《宋澤萊新著《天路拾穗》TOJ/台灣字版》

 | | | 轉寄

Chútê 3：Kì hó pêngiú Ô͘ Tiôngsiông sìn "Iésu síkhì kohoa̍h" ê kò͘sū

作者 Sòng Te̍klâi 2026.01.18

Tē it pō͘ Chhenggī titkiù
Chútê 3：Kì hó pêngiú Ô͘ Tiôngsiông sìn "Iésu síkhì kohoa̍h" ê kò͘sū

Ô͘ Tiôngsiông sī Chhenghôa Tāiha̍k chusìn hē ê se̍ksū, chitgia̍p sī chi̍t ūi chusìn ê kangtêngsu. I ētàng sìn "Iésu síkhì kohoa̍h", sī tī góa ê ìliāu chi gōa.

Tī 1995 ~ 1997 nî chi kan, Ông Sèhun hiaⁿ kah góa tī tiongpō͘ pān "Tâioân sin bûnha̍k cha̍pchì ", cha̍pchì ê miâchheng sī iânsio̍k Ji̍t tī sîtāi Iûⁿ Kûi siansiⁿ tī tiongpō͘ só͘ pān ê "Tâioân sin bûnha̍k cha̍pchì". Goán ê bo̍ktek sī tōaliōng hoatkiàn sin ê chokka, hō͘ Tâioân bûnha̍k ê púnthó͘ hoánkhòng chengsîn miāme̍h bē tìsú kah tn̄gchām. Ēkìtit hit sî, góa chhōe chin chē bûnha̍k hēsó͘ ê tāiha̍k kàusiū, chhiáⁿ in siāukài in ê chāiha̍k tēchú, ūi goán siá bûnchiuⁿ, bôlūn bûnha̍k chhòngchok á sī bûnha̍k phênglūn, goán lóng ē chīnliōng khanteng. Só͘í "Tâioân sin bûnha̍k cha̍pchì" siàuliân hòa kah chin līhāi, siá kó ê lâng chhaputto lóng sī jīcha̍p hòe kàu saⁿcha̍p hòe chi kan.

Ô͘ Tiôngsiông tongsî iáu teh tha̍kchheh, jīcha̍p chhutthâu hòe. I seng lâi chhōe góa, bô gōa kú siá oân tn̂gphiⁿ siósoat "Chhâsoaⁿ siàuliân anhûn khek", kià lâi hō͘ góa.

Chit phiⁿ siósoat tòa lâi hō͘ góa chin tōa ê kámtōng.
Siósoat ê lōeiông sī biâusiá chi̍tê siàuliân satjînhoān Tō͘ ThiⁿIóng tùi chhutsì, sêngtióng, hoānchōe kàu síbông ê jînseng tété ê kò͘sū. Siósoat chhiongmóa tùi sèⁿmiā ê hoánséng, hiōhóe, íki̍p bûnāihô ê jînseng chióngchióng hoānchōe púnsèng. Tī kui phiⁿ ê siósoat tiong, paukoat chúkak Tō͘ ThiⁿIóng púnlâng, hoānnā khanliân chāilāi ê lâng, bô chi̍tê sī hēnghok ê, chiahê ēchàn siāhōe ê Tâioân lâng lóng tà tio̍h tōa puthēng; iûkî sī Tō͘ ThiⁿIóng, i ū tōngbu̍t itpoaⁿ sianthian ê thó͘la̍t, m̄koh iâⁿ bē kòe kakī sianthian kôngpō ê sèngkeh kah phîkhì, kantaⁿ ētàng itchài hoān m̄ tio̍h, siōng bóe sī síbông. Che to̍h sī Hoatkok siósoat tōa chokka Émile Zola, Guy de Maupassant chi̍t sìlâng só͘ beh piáuta̍t ê lâng ê sengbu̍t ha̍k chútê, bûnha̍k súsiōng kiòchò "chūjiân chúgī" ê siósoat.

I bat tngbīn kā góa kóng, chit phiⁿ siósoat ū kóa chêngchiat sī i ê sèⁿmiā kengle̍k.
Chiahni̍h siàuliân ê siósoat ka kèngjiân ū chiahni̍h tōa ê thàusī la̍t, ētàng hoánséng sèⁿmiā siōng kinpún ê būntê, si̍tchāi chin hō͘ góa kiaⁿhiâⁿ giâugî!
Chit phiⁿ siósoat to̍h liânchài tī "Tâioân sin bûnha̍k cha̍pchì" téngbīn, āu lâi iû Chiânōe chhutpánsiā chhutpán, bat tit tio̍h 1997 nî "Ông Sèhun bûnha̍k chióng".

