|
Khah倚近現代台語語感ê新譯本tī未來kám是會tàng取代《巴克禮譯本》tī教徒心目中ê地位？需要jōa chē年chiah會tàng hō͘信徒普遍接受？非教徒ê讀者群對新譯本kám會有khah koân ê接受度？Chia lóng有待日後ê觀察。
|
|
Tī判定《巴克禮譯本》ê詞彙kap語法kám是符合現代台語語感ê時，往往有年齡層ê差距，仝一個世代ê語感呈現老年層kap少年層無仝ê標準，這是變化中ê語言真正常ê情形，阮mā kan-taⁿ會tàng chhōe求大多數人ê共同意見，soah免不了有淡薄仔主觀ê成分存在。
|
|
《聖經》中有相當豐富ê語料thang提供語言變遷理論ê參考，值得語言學者深入探討。各種台語譯本lóng有伊hit個時代ê社會意義，向望本研究會tàng拋磚引玉，將來會有koh-khah chē跨領域ê學術研究投入tī台語《聖經》ê題材。
|
|
二、問卷調查結果：
（一） 語感測驗部分：
1.「年齡」、「聽台語講道時間ê長短」以及「Kám有捷看《巴克禮譯本》抑是《台語漢字本》」chit三項變數對《巴克禮譯本》ê接受度lóng有顯著ê影響。整體來講，年齡愈年長、聽台語講道愈chē年、愈捷使用《巴克禮譯本》者，對《巴克禮譯本》ê接受度就khah koân。相對--ê，愈少年ê非教徒對《巴克禮譯本》ê接受度就khah kē。
|
|
1.Tī信息傳達方面，《巴克禮譯本》以直譯原文為主，「紅皮聖經」kap《現代台語譯本》以讀者會tàng理解ê話語來表達原文涵義。
2.《巴克禮譯本》保留khah chē猶太文化中ê專有名詞kap特殊說法；「紅皮聖經」kap《現代台語譯本》會看情況來解說清楚。
3.三種譯本lóng加減使用一寡「本土化」ê詞彙，tùi chia會tàng看tio̍h聖經翻譯ê實況化。
4.三種譯本lóng面對語言風格是beh「神聖典雅」抑是「淺白通俗」ê取捨。
|
|
「實況化（Contextualization）」理論乃是依據近年來語言學、神學kap聖經翻譯理論ê走向來提出--ê。Khiā-tī語言變遷kap翻譯本土化ê立場，檢視「各《聖經》譯本kám有合tī現代台灣社會ê需求？」
|
|
「漢羅合用字」無論tùi閱讀ê理解力、閱讀ê速度或者是朗讀ê正確率來看，對無仝背景ê讀者來講lóng是一個讀、寫台文ê好工具。
|
|
「漢羅合用字」ê經文因為將本字無明確ê詞以羅馬字拼出，所以會tàng避免誤讀，tī朗讀ê正確度比「漢字」khah好。Koh因為將已經有標準化漢字ê詞以常用漢字寫出，會tàng照顧tio̍h無kāng口音ê需要，所以唸讀ê正確度mā比「羅馬字」khah好。
|
|
Tī長老教會中猶原有一tīn tī日本時代出世ê長者，in雖然無受過正式ê漢字教育，m̄-koh卻tī教會中學會曉「白話字」，有讀寫白話字ê能力。
|
|
閱讀測驗成績中siōng大ê差異是tī「羅馬字」ê部分，而且受訪者ê語文背景資料mā顯示in tī閱讀「全羅馬字」抑是「漢羅合用字」書面語ê頻率有相當大ê無仝。
|
|
閱讀「羅馬字」是會tàng透過訓練來增加速度--ê，大多數ê人kan-taⁿ有「漢字」ê閱讀經驗to̍h掠準「羅馬字」讀起來khah慢，這是錯誤ê觀念，mā是欠缺公平ê比較。
|
|
Tī問卷ê的第三部分咱除了beh探討toh一種文字對台語文ê閱讀理解khah有利之外，mā希望知影無仝種文字tī閱讀速度上ê差異。
