄ bat ê語言，m̄koh he是有組織ê語言，我tiāⁿtiāⁿ因為ánne想beh抵抗，一直到想beh制止ê時念「阿們」，就ánne停落來。大約兩年前，koh有一pái，當我半暝醒起來ê時，試探來開嘴，一直講，到講「阿們」ê時to̍h停止。M̄koh日時頭kahná無法度ánne，chitmá khah少à。Tú開始，我驚是精神症頭，後來偷偷á問幾个人，in lóng講無chit種經驗；想beh問神父，m̄koh頭尾一直無開嘴。有時確定koh有準則感覺ná親像是古拉丁語，有兩pái確定是古日語，lóng m̄知影它是啥意義。我前到taⁿ m̄ bat學習過chit種語言，chit種經驗超過50 pái，bat kah一个精神科醫生朋友講，她回答講：「次數漸漸減少to̍h無要緊。」

宋澤萊：方言是應該tiāⁿtiāⁿ講ê，它ē引起真chē神跡奇事；同時mā ētàng減輕心內憂傷，得tio̍h安慰。

吳錦發：頭殼是清醒ê，嘴soah一直講，m̄koh心是平靜ê，直到我開嘴念出「阿們」，to̍h隨時ē停落來。

宋澤萊：我hō͘你一kóa講方言影片，to̍h是chit類ê語言。其中有一个美國人甘堅信牧師，是方言ê領袖，伊ētàng瞬間用聖靈phah倒一大片信徒，lóng是tùi方言來ê。Tī影片中，甘堅信先用英語祈禱一chām'á，了後to̍h長時間用方言祈禱，你先看bāi leh，影片網址如下： Http://www.youtube.com/watch？v=9ew4XXc1c5k

另外有一个影片，mā是甘堅信講道ê現場，有一个心臟患者講伊有心臟病，伊可能ē死。當伊講話ê時，是先用英語講，m̄koh甘堅信牧師同時祈禱伊ētàng講方言，了後，伊隨時講出相連續ê方言。甘堅信koh再根據伊講ê方言kā它翻譯，內面有一句上主ê話，講伊ê心臟病ē得tio̍h醫好，伊bē死，請你mā看māi！影片網址如下： Http://www.youtube.com/watch？v=rU3NhwqufaI

吳錦發：無m̄ tio̍h，驚一tiô，的確to̍h是chit種語言。Tú開始ê時，我tiāⁿtiāⁿ tī床頭khǹg一本《聖經》，beh睏chìn前，随便讀一段，不知不覺它就出現à。我ē tī床頭khǹg《聖經》，是因為我體質特別對陰ê事物有感應。我受洗了後，to̍h koh khah án怎都無陰ê來óa近我，m̄koh hit kóa我m̄知ê語言koh khah tiāⁿtiāⁿ出現à。

宋澤萊：你繼續講，m̄thang停。當然若是有人ētàng翻譯出來siōng好，無人翻譯mā無關係。平常心情無好ê時to̍h講一下，心情好ê時koh khah應該講。Chit種to̍h ētàng訓練出一流ê講方言ê本領à。我hō͘你ê chiahê影片thang加看幾pái，增加kakī對方言ê認bat，chiah bē hō͘人m̄知beh án怎。現在有kóa教會非常反對信徒講方言，這是m̄ tio̍h ê；in bē曉講方言卻反對別人講，實在對聖靈真失禮；你m̄免chhap in，你盡量講方言來親近上主，m̄免客氣。

吳錦發：Chìn前我tī文建會任內mā有講方言ê現象，hit時我受命處理籌設「人權園區」ê人權平反事務。後來koh tiāⁿtiāⁿ出現tī屏東文化處，我為tio̍h保護古蹟，開始主張修護廢棄 ê天主教堂，而且完成其中一座「玉環教會」，我一直對聖母真有感應。五十gōa歲了後ê我出現chit種神祕ê經驗，實在是hō͘ 我大驚惶ê憢疑à。

