《林茂生博士論文》

| | | 轉寄

[推薦序六] 台灣文化本位ê開山之作

咱常常講:「做人不可忘本」。Chit句話用來觀照台灣教育,道理尤其是真切實。羅馬m̄是一工造成ê,台灣教育mā m̄是三兩工內忽然爆出來ê。教育是「百年樹人」的大業,過去整體教育ê發展,無論遠近,lóng有它ê歷史軌跡,有咱民族ê共同記憶。咱今á日談教育改革,一定bē-tàng bē記得現在ê歷史座標,除了充分尊重kah了解歷史,以及不管時to̍h會記得咱怎樣行過早前以外,koh khah tio̍h ài記取歷史ê教示,才ē-tàng鑑往知來,行出一條光明大道。

Tī林茂生博士chit本《日本統治下台灣ê學校教育》以前,己經有兩本有關「台灣教育」ê專著。M̄-koh,阿諾用英文所著ê「台灣教育」,tī 1908年出版ê時,現代化教育tú開始發芽,所以thang提供論述參考ê資料真有限。另外,日本人吉野秀公tī 1927年用日文所著ê「台灣教育史」,資料己經非常豐富,只是khah可惜ê是,它所反映ê是日本人ê觀點,所以欠缺對文化問題ê深入探討。林茂生chit本有關台灣教育發展ê論文,致力tī歷史kah文化ê分析,ē-sái講是台灣文化本位ê開山之作。 Chit本冊kā日治時期台灣教育發展ê筋脈,整理kah非常清楚,真chē ê論述lóng有具體ê數據撐(thèⁿ)tiâu-.leh,非常難得。Koh khah難得ê是,作者身為理想主義ê教育家kah知識份子,伊專注ê是自由、開放、民主kah創造性,以及文化ê自覺kah重建,伊chit方面ê真正知bat,khǹg tī teh beh進入新世紀ê今á日,照常是真有份量,ē-sái講是「放諸四海而皆準」。

本冊koh對日治時期兩個民族之間ê教育無平等、同化教育、國語教育kah教育經費不足等等ê問題,再三致意,反復論證。M̄-koh,伊mā kā咱講,日本人bat為殖民教育付出相當ê努力;當第一位總督beh啟程來台ê時,伊同時揀選當時tī日本真傑出ê教育家伊澤修二,來擔任學務部長。
Taⁿ,台灣人民已經當家做主,咱已經無需要koh再為tio̍h族群ê無平等,á是同化政策來傷神,m̄-koh,詳細閱讀chit本冊了後,咱一定會問:咱對教育ê付出kám有夠額?咱對家己ê母語是m̄是有認真teh傳承?咱是m̄是已經採取正確ê文化觀去規劃咱ê原住民教育?是m̄是應該有人kā林茂生博士ê棒(pāng)接落來,kā日治時期1929年以後台灣教育史ê缺口填hō͘ 滿?

我想,咱iáu有真長ê路ài行。
〈作者為教育部部長)