《巫義淵台語常用字》

 | | | 轉寄

常用字_44....「盤」

作者 巫義淵 2013.05.12

盤有四个讀音：1.poân (磐) 2.phoân (鄱) 3.pôaⁿ (盤) 4.khoân (環)。這字真少人知影有四個讀音。第一個讀音：poân 、是 pôaⁿ 的文音，有三個含意。(1).文音，盛器。(2).計算。例如：盤算[poân-soàn]。(3).彎曲。例：盤曲[poân-khiok]。第二個讀音：phoân、有兩個含意。(1).問明底細。例如：盤查[phoân-chhâ]。(2).傳說：中國天地的創始者。例如：盤古[phoân-kó͘]。第三個讀音：pôaⁿ、是話音，有兩個含意。(1).皿器[béng-khì]。例如：菜盤[chhài-pôaⁿ]。(2).買賣的價數。例如：盤店[pôaⁿ-tiàm]，開盤[khui-pôaⁿ]。第四個讀音：khoân、是坐的款式。例如：盤坐[khoân-chō]腳疊盤塊坐的款式。

重點字詞：
【盤】1.poân (磐) 2.phoân (鄱) 3.pôaⁿ (盤) 4.khoân (環)。
【盤古】[poân-kó͘] (磐股)。盤古開天。
【開盤】[khui-pôaⁿ] (虧盤)。
【盤算】[poân-soàn] (鄱蒜)。
【疊盤】[thia̍p-khoân] (疊環)。腳曲疊盤。

用例：
佇中國、自【盤古開天】[phoân-kó͘ khai-thian]以來，執政者攏是用拗蠻壓霸、造神欺騙來統治國家，百姓的生命財產攏掌握佇執政者的手裡。想 bē 到民主開放的台灣，到今仔日、竟然亦是佮中國共款，百姓的一切應有的權利亦落入馬先生一個人的魔掌！人講：千算萬算、不值天一畫，chit-má 愛改講千算萬算、不值馬一畫！2008年台灣人選馬先生做總統，想bē 到、一下上任，全國物資大就波動，股市【開盤】[khui-pôaⁿ]直直落，馬政府所講的兩萬點落空，633也是白賊，社會因按呢家破人亡、哀號遍野，會使講是悽慘加三級。健忘無記持的台灣人，2012年有真濟人得著國民黨的一sut 仔利益，對自己的權益bē 曉【盤算】[poân-soàn]規劃，又koh 選馬先生連任總統，伊猶未上任就先來一個下馬威，規台灣又koh 亂chau-chau,禽流感隱瞞、瘦肉精進口等問題，民生物資、由政府的油、電、瓦斯頭先起價，hut kah 全國的百姓人心惶惶、日子歹過、民不聊生，咱這位偉大的馬先生猶是【腳曲疊盤】[kha khiok thia̍p-khoân]不動如山、安坐似佛！雖然立法院三個在野黨為民發聲奮力阻當，無法度、因為人數不足無伊奈何[tâ-ôa]，kan-nā 會當用霸佔主席台的方法但定[nā-tiāⁿ ]！ 願上天憐憫馬先生的苦衷！！