|
|
因為教會講道所使用ê台語《聖經》一向是《巴克禮譯本》，長久落來to̍h影響了教徒ê台語語感，所以khah會tàng接受《巴克禮譯本》ê用法。
|
|
「紅皮聖經」ê語言風格是三個譯本中siōng淺白、通俗--ê，所以khiā tī題目所要求ê「請選出你認為khah親切好瞭解，khah會tàng融入台灣文化ê一種翻譯」ê角度來選擇，「紅皮聖經」自然是siōng符合--ê。
|
|
咱ê問卷結果印證了「漳州腔」比「泉州腔」khah優勢ê事實，過去《巴克禮譯本》ê「廈門腔（泉chē漳少）」已經影響教徒ê語言習慣，致使部分教徒tī「口語」kap唸讀《聖經》時出現語音無一致ê狀況。
|
|
「年齡」tī 60歲以上ê人，對《巴克禮譯本》ê「語法」接受度顯著有khah koân。「聽台語講道ê時間」tī半年以下者，對《巴克禮譯本》ê「語法」接受度顯著有khah kē；20年以上者，對《巴克禮譯本》ê「語法」接受度顯著有khah koân。
|
|
咱看tio̍h雖然kāng款是《巴克禮譯本》中ê語詞，m̄-koh各題ê選擇人次並無kāng款，這mā kap hit個語詞tī《巴克禮譯本》出現ê頻率kap被引用ê頻率有相當大ê關係。
|
|
咱已經tùi語感測驗確實知影《巴克禮譯本》無論tī「詞彙」、「語法」、「語音」或者是「信息傳達」上lóng已經無符合現代台語ê語感，án-ne，另外一個趣味ê問題是：
Tī chit幾類題型中選擇「＝PKL」ê受訪者，kám有受tio̍h背景ê影響咧？
|
|
Tī各類題型選擇「≠PKL」kap選擇「＝PKL」ê差距上，「語詞」ê差異siōng大，社會人士組有60.9﹪ê差距，大學生組有89.1﹪ê差距，可見《巴克禮譯本》ê語言現象siōng hō͘人明顯感受tio̍h kap現代台語有距離ê是「語詞」。
|
|
「漢羅合用字」ê優點之一是會tàng隨作者對文字掌握ê程度來調整「漢字」kap「羅馬字」ê比例，是台文書寫入門ê好工具，所以會tàng得tio̍h大多數人ê認同。
|
|
若以chit 138人（社會人士組 40人＋大學生組 98人）ê年齡層做分析，咱會發現年齡愈少年者，使用華語做主要溝通語言者ê比例愈koân。Tùi語言ê傳承kap社會溝通語言thang看出語言ê活力，華語因為受tio̍h官方政策ê扶持所以增長率siōng大。
|
|
添寫問卷ê教徒中，有80﹪聽台語講道已經有十年以上ê時間，會使講tùi牧師ê講道中對《巴克禮譯本》ê內容已經有相當程度ê認識kap接受，tī語法kap詞彙ê使用上難免會受tio̍h影響，所以咱預期chiah-ê受訪者ê答案會kap非教徒有淡薄仔ê差異。
|
|
Tī宗教信仰上，社會人士組大部分是對本研究課題有興趣者，所以教徒ê比例相當koân（76.4﹪）。Tī大學生組mā有9.7﹪，chit款ê比例lóng比台灣社會ê基督徒比例5.06﹪koân出真chē。
|
|
本研究希望會tàng收集tio̍h教徒（基督教kap天主教徒）以及非教徒ê看法，所以除了研究者本人親自邀請以外，亦透過師長、朋友kap網路刊登消息來協助收集，lóng總回收234份問卷。
|
|
透過問卷調查ê方式觀察受訪者對於三種譯本ê接受程度如何，就thang看出tī現代社會中各譯本易讀性（readability）ê koân-kē。另外，咱mā beh探討受訪者ê背景對問卷答案ê影響。
