《林茂生博士論文》

| | | 轉寄

[作者小傳] 台灣教育思想家—林茂生博士

林茂生先生是一代名牧林宴臣秀才ê長公子,tī 1887年(清光緒13年)10月30日,出世tī台南府城。

林宴臣(後來稱做「燕臣」)秀才是府城ê名儒,1898年受聘tī新樓教英國宣教師讀漢文kah講台語。Tī in早暗tàu陣ê中間,伊深受宣教師崇高ê傳教精神所感動,就開始慕道、讀經,後來tùi巴克禮牧師領洗禮,進入教會。仝hit年,伊進入中學(to̍h是現今ê長榮中學)教冊並擔任舍監,koh不時出外佈道,尤其是tī主日,一定kah學生同齊到鄉村ê禮拜堂講道。

林茂生先生自細漢to̍h天資聰敏,tī第二任費仁純校長ê時代就讀本校,成績lóng佔頭前,尤其英語是全校ê冠軍。因為成績超群,校長請伊做助教,教第三班kah第四班(siōng koân年稱做頭班,續落來是二班)ê地理kah算術,學生稱伊做「半仙」。本校優待chit位半仙,hō͘ 伊kah一般學生無仝;每工hō͘伊三頓白米飯,koh加菜一碟(ti̍h),hō͘全校學生非常欣羨。

林茂生先生tī本校畢業了後,tī 1908年正月由英國教士會資助去到日本,進入京都「同志社中學」深造,畢業了後考入去「第三高等學校」;hit間學校畢業了後,伊koh順利考入去日本siōng出名ê學府—「東京帝國大學」,主修東方哲學,專攻「陽明學說」。

1916年,林茂生先生tùi東京帝大文學部哲學科畢業,成做台灣人第一個榮獲日本siōng koân學府ê文學士學位ê人。仝年九月,林茂生先生學成歸鄉,tńg來母校,立志beh獻身tī台灣ê基督教教育。當時ê萬榮華校長聘伊做教頭(教務主任),hō͘伊施展抱負。Tī學校ê期間,伊成立「學校後援會」並且擔任會長,大力推展「學校基金募捐活動」,為學校ê立案鋪路。

1927年,林教頭〈當時mā兼任台南高等商業學校教授)由台灣總督府授命,奉派以研究員名義赴歐美深造。林茂生教頭tī美國哥倫比亞大學研究所研究教育kah哲學,1928年熱天,伊得tio̍h文學碩士學位,koh繼續攻讀博士課程。林教頭身tī美國,心卻m̄-bat離開母校,時常寫phoe關心學校ê「認定」(立案)問題。

1929年11月,林茂生先生以優異ê成績得tio̍h哥倫比亞大學ê哲學博士學位;伊是台灣人tī美國榮獲哲學博士ê第一人。伊ê博士論文題目是「日本統治下台灣ê學校教育—它ê發展kah有關文化之歷史分析kah探討」。

林茂生先生tī回鄉chìn前bat順續去歐洲,到德國考察。Tī德國柏林大學,伊用德語演講,向hit-ê市ê市長、大學校長、教授、學者,用李白kah歌德ê詩為例,比較東西文化ê異同,hō͘在座ê德國名流甘拜下風,感佩無停。

1930年正月,林教頭衣錦還鄉,繼續tī本校服務,m̄-koh,伊tī五月間奉派任「台北高等商業學校教授」。林教頭心中十分無願意他就,m̄-koh,因為伊是公費留學,不得不從命。總是,伊ê厝iáu tī台南,因為án-ne,伊猶原留tī本校擔任理事kah負責「後援會」ê工作。(後來擔任理事長,to̍h是現在ê董事長)。

1931年,林茂生先生奉派擔任「台南高等工業學校教授」,教英文kah德文。伊ê授課chiok受學生歡迎,每pái上課lóng座無虛席。Tī日據時代,以林茂生先生ê經歷、學識、才華,ē-tàng擔任大學校長是理所當然ê,只是因為生不逢時,tī日本統治下ê台灣,chit位傑出ê才子iáu無法度擔任一官半職。

根據林茂生博士ê大kiáⁿ林宗義博士(bat擔任台大醫學院教授,現任世界心理衛生聯盟主席kah終身總裁)提起伊ê令尊tī日本統治台灣時代所做ê詩,所有ê年號lóng是用「民國××年」,m̄是用「昭和××年」,因此可見,林茂生博士是gōa-ni̍h-á熱愛家己ê祖國,koh認同祖國。

台灣光復了後,林茂生先生對國民政府ê領導bat有殷切期待,mā m̄-nā一pái bat流露出oh得形容ê歡喜。1945年10月,伊bat tī台北ê中山堂,為tio̍h台灣重回祖國ê懷抱(hoâi-phō),發表慶祝演講。11月koh tī游彌堅ê台灣文化協進會邀請之下,tī台北第一戲院kah陳逢源以及廖文毅同齊發表演講,題目是「台灣文化ê革命」。

仝hit年12月,林茂生先生tī當時ê台灣大學校長羅宗洛ê邀請之下擔任台大預科(to̍h是先修班)主任,然後koh出任台大文學院院長。

當時ê行政長官公署教育處處長范壽康mā請伊擔任教員甄選委員會委員。伊為tio̍h beh啟發民智,來順應新時代ê來臨,終其尾決心beh辦報紙。1946年3月,林茂生先生用日據時代ê「興南新聞」ê班底為主,創辦《民報》;伊家己擔任社長,陳旺成做總主筆。《民報》立場不偏,言論公正,批評時弊lóng無驚畏,得tio̍h社會ê喝采,卻mā得罪bē少當時ê權貴,為林茂生先生日後ê不幸遭遇埋下危機。

《民報》ê言論除了無法度得tio̍h當時ê行政長官公署ê容允以外,tī 1946年八、九月之間,林茂生先生為tio̍h抗議選舉不公,辭去伊已經當選ê「國民參政會」參政員一職,表現出「耿介率真」ê個性。1947年,tī政府一連串ê錯誤措施kah人民失望所引起ê不滿情緒致使發生衝突了後,台灣發生二二八事件,真chē台灣ê知識菁英因為án-ne,soah遭遇災難,其中包括偉大ê教育思想家—林茂生博士。
今á日,咱tī chia舉行追思禮拜,記念出身本校ê siōng傑出校友林茂生先生,一方面緬懷(bián-hoâi)chit位偉大ê教育家為學校、國家、社會所付出ê心血,一方面mā略á盡棉薄之力,為二二八事件蒙冤受辱ê英才洗清冤屈,期待早日行出chit幕歷史ê陰影,hō͘凡若為tio̍h chit塊土地奉獻心力,卻受盡屈辱ê英靈ē-tàng安息,hō͘ chit-ê社會邁向koh khah有包容性ê新局面。
(作者為前長榮中學校長)