Chhúāu, i chòpeng, kiathun, kèsio̍k siá siósoat, tī 2002 nî, choánhiòng Tâigí chhòngchok, khaisí oa̍ttho̍k Jījīpat chuliāu, susiá sio liânsòa ê Jījīpat sūkiāⁿ siósoat, biâusu̍t Tâioân lâng siōng puthēng ê ūnmiā kah chogū, pitla̍t chhimkāu, ū pînchún koh ū kinkì!

Goán ê ónglâi inūi ánne piàn kah koh khah chhinbi̍t.
2004 nî chóiū, Tân Jînchong bo̍ksu, Ông Sèhun hiaⁿ, Sêngtek huhū tiāⁿtiāⁿ lâi goán tau chūhōe, thàmthó Iésu ê būntê. Góa tī Gō͘ goe̍h siūsé liáuāu, koh khah tiāⁿtiāⁿ tī Chionghòa Kheô͘ Tìn Sìngīhōe kàuhōe chhamka lépài. Chit sî, Ô͘ Tiôngsiông mā tiāⁿtiāⁿ lâi Lo̍kkáng chhōe góa, chiū kah Sìngīhōe ê kàuiú píchhú jīnbat. Tôngsî inūi Ô͘ Tiôngsiông sī siá siósoat ê lâng, i chìnchêng tongjiân khòaⁿkòe úitāi siósoatka Tolstoy ê tùchok "Hokim su", tùi Iésu bēsái kóng oânchoân bô jīnbat.

Tāikhài sī inūi ánne, i sánseng tùi sìngióng Iésu ê hò͘ⁿkî.
Góa iáu ēkìtit ū chi̍t pái, i hn̄ghn̄g tùi Kohiông lâi kàu Lo̍kkáng tìn ê goán tau, goán kóng tio̍h sìn Iésu ê ji̍pmn̂g honghoat.

Góa kóng, "Ji̍pmn̂g ê hongsek chin kántan, to̍h khòaⁿ lí kám ētàng siongsìn 'Iésu síkhì kohoa̍h' chit hāng tāichì. Inūi chit hāng tāichì chin oh sìn, thongsiông lán suiàu chi̍tê hó líiû, chiah ētàng siongsìn. Líiû ittēng tio̍h kakī khì chhōe, nāsī lí ētàng chhōe tio̍h chi̍tê sio̍k tī kakī ê bē bái ê líiû, tngbīn kā góa kóng, he to̍h ēsái tit à."

Ô͘ Tiôngsiông kóng, "Góa chhì khòaⁿ māi!"
Tāikhài kòeliáu chi̍t kògoe̍h á sī koh khah kú, i koh lâi kàu goán tau, goán koh khaisí tâm sìn Iésu ê ji̍pmn̂g honghoat. I kóng, "Kengkòe phahpiàⁿ sukhó, góa khaktēng góa íkeng ētàng sìn 'Iésu síkhì kohoa̍h' chit hāng tāichì à!"

Góa ū kóa ìgōa, to̍h mn̄g ,"Chiahni̍h kín! Líiû sī siáⁿmi̍h?"
I kóng, "Góa sī tùi 'útiū po̍kchà' chitê lílūn lâi thuilūn chhut 'Iésu síkhì kohoa̍h' ê khólêng sèng."

Góa chi̍t thiaⁿ, sûisî chaiiáⁿ i kóng ê sī siáⁿmi̍h. Suijiân góa m̄ sī líkang kho ê ha̍kseng, m̄koh tùi "útiū po̍kchà" ê lílūn iáu siókhóa ētàng líkái.

Lán chaiiáⁿ, "útiū po̍kchà" ê tōa phekle̍k koantiám ánne kóng, "Útiū sī tī kòekhì iúhān ê sîkan chìnchêng, tùi chi̍tê bi̍ttō͘ ke̍k tōa jîchhiáⁿ untō͘ ke̍k koân ê thàichho͘ chōngthài iánpiàn jî lâi; kinkì 2013 nî Planck ōechheⁿ só͘ tit tio̍h ê siōng hó koanchhek kiatkó, útiū tōa phekle̍k kàu chitmá 137.98 ± 0.37 ek nî, jîchhiáⁿ kengkòe puttoān ê phòngtiòng lâi kàu kin'áji̍t ê chōngthài. Khoha̍kka bat chhek chhut bo̍kchêng chheⁿhē kah chheⁿ thoân chi kan píchhú ê kīlî tú teh puttoān chengtōa, lóng soatbêng in tī kòekhì bat kīlî chin kīn. "Tùi chitê koantiám, bu̍tlí ha̍kka to̍h chìnchi̍tpō͘ thuichhek chhut, "tī kòekhì útiū bat chhù tī chi̍tê bi̍ttō͘ ke̍k koân jîchhiáⁿ untō͘ ke̍k koân ê chōngthài, chitmá tōa hêng lia̍pchú kasok khì tī lūisū tiâukiāⁿ hā só͘ chìnhêng ê si̍tgiām kiatkó, mā chin ū la̍t chichhî chitê lílūn. Nā bô, ū chi̍t kang, útiū ē thêngchí khoktiong jîchhiáⁿ khaisí siusok. Siōng bóe, só͘ū ê bu̍tchit siusok kàu chi̍tê bô théchek ê tiám téngbīn, iā to̍h sī tongchho͘ tōa phekle̍k tú khaisí chōngthài ê hitê kîī goântiám."