|
|
Tī 1930年代ê台灣話文運動中，林鳳岐（1931）就bat提議：用漢字做主要ê文字，用羅馬字拼寫有音無字ê台灣話。王育德tī 1963年bat提出「漢字kap羅馬字混合使用」ê主張。M̄-koh有系統提出理論並實際以漢羅合用字創作ê人是鄭良偉。
|
|
漢字teh表記台語ê時有伊ê限制：（1）無法度反映所有ê台語音節。（2）無法度見字發音。（3）學習負擔大。（4）資訊處理無方便。（5）檢索無方便。（6）真oh標準化。（7）漢字台語詞用法kap所熟悉ê華語詞意思無仝，容易產生困擾。
|
|
基督教非常強調「個人」kap「上帝」中間必須ài有直接ê關係，m̄-nā是靠牧師來傳達教義，信徒必須ài家己勤讀《聖經》，領受其中ê道理，所以「白話字」tī chit當中to̍h扮演一個相當重要ê媒介。
|
|
Nida（1988）bat指出：淺白好了解ê聖經譯本可能bē hō͘人接受，有bē少人khah kah意in並無完全看有ê譯本。譬如《詹姆斯欽訂本》（KJV）內底hit種古雅、晦澀ê用詞kap語法形式，若親像hō͘ in koh-khah會tàng感受tio̍h上帝ê權威。
|
|
Tī無仝ê文化下，甲語言中ê某一種物件真oh tī乙語言中chhōe-tio̍h完全對等ê講法，有時ài透過本土語言中類似抑是相近ê表達來翻譯，chiah會tàng幫助譯入語ê讀者理解。
|
|
咱會tàng用「語言對文化ê包容一切ê涵蓋力」kap「文化對語言ê無所不在ê滲透力」chit兩個主題來闡釋「語言」kap「文化」ê密切關係。
|
|
Tī信息傳達方面，《巴克禮譯本》以直譯原文為主，「紅皮聖經」kap《現代台語譯本》是用讀者會tàng理解ê話語來表達原文ê意義。
遵照「功能對等（functional equivalence）」ê翻譯認為：「為著hō͘現今ê讀者tùi譯文所得tio̍h ê信息kap原讀者tùi原文所得tio̍h ê kāng款，翻譯者必須tī翻譯ê過程中做某一寡文法kap用詞上ê調整，kā原文所隱含ê意思明示出來。」（駱維仁，2001）
|
|
《聖經》ê翻譯比一般作品ê翻譯koh-khah困難、koh-khah複雜，因為伊是一部傳達「上帝ê信息」ê神學經典，m̄-nā必須提供人所會tàng理解ê信息，並且必須充分表達其中ê情意，hō͘人會tàng受感動而且用行動做出回應。實在是一項極為艱難ê工程。
|
|
《巴克禮譯本》teh表達疑問ê時，tī句尾用「mah?」來表示。《廈門音新字典》對「mah」ê解說是：表示懷疑倒反問ê話。王育德（1957）《台灣語常用語彙》中mā有收chit個疑問詞。M̄-koh一般老一輩人ê台灣話內底往往bē出現「mah」，反倒轉是近年來受華語影響khah chē ê少年輩teh講台語ê時，會用華語「嗎（ma）」問句ê型式套用tī台語句型中。
|
|
台灣話ê tī kap tiàm（抑是 tàm、tòa）有分別。tī表示靜態，tiàm表示動態。《巴克禮譯本》裡無論表示靜態抑是動態，介詞lóng一律用tī。
|
|
《巴克禮譯本》內底tiāⁿ-tiāⁿ出現「無m̄…」chit種雙重否定ê講法，相當於文言文ê「莫不…」、「無不…」，兩個否定詞連用，m̄-nā是表達「肯定」，而且koh有「lóng…」ê意思。現代台語tī兩個否定詞中間一定ài加上「一＋量詞（＋名詞）」，或者是直接改做肯定句，無to̍h無合語法。
