《台灣人e5先覺─黃彰輝傳》

| | | 轉寄

戰後專程tńg來國內

二次大戰tī 1945年結束,黃彰輝繼續留tī英格蘭兩年。英國雖然phah敗德國,但是伊所受ê損傷非常大,尤其是首都倫敦,受tio̍h德國kui-nā-nî不斷ê空襲kap無駕駛人ê飛機轟炸,差不多lóng化做焦土。M̄-taⁿ án-ne,實際上是為tio̍h tek-tio̍h勝利,英國人tio̍h付出chi̍t-ê大帝國。戰爭kā帝國ê一切 Infra Structure凍結,終戰了後mā bē-sái kā帝國本土kap殖民地依存流通ê機器重新phah開。其實,各殖民地lóng leh chhōe機會,tī戰爭ê時chūn kap戰後ê大英帝國tú-teh放鬆ê時,加緊in ê獨立主張kap運動。親像印度、巴基斯坦、孟加拉、馬來西亞、新加坡、緬甸、錫籣等,受統治地區,lóng chi̍t-ê chi̍t-ê向大英帝國要求獨立。當時ài做跨國ê旅行一定ài靠越洋航海,所以tī大戰期間,大部分ê船隻kap船員lóng因為海上戰爭,沉..落去海底來死..去。連siōng基本ê軍事人馬ê復員,殖民官員ê重整,lóng開兩三年hiah-nih長ê時間,koh-khah免講是一家三口ê外國人,想beh討tio̍h船ê空位轉去地球腳chiah-phiaⁿ hit-pêng去。

1945年9月25日(日本向同盟諸國投降了後四十工),英格蘭長老教會海外宣道會開會ê時,黃彰輝向該會表示伊想beh tńg來台灣,幫贊台灣ê教會事工。伊請示該會,是m̄是tī伊轉去台chèng前,先tī英格蘭長老教會封牧。宣道會chiaⁿ贊同chit-ê提議,但是認為必須等待台灣長老教會對chit-ê提議ê意見chiah-koh決定。

Tī 1945年10月23日宣道會會議內底,黃彰輝為tio̍h台灣陳述伊家己ê觀察,請該會轉去台灣重新出發,koh tī台灣工作,因為tī戰後ê台灣,日本ê制度已經廢除,日本神道ê信仰mā烏有khì,chit-má tú-teh考慮用siaⁿh-mí來替換。因此chit-ê時機,對宣揚基督教ê信仰是siōng好..ê,lī-chhiaⁿ mā是重建台灣教會基督徒生活siōng好機會。所有ê教會mā應該有責任保持kap中國大陸教會密切chì-chiap kap關係。

1945年11月20日,黃彰輝向宣道會建議,應該為Rev. T.W. Douglas James建立chi̍t-ê記念獎學金,hō͘海外教會所kèng..出來ê學子ē-tàng kàu西敏斯特神學院讀冊。宣道會議決由幹事kap黃彰輝協調,tī āu-pái會中提出koh-chài討論。

1946年1月22日,黃彰輝表示伊beh tńg去台灣,tī伊ê故鄉台灣ê教會服務。宣道會議決盡量趕緊hō͘伊tńg去台灣,koh替伊付bó͘-kiáⁿ ê旅費,另外加上100英磅,支付伊tī台灣iáu-bōe有收入chìn前ê生活費。

1946年2月27日,黃彰輝kap萬榮華(長榮中學前校長)見kòe面了後,寫批hō͘海外宣道會幹事Mr. Short,替黃寫紹介批hō͘當時留駐倫敦ê中華民國總領事,名叫P.S. Tan,請求kā該國ê護照發hō͘伊。Mr. Short tio̍h tī 3月初6照伊ê要求寫批,雖然無留記錄,一年了後,黃tī回程ê時chūn,伊所持用ê護照tio̍h是中華民國ê護照。

  kàu 1947年為止,黃彰輝tī英格蘭lóng總tòa十年,tng準備tńg來台灣工作ê時chūn,世界主日學協會(總部tī美國紐約ê 156-5th Ave.)致Mr. Short幹事批函邀請,派黃彰輝做台灣長老教會代表,去Oslo參加7月22日到8月初1 ê第二pái世界基督教青年大會ê會議。海宣委員會議決,提供經濟kap旅費方面ê幫贊:『台灣長老教會chaⁿ希望有人代表台灣參會。Tī英國tńg來台灣ê路途中,派伊參會,是省錢koh siōng適當ê舉動。』

黃彰輝參加伊第二pái世界性基督教青年ê會議,tio̍h是tī挪威首都ê Oslo舉辦ê盛會。這會kap 1939年所參加ê會議有chiaⁿ-chē仝款ê所在。Chit-pái mā是有1500人參會。這兩pái會議lóng hō͘伊有chiaⁿ深ê印象。黃彰輝tī Oslo參加會議ê時chūn,tú-tio̍h 一kóa bat參加第一pái世界基督教青年大會ê人,mā kap伊仝款,tī chit-pái ê會議中,扮演領導ê角色。

