《蘇老師 ê 台語教室》

 | | | 轉寄

何豐裕

作者 蘇晏德ê學生 2016.12.18

探討羅馬字~何豐裕
我退休以後，透過朋友紹界來松大，起初有一點仔排斥，旁聽了後著決定報名。
一目nih已經四年，逐樣的課程攏有參加，可能是有歲ah，效果有限，著按呢自我
安慰，志在參與，無求收穫，逐種課程中我上興趣就是羅馬字，可能是家己的母
語，比較無負擔，毋過深入探討，應該是蘇晏德老師教導有方，予我產生興趣。
蘇老師每擺上課，無惜辛苦，攏先教羅馬字發音，目看耳聽，漸漸受著啟發，其
中上趣味的----台灣孽詰仔話，譬如：阿婆仔生囝----誠拚、火燒豬頭----面
熟、接骨師父----接跤手等等！
其實予我上有興趣的是，台語有文白音、一字雙發音，這佮華語破音字無仝，比
如「樂」，佇華語有音樂（ㄩㄝˋ），快樂（ㄌㄜˋ），仁者樂（ㄧㄠˋ）山，「樂」
各有無仝的意思，毋過台語著無仝款，譬如華語的毒（ㄉㄨˊ），佇台語仝款是寫毒
字，就有兩種解釋，to̍k佮ta̍k，譬如砒霜足to̍k、蝦足ta̍k，佇句中寫蝦仔足
毒，自然就會讀ta̍k，無讀to̍k，閣比如華語「臭」，台語臭字有兩種講法，你放
屁足臭（chhàu），這尾魚àu去ah，華語「抱」，台語phō，對方雙跤離地，台語
lám對方雙跤無離地，真濟真濟講袂完....。
蘇老師糾正阿公阿媽，講m̄著的一句話，拍斷手骨顛倒勇，佇遮「斷」逐家攏唸成
tn̄g，其實以前的人攏講毋著，佇遮「斷」愛念做chih，tn̄g是分開分成兩段，
chih是無分開皮肉猶黏做伙，只是骨頭chih去，事實上chih去的骨頭閣會當接合
起來，是比以前較結實，所以若閣聽著這句，一定愛糾正拍chih手骨顛倒勇。講甲
一大堆，目的是beh鼓勵逐家來學羅馬字，會予各位學長學弟妹感覺羅馬字課程大碗
閤滿墘。

Tòa菜市邊~何豐裕~岡山

阮兜tòa tī菜市邊
五花十色ê街市
欲食啥物攏合宜
車來車去有規矩

古來希~何豐裕

人生九十古來希
想欲長壽靠家己
人生規劃早準備
歡歡喜喜過一世