|
|
4.3.7.1 動趨式動詞
Tī文言文中，「出」、「入」這類趨向動詞會tàng真完整表達意思，m̄-koh現代台語裡，「出」、「入」後面必須koh加另外一個趨向動詞「來」、「去」才算完整。
4.3.7.2 連接副詞「就」ê位置
《巴克禮譯本》內底有真chē位將「就」khǹg tī主語頭前，真明顯是受文言文ê影響。
|
|
Tī漢語裡，一個詞ê詞類會tòe伊tī文句中ê位置ê無仝來改變，有時陣詞ê用法mā會tòe時代變化，所以仝一個詞兼屬幾仔類是tiāⁿ-tiāⁿ有ê情形。黃佳惠（2000）bat提出白話字出版品（註77）ê特色之一是「改變文法kap詞類」，其實這是khiā tī現代台語ê觀點所下ê結論，猶原需要就個別語詞ê用法深入做歷時kap共時ê探討。
|
|
Tī英文裡，主語是一句話bē當欠缺ê成分，bē當省略，siōng無著ài用代名詞代替。漢語ê「主題」是一個言談ê單位，「主題」往往出現tī規個言談ê siōng頭前，後面chiah接幾仔個用chit個共同主題做焦點ê小句來形成「主題kōaⁿ」。所以當主題出現了後，後面小句ê主題m̄是變成代名詞就是省略去，án-ne讀起來猶是合語法。
|
|
比較謂語tī被比項頭前是古漢語ê句式，伊ê比較謂語khah單純，是單音節詞素抑是雙音節詞素。出現「比」字ê比較句，是後來受tio̍h北方方言ê影響所產生ê句式，是現代台語siōng主要ê比較句式，它ê比較謂語khah複雜，副詞kap形容詞詞組lóng會tàng使用。
|
|
Tī現代漢語kap英語中，關係子句上大ê無仝to̍h是關係子句kap修飾語ê位置。就表層結構來講，現代漢語ê關係子句tī被形容語ê頭前；英語是關係子句tī被形容語ê後壁。M̄-koh《巴克禮譯本》tiāⁿ-tiāⁿ有類似英文ê語句出現。
|
|
文言文kap英文tī動詞ê後面會使kāng時出現賓語kap補語。M̄-koh現代漢語動詞後面無容允kāng時出現賓語kap補語，一定ài將賓語提去到動詞ê頭前，變成「賓、述、補」ê順序；若述賓結構非常緊密，著ài將動詞重複，用「述、賓、述、補」ê結構出現。
|
|
Tī英語ê文句內底，凡若頭前文已經出現過ê語詞，tī及物動詞ê後面會用代名詞（it, them）koh出現一擺。文言文ê情形kap英文類似，必須tī及物動詞ê後面出現代名詞「之」。M̄-koh現代漢語（包括台語、華語）凡若tī頭前文已經出現過ê語詞tī及物動詞ê後面就無koh出現，亦bē用代名詞「伊」代替。
|
|
方位詞組（locational prepositional phrase）ê位置，文言文kap英文lóng下tī動詞ê後面，現代漢語lóng khǹg tī動詞ê頭前。但是「白話字聖經」ê方位詞組卻出現tī動詞後面，這有可能是受tio̍h英文抑是文言文ê影響。
|
|
咱閱讀《巴克禮譯本》除了會發覺伊ê語詞真明顯kap現代台語有差異以外，mā會tàng tùi語句ê結構看出語法ê無仝。造成語法kap現代台語無仝ê因素有三個：
|
|
社會上女權意識ê增長是一件可喜ê tāi-chì，聖經tī翻譯、修訂ê時，跟tòe時代ê改變做調整，應該是大家所thang接受--ê。
|
|