會後像頂koân講ê仝款,tī黃彰輝tńg來台灣前,英格蘭長老教會海外宣道會幹事ê Mr. Short為黃彰輝向中華民國申請護照,仝時chūn向駐倫敦大使館紹介慰禰是黃彰輝ê太太。黃師母kap in ê kiáⁿ大衛是使用英國護照去台灣ē。雖然hit時,國民黨政權已經tī台灣導演出空前絕後ê 228大屠殺,tī英格蘭ê黃彰輝kap長老教會海外宣道會,lóng無一sut-á ê戒心。恐驚hiah-ê派去tī台南ê宣教師mā lóng iáu tī五里霧內底,因為tī台灣kap南京ê政府,kā二二八屠殺ê新聞封鎖,口傳ê消息,上加mā kan-tāⁿ是一ê人ê觀點niā-tiā。除了導演ê國民黨政權當局以外,tī島內外根本tio̍h無人知影歸ê悲劇ê真相。

Án-ne ê情形下,黃彰輝ê家族tio̍h tī 1947年6月,kap蘭大弼醫師ang-á-bó͘(妻:高仁愛Jean)仝船,離開英格蘭(蘭醫師tī英國休假ê一年期間做了一kóa國內訪問),tī新婚儀式了後beh tńg去福建服務ê航行路途,ài kap黃彰輝ang-á-bó͘同齊kàu香港。In所坐ê船,名叫:S/S Empress of Scotland,因為beh滿載需要旅行ê乘客,所有ê乘客lóng男女分兩pêng。對tú新婚ê蘭大弼、高仁愛醫生ang-á-bó͘,算是chiaⁿ大ê委屈kap犧牲。tùi黃彰輝ang-á-bó͘ kap小大衛mā是大大ê不便。佳哉,in兩戶會tit thang互相扶持kòe kò gōa月。8月15日,黃彰輝使用印有船名ê批紙,寫批hō͘ Mr. Short,報告伊參加第二pái世界基督教青年大會ê情形,kap伊ê感受。

船到新加坡ê時,有kúi-nā-ê學員軍人熱情招待黃彰輝歸家,去各處旅遊。暗時in回船頂時,chah tńg來眾學生所贈送ê真chē禮物,蘭醫師親目看,非常欣羨。

下圖是黃彰輝tī回國ê輪船S.S. Empress Of Scotland上寫hō͘ Rev. W. Short ê書信,書寫ê日期是1947年8月15日,批內包含報告Oslo主日學教育kap青年大會ê情形.(其一)

下圖是黃彰輝tī回國ê 輪船S.S. Empress Of Scotland上寫hō͘ Rev. W. Short ê書信(其二).

下圖是黃彰輝tī回國ê輪船S.S.Empress of Scotland上寫hō͘ Rev. W.Short ê書信,書寫ê日期是1947年9月5日,信中提起tī新加坡停泊時ê經驗kap觀感(其一)
. 下圖是黃彰輝tī回國ê 輪船S.S.Empress of Scotland上寫hō͘ Rev. W.Short ê書信,書寫ê日期是1947年9月初5(其二).
. 下圖是黃彰輝tī到香港了後寫hō͘ Rev. W.Short ê書信,書寫ê日期是1947年9月初10,批內提起蔡愛智專工來看伊(其一).

下圖是黃彰輝tī到香港了後寫hō͘ Rev. W.Short ê書信,書寫ê日期是1947年9月初10(其二).

Tī香港伊遇tio̍h長榮中學時代ê同學蔡愛智(後來tī美國西雅圖做日本教會牧師,伊ê夫人是日系二世ê美國人),beh tńg去美國ê路途專工來香港chhōe黃彰輝。伊tī台灣看tio̍h二二八屠殺慘劇kap延續ê恐怖。受害人內底包括前長榮中學ê老師,董事長林茂生博士。伊是hō͘騙有tāi-chì ài伊列席,hō͘ chhōa走了後tio̍h無消無息,聽講隔tńg工tio̍h hō͘匪類政權偷偷á thâi死,koh消滅屍體,遺物,証據。雖然黃彰輝誠相信蔡愛智牧師ê消息kap苦勸,照常是chiaⁿ想beh tńg去厝內,而且心肝底iáu相信大戰期間,英美同盟國所講..ê,蔣介石kap宋美齡基督徒ang-á-bó͘ ê『信仰kap虔誠風度』ê印像,上尾決心結束十年chiah tńg來台灣故鄉ê第一pái歸程。其實,比遙遠ê倫敦,tùi香港kàu台灣是chiaⁿ短ê旅程,koh-khah免講二次大戰結束已經兩年,除了台灣以外,in一家口koh無別ê所在thang去。