宋澤萊：你有方言to̍h盡量向耶穌講，先tī心內對耶穌講你beh講方言，了後to̍h開始講。講soah ê時koh再向耶穌說多謝，ánne to̍h ēsái得à。基督徒一切lóng對耶穌負責，得救á是講方言lóng來自耶穌ê信仰，尤其是一定tio̍h有信耶穌死了後三工koh活ê私人理由，而且敢tī ta̍k人ê面前大聲講出信耶穌koh活ê理由hō͘別人聽，chiah真正大功告成，算是tī信仰上chiok有成就。關係聖母，thang暫時khǹg tī邊á，拜á是m̄拜lóng無所謂。基督教ê核心信仰kantaⁿ有一點，to̍h是信耶穌死了後三工koh活。Án怎chiah算是信leh？To̍h是ài有kakī獨有特殊ê一套理由，m̄管án怎tio̍h chhōe出理由，總講一句to̍h是ài有一套屬tī kakī ê理由！

吳錦發：Tī我心內聖母kah耶穌是一體ê。我ê外公、阿姨、我三代人lóng有靈異體質，阮阿姨ê chabó͘ kiáⁿ甚至ē看tio̍h，她做護士m̄敢tī加護房。我chìn前去各種廟寺to̍h ē有感覺，chitmá受洗了後真自然to̍h無想beh親近hit所在，只chhun kakī土地頂面自細漢成長ê土地公祠有tang時á iáu ē tú tio̍h。

※ 正月15面冊筆談：

吳錦發：Êng暗睏前hōaⁿ《聖經》祈禱，到至誠ê時竟然禁bē tiâu無停講方語，kā《聖經》随意掀開，方言竟然快速讀過，全是m̄ bat ê語言，語音超出12音節以上，m̄是平常ētàng讀ê速度吐出，非常驚惶ê憢疑lah，這是頭一pái thang自主講方言。M̄知是啥物？Mā kiámchhái只是喉音亂講？我想自然to̍h好，hō͘它自然來去siōng好lah。

宋澤萊：信徒頭一pái tùi聖靈感動ē曉講方言，續接to̍h ē kakī隨意講方言，收放自由自在，to̍h kahná頭一pái學ē曉泅水，以後一生隨時lóng ē泅水，這是真自然ê。方言thang分做兩種：一種是單音節方言，只有講一个音，比論講「lah lah lah lah」á是「tatata答」，親像gín'á tútú ē曉講話，這是比較khah簡單ê，並m̄是語言，無法度翻譯。另外一个種是多音節方言，比論講「堪卡利多利帝斯……」chit種一直講，kahná外國語言，kah一般ê語言ēsái講是無差別，只是有真chē舌音而已，chit種多音節ê方言是語言，因為ánne ētàng翻譯，內容可能是oló，mā可能是上主交帶ê話，若是ētàng翻譯出來，講ê人to̍h可能ē變成先知。M̄管單音節á是多音節，lóng是方言，lóng來自tī聖靈ê恩賜。台灣一般ê教會tī禮拜聚會ê時無講方言，kantaⁿ有一兩个教會tī禮拜ê時kiámchhái ē做伙講方言幾分鐘，你thang好膽去kah in做伙祈禱，m̄免驚。你講ê應該是多音節ê方言，我有一篇文章分三pái登載tī網路《基督教通訊》裡，叫做：〈你mā ētàng教人講方言（靈語）〉，點閱率破萬。我ē曉講方言mā是tùi聖靈ê感動所帶來，m̄koh卻是tùi連續念誦「哈里路亞」chit 4字，直到聖靈降臨身軀頂to̍h ē曉講方言；所以我thang教導別人án怎講方言。阮鹿港信義會ê信徒lóng ē曉講方言，大部分lóng是我教導ê。我chitmá kā chit篇談我án怎講方言kah án怎教人講方言ê文章傳hō͘你，將來你mā thang ánne去教人講方言，網址如下： Http://christcom.ning.com/....../ni-ye-ke-yi-jiao-ren......