人名ê修改有幾項原則：（1）修改不雅ê譯名。（2）避免性別誤解。（3）出名ê歷史人物抑是人名改採現代音譯。地名ê修改主要是beh kap目前社會通用ê講法一致。
|
|
《現代台語譯本》特別注意病名用語，將帶有歧視意味ê字眼改做khah中性ê講法，以消除對病人ê傷害。
|
|
「紅皮聖經」採用ê是「用台語讀中文」ê原則，雖然khah符合一般人ê習慣，m̄-koh chiah-ê語詞tī《聖經》中出現ê頻率真koân，tī日常口語中khah bē出現，教會人士對chiah-ê語詞ê讀音已經慣sì用《巴克禮譯本》做標準，所以「紅皮聖經」顛倒khah無容易被接受。
|
|
「紅皮聖經」是頭一擺由兩教派ê聖經學者共同合作翻譯--ê，所以神學術語當然需要費心思討論出彼此lóng會-tàng接受ê詞。譬如：“God”tī基督教稱做「Siōng-tè （上帝）」，tī天主教稱做「Thian-chú（天主）」，tī「紅皮聖經」翻譯做「Siōng-chú（上主）」。
|
|
詞義ê變遷主要是因為語言接觸ê影響，以上所舉ê chiah-ê詞彙tī日語抑是華語中存在「同形異義詞」，台語長久以來tī台灣ê語言政策中lóng是屬於khah kē層ê語言，所以高層語言（日本時代ê「日語」kap國民政府ê「華語」）ê意義真容易to̍h取代台語原本ê意義，致使現在咱必須用另外一個語詞來表達伊原本ê意義，以免現代ê讀者誤解。
|
|
（1）Tī語義上：《巴克禮譯本》中ê AA疊字詞是表示語義ê強化；現代台語是用來表示普通級ê輕微形容。（2）Tī用法上：《巴克禮譯本》習慣tī及物動詞加賓語以後直接koh加補語。（3）用雙疊ê形式來形容感覺ê強烈。（4）另外，有一寡詞型tī現代台語裡有無仝ê語義kap用法。
|
|
咱會tàng發現《巴克禮譯本》tī-leh表達「強烈」ê語義時，用相當豐富ê「程度副詞」， 除了一般使用較chē ê「真…」、「非常…」以外，iáu-koh有以下幾個詞型：
|
|
幾十年來台灣話kap廈門話各自經歷變化，致使造成今仔日二者ê差異。若beh將chiah-ê早期詞彙當中ê「純粹廈門話」chhōe--出來，是有相當大ê困難--ê，所以咱thang kā chiah-ê詞彙看做是早期ê「台廈共同語」。雖然chiah-ê「早期台廈共同語」有真chē lóng hō͘後起ê同義語所取代，m̄-koh現在猶koh會tàng tī長老教會ê牧師講道抑是khah年長hit輩信徒ê口語裡聽tio̍h。
|
|
「語言」本身是會跟tòe時代來變化--ê，特別是屬tī海洋性文化ê台灣話，除了kap本島ê原住民語、客語接觸以外，koh歷經日本政府kap國民政府ê「國語」政策，chiah-ê因素無時無刻teh影響台灣話。現代科技時代大眾傳播ê大量增加，koh-khah加速語言ê變遷，一寡使用頻率khah少ê詞彙自然to̍h會tùi口語中消失。M̄-koh書面語《聖經》卻為咱保存tio̍h早期ê語料，chiah-ê《巴克禮譯本》中所使用ê詞彙便透過牧師ê講道、《聖經》、《聖詩》ê使用等，直接影響教會人士ê日常用語甚至文學作品，這是一個非常趣味ê現象。
|
|
雖然咱有chiah-ni̍h chē無仝ê台語《聖經》，但因為「紅皮聖經」被當時ê政府沒收，《現代台語譯本》到taⁿ iáu未出版，《路加福音傳漢羅試寫》也只是實驗性質ê改寫，所以到taⁿ為止對50歲以上ê信徒ê語言習慣siōng有影響力者，thang講iáu是《巴克禮譯本》。