Ô͘ Tiôngsiông to̍h sī tùi chitê útiū phòngtiòng siusok ê lílūn, lâi líkái Iésu ētàng síkhì kohoa̍h ê hiānsiōng; iā to̍h sī kóng Iésu ê sí to̍h chhinchhiūⁿ útiū ê siusok, á kohoa̍h ná chhinchhiūⁿ útiū ê kohchài phòngtiòng kângkhoán. Chit chióng khòaⁿhoat huisiông hôngkoan, tī khoha̍k téngbīn mā sī ū kin ū kì.

Tng i kóng i ētàng sìn "Iésu síkhì kohoa̍h" ê sî, sī tī góa ê khehthiaⁿ ni̍h, tongsî góa pēng bô hoatkiàn i ū kohiūⁿ ê khoán. Góa simlāi siūⁿ, "Che khólêng chísī i só͘ chò ê chi̍t chióng ū chhùbī ê thuilūn jîí, tāikhài bē tìsú kah ū siáⁿmi̍h kiatkó!" Liáuāu bô gōa kú, i kòsî, khísin sáichhia tńgkhì Kohiông à.

Tī i tńg kàu chhù liáuāu, i khà tiānōe lâi.
I kóng, tī i tńgkhì chhù ê lō͘tô͘ tiong, i kámkak kakī chin bô tùitâng; i hutjiân tùi kakī kámkak ū kóa chheⁿso͘, khaisí tùi chìnchêng ê kakī thóià khí lâi.

Chìnchêng góa siókhóa chaiiáⁿ, Ô͘ Tiôngsiông suijiân siàuliân, m̄koh tī i ê jînseng tiong ū chin chē tiōngtāi ê siongthiàⁿ kenggiām, tī i ê sinsim téngbīn, i bô hoattō͘ tùi pa̍tlâng kóng chhut, pa̍tlâng thâubóe itti̍t lóng m̄chai. M̄koh, i ê siósoat lóng teh soatbêng, chiahê siongthiàⁿ kenggiām kiámchhái huisiông tîmtāng.

I kóng i khaisí thóià kakī, tāikhài sī teh chí i bat inūi chiahê tōa siongthiàⁿ bô hoattō͘ goânliōng bó͘ chi̍tkóa lâng ê chhimchhim ê siûhūn.

Lán chaiiáⁿ, tī chitê sèkài siōng, chin chió lâng ētàng thóià kakī. Nāsī bó͘ lâng khaisí thóià kakī, he ittēng sī íkeng khòaⁿ chhut kakī sèⁿmiā tiong ê kēlō͘ kah chhògō͘; tio̍hsǹg íchêng siū tio̍h pa̍tlâng ê tōa sionghāi, m̄koh i íkeng ū pānhoat kakchhat tio̍h i mā tio̍h hū chi̍tpòaⁿ ê chekjīm. Ánne, i beh kèsio̍k hūn tùihong, mā piàn kah ū kóa khùnlân lah.

Kójiân, Ô͘ Tiôngsiông kóng, SiōngChú ài i hòngkhì tùi bó͘ lâng ê chhim siû tōa hūn, tuikiû chi̍tê sin ê chūngó͘. Tng i bē giàn hòngkhì ê sî, SiōngChú to̍h hō͘ i aple̍k, hō͘ i bô hoattō͘ thesî. I kah SiōngChú chi kan khaisí piàⁿ chhiúbóe.

I kóng, tī tàucheng ê tiongkan, i kámkak bô lâng hó óakhò; m̄koh, i bêngpe̍k thiaⁿ tio̍h Iésu kā i kóng, "Lí sī ánchóaⁿ m̄ lâi óakhò Góa!"

Chit tiûⁿ chengtàu kiámchhái sī huisiông keklia̍t, ētàng iôtāng i kinpún ê sèⁿmiā. Góa sī gōalâng, jîchhiáⁿ bô oânchoân chhengchhó.