吳錦發：就你講ê方言，我是兩種lóng有：多音節ê一直講，中間tútn̄g出現相連續「答、答、答...」ê連串快速音，tútn̄g iáu ē有一、兩pái giú長音親像吟oh。

宋澤萊：Ánne是真好，實際上是多音節方言裡掩蓋單音節；m̄koh單音節方言無法度掩蓋多音節。這to̍h是是án怎有一kóa教會ê人bē曉講多音節方言ê原因，in kantaⁿ ē曉講單音節，你去in hia做禮拜，祈禱to̍h ē知影à。有時chūn阮唱歌，kā歌詞改做方言，to̍h變成靈歌à。

吳錦發：明白，經過你一講，我心安loh，bē驚à。本來因為無法度清楚發生啥物tāichì，tī這chìn前mā m̄bat聽過方言ê講法，kantaⁿ少年ê時tī部落ê真耶穌教會中，看過原住民祈禱，大聲hoah；有kóa人悽慘哭，流目屎，驚一大tiô，到taⁿ iáu印象深刻。我出現chit種現象mā m̄敢對人講，驚人講我「起siáu」！Chìn前kakī讀聖經，看tio̍h「講方言」三个字，掠做是teh指當時耶路撒冷ê所在「方言」。

宋澤萊：Chitmá講方言ê教徒叫做五旬節教派，目前tī亞洲、非洲、拉丁美kah美洲，總共有一億gōa人，是世界siōng大ê基督教派。Tī維基百科ētàng查tio̍h五旬節教派ê解說，看bāi leh to̍h ētàng有大概ê了解。五旬節教派ê信徒無一定lóng ē曉講方言，大概ē曉講方言ê人有2成左右，算起來目前世界上siōng少iáu有2千萬人ē曉講方言，數目非常龐大，並無稀奇！

※ 正月16面冊筆談：

吳錦發：今á日夫人去同學會，無tī厝，我kā門關起來讀經、祈禱、呼hiàm耶和華，竟然有暖流tùi頭灌落來，了後禁bē tiâu一直講方言，而且目屎流目屎滴。我告解罪，方言足足講了一點鐘，好佳哉夫人無tī leh，若無，她kiámchhái ē嚇tio̍h驚，感覺不可思議。結束了後kui身軀sùsī爽快，料想bē到ê平静。別人若是看我講方言，一定ē講「siáu人ê語言」，實在chiok神奇lah，人生頭一pái hiahni̍h大ê衝擊。以後，我應該án怎回應？

宋澤萊：直講方言to̍h已經是回應à，請繼續用方言祈禱，因為對你靈命ê成長有大ê幫贊kah利益。同時chhōe為別人祈禱ê機會，khah chia̍p為kakī ê牽手kah kiáⁿ兒祈禱，mā為親chiâⁿ朋友祈禱。無論in有健康、經濟、工作、生活ê困難，lóng為in祈禱。Thang用普通ê語言先祈禱，了後用方言祈禱，來訓練kakī祈禱ê效果。日日祈禱，chē chē祈禱。

吳錦發：今á日ê經驗hō͘我進一步有堅定ê基督信仰。我phah算beh kā夫人說明，而且為牽手kah chabó͘kiáⁿ祈禱。阮牽手mā是一般民間信仰出身ê家庭，她kiámchhái一時之間無法度轉變念頭，我對基督認bat雖然iáu淺，m̄koh我ē kā她講我ê體驗，hō͘她明白。今á日ê衝擊非常大，是我性命ê重要體驗。Chìn前少年時常kā《聖經》當做故事來讀，有時iáu非常抵抗，無想tio̍h它所講ê lóng是真實ê存在。

