《哈佛台語筆記》

| | | 轉寄

講演之旅第二站:柏克萊

主辦這場演講ê柏克萊台灣主權學生社kap台灣同學會本底希望我會當改tī 週間講,因為拜五ta̍k個人攏會有真濟活動,驚siuⁿ少人來。我做會到ê上早是拜五暗,因為拜四ê晡哈佛有課,愛koh坐九點鐘ê飛行機才會到西岸。南灣台灣同鄉會希望我khah òaⁿ轉--來,通tī in禮拜日ê年會講,我上òaⁿ拜一愛轉來,因為拜二ê早á有課。結果in無法度chhiâu我轉來ê班機,所以南灣彼場只好取消。

Sibyl來接我,i是第二代台美人,父母是客人,搬轉去台灣--ah,i kap小弟猶留tī舊金山。I舊年Berkeley政治系畢業,本底有食頭路,因為愛beh專業寫作,kā辭掉,已經完成一本描寫第二代台美人ê英文小說,最近beh出版。I ê暗有代誌無法度去聽演講,所以規chōa路一直問問題,大部份攏是我演講會講著ê物件,嘛算先hō͘我慣勢盈暗ê英語演講。我猶m̄捌公開用英語演講過,出發前,才知影主辦ê是第二代ê台灣囡仔,大部份聽無台語,嘛希望吸引外國人來。

下班時間車塞kah足厲害,ùi機場到學校,開點半外鐘。Rosie來接我去盈暗beh tòa ê Faculty Club,然後chhōa我去學校附近ê日本餐廳食定食。Rosie是Berkeley台灣主權學生社ê發起人,i teh讀政治學博士班,最近taⁿ-á 結婚, in翁是一個白人,捌tī Berkeley台語班學台語,i無beh 學華語,因為中國人壓迫台灣人。

趕到會場抵好8點。愛koh設定我ê筆記電腦kap投影機,看人已經bē少,koh陸續一直入來,過十外分,完全設定好勢,規間已經chiⁿ kah cha̍t-thóng-thóng,主持紹介我ê學生,紹介了只好khiā tī門口。本底kā我講大約會有30人,結果超過一百人。主辦單位想無到會有chiah濟人,嘛無準備mài-khuh。我知影遮ê東亞語文系真濟中國來ê教授,知影研究閩南語ê中國人丁邦新嘛tī遮,看內底有幾若個老輩ê人kap外國人,我實在會緊張。

我hō͘安排講演之旅ê全美台灣學生社八個題目,Berkeley 這站beh聽四ê ,kā題目號做:台語文學:台灣母語運動新世紀新面貌,in有tī網路發消息,特別講我嘛有beh比較台語kap廈門話ê無仝。

我就真正ùi台語kap廈門話ê無仝講起,koh講日本時代到taⁿ兩個殖民語政策ê影響,台語文學ê三個復興運動,最近台灣母語運動ê三個里程碑,母語文學運動ê六個成就,koh唸幾首我ê詩作,最後結論:台灣人beh脫離悲情ê 殖民語文學,建立家己ê母語文學,邁向台灣ê國家文學。

反應不止á熱烈,真濟人提出問題討論。有幾若個人會後koh來參我討論。 無人是惡意挑戰,並無中國教授來踢館。其中有一個白人問講新加坡是一個國家,是按怎in無想著beh用母語寫文學?我講he是因為in ê領導者無母語文化ê見識。聽眾內底有一個新加坡人會後有koh來參我討論這個問題。

我應該kā我ê英文講稿先拍好,練講一遍,通來講hō͘第二代kap外國人聽。Hō͘ in瞭解台灣ê母語運動kap台灣人追求國家自主ê 決心。後站密西根大學嘛希望我按呢做,洛杉磯嘛希望按呢,二月beh tī哈佛大學辦ê國際第二代台灣學生年會嘛仝款愛用英語。按呢嘛算kā台語文運動國際化。

Berkeley有chiah濟人對台語有興趣,in ê台語課爭取10冬猶bē當成做正式課程,實在無道理,照講in比哈佛大學koh khah有條件開台語課chiah tio̍h。有人kā我講in ê東亞語文系ê中國教授講台灣m̄是一個國家,bē當承認台語是一個語言,所以bē當正式開課,最後kan-nā算tī亞洲研究內底ê社團活動,一開始請長老教會牧師來教,後來學生家己教,學校hō͘ in半學分,koh bē當有成績。聽講賓州大學、Stanford大學嘛有teh開台語課,情形bāng有khah 好無? 我kā學生講in koh去爭取,kā講人哈佛tō會當開--a,咱是按怎bē當?我koh答應in若是chhōe無受過語言學訓練ê教授,我願意過來。

2001/11/21

(Chit篇本底是《哈佛台語筆記》輯一 Journal•筆記-哈佛校園聽著台語ê鐘聲ê第8篇)