《巫義淵台語常用字》

 | | | 轉寄

常用字_36....「淋」

作者 巫義淵 2013.03.17

淋有四个讀音：1.chhè (脆) 2.*lîm (林) 3.liâm (廉) 4.lâm (南)。這四个讀音佇咱的日常生活中，不時咧講、抑是聽人咧講。其實內面的 lîm (林)是本音，lâm (南)是話音，liâm (廉)是勾破音，chhè (脆)是借字訓讀。台語就是即呢費氣，真濟攏是先有話了後才有字，所以勾破、借字特別濟(多)，其實親像chhè 這類借字來訓讀，攏會使用羅馬字就好，一方面減少讀音的費氣，另一方面增加讀音的準確性，對這字就會當看出漢字根本就無夠通予咱的語言使用。

重點字詞：
【淋】1.lîm (臨) 2.lâm (南) 3.liâm (廉) 4.chhè (脆)。
【淋病】[lîm-pēng] (臨並)。
【淋雨】[lâm-hō͘] (南戶)。
【淋漓】[liâm-lî] (廉釐)。
【淋淋漏】[chhè-chhè-lāu](脆脆老)。

用例：
台灣四邊環海，南爿巴士海峽，東爿太平洋，西爿台灣海峽，雖然西爿的對面有歹厝邊，一日到暗kā 咱威脅、恐嚇，好該哉(佳哉)，咱除了有四十萬軍來保護家己以外，猶有台灣海峽做屏障，人講，陸路易走渡海難，中國對台灣統戰宣揚 in 有兩百幾萬兵，有專家講，十三億人來填台灣海峽嘛填漲。不過，台灣內部有一寡附和者，除了反對咱加強軍備買武器以外，佇內部嘛一日到暗咧製造紛擾、唱衰台灣；若無落雨欠水，就講總統的名呼做水扁，扁就是薄、薄就是少的意思，所以才會無雨。這寡高級中國人若是出門hō͘ 雨【淋着】[lâm--tio̍h]，就講被《水扁》、意思是講，去hō͘ 水着，這種家己無注意氣象報告，沃着雨亦是欲賴總統。是講有時陣雨【淋漓】[liâm-lî]落煞，in thái 不講佮陳萬水的名有關係？ 猶有kohkhah希奇的就是，提台灣錢去中國買春，穢着【淋病】[lîm-pēng]返來，無檢討家己，竟然責備咱的衛生機關疾病防治無力。總講一句，這寡人就是刁工將厝頂挖ho͘ 破，通予雨來【淋淋漏】[chhè-chhè-lāu] in 才會歡喜。