|
|
《現代台語譯本》ê翻譯to̍h是根據Nida所提出ê「功能對等」（functional equivalence）ê原則，認為翻譯ê任務是努力為現代ê讀者重現原文讀者所得tio̍h ê信息。
|
|
因為白話字ê使用bat受tio̍h執政當局三十gōa年ê禁止（註53），致到白話字tī教會中失傳，除了老一輩ê信徒kap受過白話字訓練ê人以外，看有白話字ê人漸漸減少，tùi án-ne tī信徒中間開始有人將《巴克禮譯本》改寫做漢字，建議聖經公會出版。
|
|
Chit本冊ê意義在tī伊用新約「路加福音」做題材，提供一個實驗性ê台語書面語語料，除了呈現漢羅合用ê文字書寫形式以外，koh進一步刺激讀者思考「語言差異」kap「文字適應」ê問題。
|
|
《四福音書》kap《新約》lóng是由天主教kap基督教學者共同定稿，這tī譯經歷史上thang講意義重大。完成了後由天主教設tī台中ê瑪利諾會（Maryknoll）安排出版。Tī《新約》序言中特別指出，有真chē聖經學者為tio̍h chit個譯本付出辛勞，其中出力siōng chē --ê是高、陳兩位先生，tùi án-ne決定將chit個譯本號做「高陳台灣白話聖經譯本」（The Ko-Tân Colloquial Taiwanese Version），簡稱做KTV。
|
|
Chit章所beh討論ê是《聖經》版本ê比較，第一節按照出版年代ê前後，簡單紹介各種 《聖經》版本ê翻譯背景以及所採取ê語言文字。第二節開始分別tùi詞彙、語法以及信息傳達方面比較各版《聖經》ê無仝。第五節是探討文字ê問題。
|
|
譯本所根據ê翻譯原則kap方法無仝，譯本呈現出來ê風格也會有所差異，就《聖經》譯本來講，會tàng歸納出三種翻譯法：「直譯法」（literal translation）、「動態對等法」或「功能對等法」（dynamic equivalent or functional equivalence）、「意譯法」或「自由譯法」（paraphrase translation or free translation）。
|
|
「實況化」代表一個會tàng不斷更新變化而且以未來為取向（future-oriented）ê過程，tùi繼續kap變動中ê實況互動（de-contextualization & re-contextualization）來建構神學，這也是基督教所強調ê「道成肉身」ê信仰。
|
|
Kāng一種語言有無仝ê《聖經》譯本，主要ê原因有三個：一、語文ê變遷；二、 翻譯ê原則無kāng款；三、 所根據ê原文抄本無仝。
|
|
阮相信只有實際讀寫台語文ê經驗，chiah ē-tàng對tī文字系統有夠額ê認識，mā chiah ē-tàng對文字形式有公平ê比較並做出合理ê判斷。
|
|
羅馬字字形kap字音ê對應清楚、學習簡單、好寫、好用、容易標準化，因為無具表義功能，所以必須藉助複音節詞抑是頂下文來分辨意義；漢字除了表義功能khah強以外，tī學習效率kap現代資訊化上lóng有困難，而且因為漢字經過歷代ê演變，所承載ê語義真chē，有時顛倒容易誤導讀者ê理解。整體來講，羅馬字tī心理語言學上比漢字khah好。
|
|
目前使用漢羅書寫ê台文種類有真chē種，tùi寫作ê文類來觀察，漢羅文ê發展是以「文學化」kap「現代化」為主。
