《蘇老師 ê 台語教室》

 | | | 轉寄

台語名號詩-1

作者 岡山教會松年大學ê學生 2022.11.13

2022年11月初9
指導老師：蘇晏德

我名叫做林金蓮
松年大學來結緣
雖然學問有較淺
心情愉快面上現
今後想欲樂連連
逐工運動真康健
追求進步袂枉然
厝邊頭尾足欣羨

我名叫做林茂松
岡山後協我家鄉
今年八十猶真強
囝兒序細攏生長
外表看來真正勇
心情快樂人欣賞
做人體貼足善良
平凡做事有路用

我名叫做尤金珠
細漢跔佇古早厝
做穡生活良家婦
食魚食肉逐項有
生活勤儉有規矩
唱歌跳舞有興趣
朋友交陪無自私
逐日快樂無掛慮

我名叫做陳金玉
平素言行自制約
學養成就攏不足
只求溫良不違俗
庸庸碌碌無方向
歲月匆匆前塵揚
如今身在夕陽中
默然回首足感傷

我名叫做鍾秋蘭
做事敏捷真正讚
身體健康m̄驚難
自由自在真浪漫
囝孫有孝閣平安
生日慶祝食西餐
快快樂樂滿人間
做人有量袂拗蠻

我名叫做呂王真
出世農家真可憐
爸母疼囝有原因
房前後壁攏跤印
夫妻感情攏是真
細漢無鞋抑著認
做事認真閣守信
出世光復母保身

我名叫做劉素琴
做事認真有責任
台語歌詩上愛吟
對人溫柔有疼心
愛食土雞燉人蔘
咖啡白茶攏愛啉
愛聽自然ê聲音
感謝爸母ê致蔭

我名叫做林上淑
個性外表真嚴肅
生活平凡真滿足
想欲唱歌學編劇
松年唱歌足趣味
交陪朋友笑微微
一生興趣愛食魚
家庭和樂真歡喜

我名叫做莊秋紅
秋高氣爽滿山峰
做人做事無求功
對待朋友心開朗
真情予人心口服
松大讀冊真快樂
人生好比海波浪
向望永遠人健康

我名叫做劉啟琳
做人做事真用心
音樂佮意歕口琴
平時虔誠拜觀音
希望有錢買黃金
拄著困難攏會忍
做事認真有責任
白茶飲料攏愛啉

我名叫做吳慧敏
做事拍拚足認真
有情有義肯上進
松年上課有夠勤
我是一个好公民
一生無求一身輕
對待家人有夠親
予人看來足體面

我名叫做鍾蘭英
松年大學ê學生
逐日讀冊過人生
做人做事真公正
生性謹慎閣冷靜
日日運動練體能
心情快樂顯真誠
轉來看孫笑清閒