《蘇老師 ê 台語教室》

 | | | 轉寄

阿母ê綠豆椪

作者 呂籽蓉 2023.11.19

阿母ê綠豆椪
今仔日是中秋佳節，天氣真涼爽，一早起，阮ê里長伯送來hō͘阮一ki足好食
綠豆椪ê中秋月餅，beh感謝阮做鄰長攏有幫伊鬥做工課，綠豆椪是阮阿母
在生ê時上佮意食ê口味。伊講he是阮阿爸kā i送定ê大餅經過70冬閣記牢
牢，雖然伊離開阮已經兩冬外，看著物件，阮ê心肝仝款hiah-nī疼tiāⁿ-
tiāⁿ會想著阿母ê形影。

十年前阮ê厝邊一寡老大人，chhōe無幾ê人，後生驚伊無伴就kā chhōa去
阿蓮新起好ê安養院，hia有足濟老人伴ta̍k工會當hō͘伊足快樂趣味過日。
hit陣82歲ê阿母心肝內足無想beh去又koh看著chiah-nī用心友孝ê安排，
歹勢拒絕就勉強tòa兩冬。安養院hia對阮阿母這个老大人精神siuⁿ好，出
頭足濟真歹配合「其實伊較愛tòa tī家己ê厝內 !」煞變成安養院頭殼痛ê
人物，伊是足無愛tòa安養院，伊講安養院像teh關犯人無自由；閣看著有
一寡人hō͘人pa̍k跤pa̍k手誠可憐，就一直吵beh轉來家己ê厝tòa，阮就hām大
兄參詳，阿母佇hia逐工bē歡喜，咱kā chhōa tńg來家己照顧，兄哥in
mā ài上班足無閒，一寡親chiâⁿ攏有建議講我這一世人無嫁ang，這就是
上天安排ê使命，beh來照顧老母ê啦。阮嘛感覺真有道理聽人講這世人會來
做一傢伙，是頂世人修來才有ê緣份，若m̄是報恩，就是來報仇，想着細漢
阿母kā阮疼命命，這馬是阮愛來報恩ê好時陣，這馬無做以後就無機會ah
啦!會記有一條歌m̄通愛等好額才beh接阿母來tòa，阿母已經無tī ê趁阮這
馬閣有能力一定愛把握，機會若失去，這世人永遠就攏無ah，好，好，阮
就決定beh來接ê任務，kā兄哥大姐講，我會當顧阿母，逐家攏足歡喜，一
直kā我感謝，呵ló這ê小妹足有心。

Hō͘阮想tio̍h較早，有答應阮阿爸要kā阿母顧hō͘ sù-sī。阮tio̍h kā 40幾
冬ê舊厝宅閣開百幾萬請人來翻修hō͘好勢，就會當kā阿母chhōa轉來，阿母
一聽著會當轉來厝，歡喜甲笑bi-bi，阮阿母ê身體足好，伊講細漢ê時陣，
阮外公田園足濟，伊嘛足做--ê。所以操了有夠勇。自從伊搬轉來家己厝，
就像生龍活虎像hō͘人放出籠kāng款。Ta̍k工透早就gia̍h椅頭仔tī門口埕曝
日頭，唱著好聽ê日本歌，mā會教阮足濟古早歌，阮mā定定ē去參加比賽，
若有著獎攏講是伊ê功勞，伊若歡喜著hō͘阮一个足愛答喙鼓！阮阿母ê單田
足有力，定定hō͘厝邊ê人聽甲足愛笑掠做阮母仔囝teh冤家相罵，我攏講he
是teh練功夫，阮若無tiāⁿ kah伊講話，頭殼會ē退化ē變戇呆i嘛講這是有
影ê代誌，足濟老人攏無kah人講話沓沓仔變癡呆失去記tî。阮阿母足好
喙，足愛講笑話，若tú著厝邊ê人tùi阮門口經過就講bē煞，有當時害人bē
赴轉去煮飯，阮就問伊會喙焦bē?講Kah喙角全波，有足濟朋友誠欣羨阮有
一ê chiah古錐ê阿母。

阮阿母食甲九十二歲彼冬，有當時講有看tio̍h阮外媽，有當時看tio̍h阮阿
爸，阮攏講伊是teh陷眠，in早to̍h無tī這ê世間。有當時kā阮講我對伊誠
好，後擺ē kā我保庇，阮攏講，a-lí-á-to͘h，阮ê親族內底你上好命，後
生查某囝攏tī身邊照顧，就愛ke食--幾冬，有一工，阮ê目睭皮chhoah甲
足利害，有一種無好ê感覺親像有代誌beh發生，暗頓去叫阮阿母食飯，煞
叫bē ìn聲，安娘喂啊，ná會按呢，ná有可能咧?拄才有teh叫阮，明明一
个好好人tī hia睏，較緊聯絡兄哥、大姐轉來，救護車mā來啊，醫生摸伊ê
脈講阮阿母已經無氣，恁有急救--無?阮ê心肝一時痛kah哭bē出來！無相信
這是真--ê，葬儀社ê人kā換壽衫囥tī廳頭，等明仔載醫生開證明，阮規暝
無睏款he物件。隔透早七.八點，慈濟ê師兄師姐來助念，每一點鐘閣換


2.30人，相連sòa 8點鐘加起來百外ê人，阮有夠感動--ê，隔天佛光山.岡
山講堂ê主持師父嘛𤆬來4~50 ê師兄師姐來助念！這是阮大姐結來ê善緣！
ta̍k家攏chiah有心，足感恩--ê，閣看tio̍h阿母ê面色足安詳，比在生ê時
較好看，聽大嫂講：ta̍k家來助念ê迴響，阿母有得tio̍h，講阿母足有福
報，真無簡單！我嘛kā大兄大嫂感恩，這是in做慈濟足濟年所結來ê善緣，
阮二兄in獅子會長𤆬bē少人來告別式捻香，花籃花箍双爿排規路，閣有國
樂團ê演奏聲，有夠氣派ta̍k家足呵咾阮阿母真好命，才ū這種場面，阿母！
這就是你這世人ê功果！阿母！天氣沓沓仔轉寒，阮有送你足濟媠衫愛ē記
得穿哦！

阿母你上愛食ê綠豆椪有kā你chhoân--出來拜足好食，母仔ôe無你tī阮ê身
邊誠bē慣勢，阮ta̍k工攏吼甲行bē出去，雄雄m̄知beh按怎，阮兄姐、阿嫂
in講我已經kā你照顧甲足好，叫我愛放下，愛振作起來mài按呢阿母ē m̄
甘，ē行bē開kha，用講--ê較簡單beh做是真困難。今年阮有去松年大學讀
冊學tio̍h足濟物件，in攏對我真好請你放心。希望後世人我會當閣來做你
古錐ê囡仔，hō͘你疼惜，大漢kā你iú-hāu。阿母阮beh感謝你，有你ê辛苦
付出hō͘阮生活無煩惱食穿，閣會當去幫助別人ありかどう。阮足愛你，這
句話是咱母仔囝tiāⁿ對講ê心內話！eng-àm月娘特別光，想著阿母心著
酸，孤單一人賞月光，厝邊烘肉芳貢貢，足想beh食m̄敢講，想著家己有夠
戇！啊！無聊ê中秋暗暝啦！

呂籽蓉 中秋暝