|
|
王育德對台灣話文字化ê主張是分析比較「漢字」kap「羅馬字」二種系統表記台語ê優缺點kap可行性了後所下ê結論。伊對教會羅馬字有極koân ê評價，認為「只要是台灣人，就有必要知影伊ê大概」（王育德，1993：45）。
|
|
台灣自明清時代延續到日據時代早期ê書面語，一直是沿襲中國古漢文（文言文）ê形式，日常ê口語kap書面語「言文無一致」ê情況相當嚴重。Siōng早意識tio̍h台灣ê「言文無一致」，想beh改造台灣話文做文化啟蒙工具ê人是蔡培火
|
|
「文字」是指書面語系統，是書寫創作ê符號，kap聲音無一定有直接ê關係；「音標」是記錄音讀ê符號，是對語音解析ê工具。
|
|
針對「台灣話」kap「廈門話」語言本身ê比較，眾學者一致ê結論是：雖然台灣話kap廈門話lóng是tùi漳州話kap泉州話混合造成，m̄-koh兩者混雜ê方式無啥kāng款。其中tī語音kap語法方面ê差異真小，尤其是台北話kap廈門話ê語音上接近。台灣話kap廈門話最主要ê差異是tī詞彙方面，約有10﹪ê無仝
|
|
因為《聖經》是一種神學經典kap翻譯作品，所以大多數ê文獻是khiā-tī神學教義ê比較來看各種譯本；抑是分析原文意義，探討譯文ê準確度；或是就翻譯理論ê發展，將譯本按照伊ê風格歸類……。本研究主要是beh tùi「語言實況化」ê觀點，來看譯本中ê語言現象kap現代人語感ê差異，kap chit-ê主題相關ê文獻有以下幾篇：
|
|
語言是宗教人表達宗教經驗siōng直接ê方式，基督教強調：應該用「母語」來傳達基督ê福音
|
|
本研究探討ê範圍主要以「新約」ê第一卷《馬太福音》為主，另外看研究ê需要來引用其他ê經卷。
|
|
《巴克禮譯本》ê翻譯年代到chit-má已經有七十幾年（新約1916年出版，舊約1933出版），伊保留真chē當時ê語料，值得咱深入探討。
|
|
Tī台灣所翻譯ê台語《聖經》，目前為止有三種無仝ê版本
|
|
《聖經》hō͘人稱呼做『書中之書』，是一本流傳siōng闊ê經典，為什麼《聖經》ē-tàng流傳chiah-ni̍h普遍而且時間愈久愈受人重視leh？
|
|
本研究tùi「實況化」ê角度來比較三種台語《聖經》版本，chit三種台語《聖經》版本分別是1933年ê《巴克禮譯本》（一般稱做「白話字聖經」）、1972年由天主教kap基督教合譯ê「紅皮聖經」以及teh-beh出版ê《現代台語譯本》。
|
|
Tī台灣所翻譯ê台語《聖經》，目前為止有三種無仝ê版本
|
 緒論2006.03.11
《聖經》hō͘人稱呼做『書中之書』，是一本流傳siōng闊ê經典，為什麼《聖經》ē-tàng流傳chiah-ni̍h普遍而且時間愈久愈受人重視leh？
|
|
一方面是我歡喜用我ê母語來思考，另外一方面是伊分析ê對象是我所意愛ê聖經台語譯本。當然，伊tī作品內底所呈現ê有條理koh有深度ê特性，是每一位詳細讀chit本冊ê人lóng thang發現ê。
|
|
Ǹg望聖經公會ē-tàng重視社會上普遍使用「漢羅合用字」書寫台文ê趨勢，未來ē-tàng khah緊出版「漢羅合用字」版ê台語聖經來嘉惠讀者。
|
|
Chit本論文ē-tàng出版，特別ài感謝ê是公報社ê張立夫社長，伊為tio̍h鼓勵台語ê研究，願意「冒險」出版chiah-ni̍h學術性ê冊，tī chia致上萬分ê敬意。
|