宋澤萊：聖靈tùi頭殼頂面灌ak落來，這to̍h是受聖靈ê洗，是一種真深ê基督教體驗。你若是短暫勸bē振動你ê夫人來受洗，mā m̄免急。Tiāⁿtiāⁿ替她á是她ê親chiâⁿ朋友祈禱，hō͘她慢慢á了解信基督教ê好處to̍h ēsái。我想她ē接受你為她á是她ê親chiâⁿ朋友祈禱。

※ 正月20面冊筆談：

吳錦發：只是講，kakī iáu bē明白，是án怎頂pái聖靈降臨，大講方言，而且目屎流目屎滴一點鐘久chiah停止。M̄koh最近兩pái我祈求，祂煞没koh來，只是心內平静。頂pái聖靈來ê時，kui身軀暖流sùsī爽快無比，方言ná講ná緊koh ná哭。不可思議，事後，親像kui身軀被洗清氣一般。

宋澤萊：方言ētàng kakī講，tio̍h算無聖靈明顯ê降臨mā thang講，無一定ài祈求。

吳錦發：Ē記得hit時是下晡一點左右，我一个人關tī室內，半跪leh讀《聖經》祈禱，呼求耶和華、耶穌基督，祂to̍h來à。Tī清楚自主ê祈求下講方言，已經有兩pái ê經驗。我m̄ bat án怎祈求，只是祈求耶和華、祈求耶穌基督三pái，聖靈竟然真正來à，我無師自通。

宋澤萊：因為你已經有講方言ê經驗，只要憑信心，按照你前幾pái講方言ê經驗，隨時lóng thang講。若是ta̍k pái lóng tio̍h聖靈降臨chiah講，he iáu無夠自主。你tio̍h走chhōe kakī chitmá to̍h ētànḡ講出來，ánne to̍h大功告成à。

吳錦發：性命中無任何經驗thang比並。「kui身軀被洗盡」，我用chitê形容詞，你一定ētàng明白意思。

宋澤萊：聖靈降臨ê目的是hō͘你有神聖ê經驗，ētàng明白上主ê無所不在kah神秘ê基督奧秘，hō͘你一下á to̍h進入基督教ê深深ê所在。了後koh再照起工一步一步來，慢慢á koh khah熟手。Tī基督教早期（保羅iáu活leh ê時）lóng要求信徒ài受兩个洗禮，一个是水ê洗禮，另外一个是聖靈ê洗禮。後來聖靈ê洗禮被廢棄掉，信徒to̍h變kah真淺薄。

吳錦發：無m̄ tio̍h，我kakī thang講，m̄koh我無確定he是m̄是靈語，m̄koh聖靈降臨hit一pái，因為語言m̄是我所控制ê，siōng重要ê是kui身軀被暖流包圍à。

宋澤萊：你經歷tio̍h ê to̍h是聖靈ê洗禮。若是有機會，我ētàng陪你講方言。Chitmá你mā thang去一kóa講方言ê教會kah真chē信徒做伙講方言。Kah大家做伙講方言比kakī單獨講方言ē koh khah有氣力，氣勢koh khah強大！

吳錦發：Chìn前十年，是tī半暝半麻霧中出現講方言，清醒親像旁觀者，chit兩pái mā是完全清醒。因為看你ê文章beh信koh憢疑，主動呼求上主，祂竟然證明hō͘我看，hō͘我siōng大ê衝擊是，聖靈kahná teh講：「你chitê信仰無堅定ê人，我顯現hō͘你明白！」

宋澤萊：你m̄thang孤一个人走chhōe，ài去有聖靈ê教會kah真chē人做伙禮拜，答嘴鼓，ánne進步chiah ē緊！

吳錦發：OK。

宋澤萊：開放kakī，無驚惶去挑戰，加看加學，ánne to̍h ētàng日日有進步，jú來jú有深度。

──2022、01、21貼tī《基督教通訊》