M̄koh, hiānsiōng hiánsī, tùi i kóng i sìn Iésu síkhì kohoa̍h, bô kàu chi̍t kang, Sènglêng íkeng tī i ê sèⁿmiā tiong tāngkang, khaisí ài i jīnchōe, hóekái, hòngkhì hit kóa ētàng tìsú i sí ê tōa oànhūn, i só͘ tit tio̍h ê inhūi sī hiahni̍h tōa!

Tûliáu che ígōa, góa kiò i khoàisok liām " Halélú’iah " chit sì jī, i mā chin iông’ī kóng chhut honggiân（chi̍t chióng ētàng kah SiōngChú kauthong ê lênggí）.

Ô͘ Tiôngsiông hit sî khaktēng sī oânchoân káichong sìn Iésu à, jîchhiáⁿ khaisí kiâⁿ ji̍p Sènglêng kah i tôngchāi ê chōnghóng tiong.

Bô gōa kú, i to̍h tī Chionghòa koān Kheô͘ tìn ê Sìngīhōe siūsé à.
Sòachiap, Sènglêng koh hō͘ i chin chē ê inhūi.

Tiongkan ū chi̍tê inhūi sī, i ētàng thiaⁿkìⁿ SiōngChú ê siaⁿim, iā to̍h sī ētàng tī sengoa̍h tiong thiaⁿ tio̍h SiōngChú hō͘ i ê ōegí.

Lēnggōa, i koh ū chin chē ê ībāng. I bat kā góa kóng, "Ū chi̍t pái, góa tùi SiōngChú kîtó kóng, góa kám titkiù à?" Tī ībāng tiong SiōngChú to̍h kā i khǹg tī chi̍t tiâu hôliû ê koân ê só͘chāi, liáuāu, chi̍t chūn tōachúi kòe lâi, kā i chhiong lo̍h khì, i khoàisok sūn lâu lo̍h khì, chhiongkòe kúiê chó͘tòng i ê siâok koankhá, siōng bóe anún lâi kàu chi̍tê pêⁿtē ê chhītiûⁿ.

Chitê ībāng īkò i chionglâi tiāⁿtio̍h ētàng lâi kàu sin thiⁿ sin tē.

2015 nînî té, i ê siósoat chóng sêngkó tit tio̍h tē saⁿcha̍p peh kài ê Gô͘ Samliân bûnha̍k chióng, ētàng í chiahni̍h siàuliân to̍h tit tio̍h púnthó͘ siōng tōa koh te̍kpia̍t ê bûnha̍k êngkng, kású bô sîn ê inhūi sī chin oh chò kàu. Liáuāu, i tī chi̍t tiûⁿ ìgōa ê simhiat koán ê pēⁿchèng tiong, khoàisok tô kòe chi̍t kiap, anún bô sū; liāusióng che mā sī lēnggōa chi̍tê SiōngChú ê inhūi. Chiahê kîchek, lóng soatbêng SiōngChú kah i tôngchāi ê sūsi̍t.

2017 nî chêng pòaⁿ nî, góa bat kā i kóng, "Sènglêng ētàng lāichū tī lán ê hengpak ni̍h, bô koh līkhui. "I sûisî hoatkiàn Sènglêng kójiân to̍h lāichū tī i ê sengkhu ni̍h, i íkeng piànsêng Sènglêng ê tiān.

2017 nî Chhit goe̍h, i tī i ê FB téngbīn PO chhut i siá ê chi̍t siú Tâigí si kiòchò 〈phongphài ê hái〉, lāibīn ū kúi chōa siá kóng：

"Hōaⁿ piⁿ hoehtông ê hio̍h'á chhinchhiūⁿ khoesìⁿ
Kimsek ê tiàuteng’á hoe chi̍t pha chi̍t pha kòa tī chhiū téng
Tiám to̍h háipêngsòaⁿ ōaⁿsin ê chháihûn
He sī sin ê lênghûn tī chahng siausit khì
Liáuāu tùi háité phû chiūⁿ chúibīn"

Tī chia, lán chùì tio̍h i kóng, "sin ê lênghûn tī cho̍hji̍t sitkhì, āu lâi koh tùi háité phû chiūⁿ chúibīn." chitkù ōe. Só͘ūi "sin ê lênghûn" to̍h sī "sin ê sèⁿmiā", chitê sin sèⁿmiā to̍h sī "Góa sī alfa, Góa sī omega, Góa sī chho͘, Góa sī chiong" ê Iésu ê sèⁿmiā.

Chióngchióng chiahê tāichì sī gōani̍h'á sînkî! Ánne khòaⁿ khí lâi, lânglâng lóng engkai tio̍h ū chi̍tê sìn "Iésu síkhì kohoa̍h" ê hó líiû!

──2017, 08, 01 tī Lo̍kkáng