1947年9月,當伊tńg去台灣ê時chūn,kàu基隆碼頭迎接ê人,有身長高、體格瘦瘦ê妹婿鐘啟安。鐘啟安是駐tī台北ê基督教青年會(YMCA)ê組織者,有國際組織ê見識,mā有經營kòe地區單位經驗ê 才子。以後台灣ê YMCA有健全ê成長,是因為有伊ê專業智識kap有促進國際交往ê能力所帶來..ê。二次大戰期間,因為台灣殖民地ê男子照法律無徵兵ê義務,鐘啟安tio̍h tī日本接受chiaⁿ chē基督教青年會ê委託,擔任實質上做管理ê幹事。一直kàu戰爭soah以後,完善辦理移交受託ê單位koh hō͘日本人管理ê事宜,然後tńg來國內,受tio̍h chin chē日本YMCA同仁ê好評kap懷念。

黃俟命牧師等待大kiáⁿ彰輝ê回國,等十年ê時日,ē-sái講是siōng歡喜ê一位。黃彰輝mā是chiaⁿ希望ē-tàng khah早看tio̍h父親,但是tī碼頭頂無伊ê身影,因為伊tit-tio̍h腦溢血,雖然ē-sái行動,但是講話iáu bē-sái家己控制,留tī台南。對黃俟命全家來講,tōa-kiáⁿ ê回國是解救經濟上困境ê希望,因為當時黃家無chi̍t-ê人,tī-leh奉職,無錢養育全家。

黃彰輝全家tio̍h kap妹sài鍾啟安kàu台北,tī基督教青年會(當時koh保存日本人留..落來ê會堂、教室kap宿舍)tòa kui nā工。等kàu隨船運來ê行李過關、領kàu手以後,chiah坐火車忍受chiaⁿ長ê旅程kàu故鄉,目的地ê台南。無簡單結束兩koh gōa月ê旅行,tùi英格蘭回kàu台灣ê台南。

1948年台灣基督教青年大會

黃彰輝全家tńg回台灣,tī基隆碼頭chiūⁿ hōaⁿ,tio̍h kàu台北ê鍾啟安傳道師家歇睏,治療hin船ê身軀。M̄-koh,兩位傳道師ê頭殼內lóng teh想,beh án-chóaⁿ去起台灣青年ê事工。所以,馬上tio̍h同齊,開始討論ài án-chóaⁿ召集台灣教會ê青年,來舉辦一pái盛大ê營會。kàu 1948年8月(回台後整整一年),確實tī台灣淡水成功舉辦大會,有1500人參加。

戰後,因為台灣換殖民者,一日之間停止日本制度,koh換來kui-ê中國ê一套。其實,中國tī台灣接kah亂七八糟,青少年根本tio̍h無人生方向ê讀冊,冊局提供ê冊mā無夠滿足求知ê需要,無外來ê刺激,無承受繼往開來ê理念,mā無靈感ê來源。M̄知án-chóaⁿ做宣傳ê,每chi̍t-ê教會lóng kah-ná聽tio̍h有án-ne chi̍t-ê青年營。對chiaⁿ chē青少年來講,坐火車kàu台北,lóng是一生中ê頭一pái。看tio̍h 1,500個青年聚集作伙聽講,作伙食飯,koh包kā kui-ê淡水線ê火車包..起來來回kàu台北,特別tī新公園聚集做禮拜,hit種心理ê衝擊,chiaⁿ有力mā chiaⁿ深刻。

Hit千五百位青年,tio̍h是後來ê教會ê領導者。筆者ê豐原教會『青年會YMCA』,tio̍h鼓吹苦勸所有20-gōa ê青年lóng去參加。差不多所有初三kap高中生lóng hō͘吸引去參加lah。M̄知會方是怎樣去抓來,阮中學生lóng有大學kap神學ê學兄、學姊照顧。當時黃彰輝tī長榮中學教冊,促成chiaⁿ-chē同學去參加,tī長榮女中有伊ê小妹黃淑惠(升高三),全力鼓勵所有同學去參加。當年,筆者tú tùi初中畢業,mā己經考取高中,心內chiaⁿ輕鬆。Tī新ê地平線頂所看所聽,lóng感覺真新鮮,kah-ná是透kòe chi̍t-ê窗á,看tio̍h世界ê青年kap展現tio̍h ê上帝國,mā看tio̍h充滿希望ê台灣。

其實,國民黨tng-leh中國各地喪失國土kap國民,無閒守衛寸寸遺留ê領土、失去ê人心。國民黨軍無戰tio̍h逃走,一直phah輸,續續逃走。撤退逃走ê速度趕bē赴進攻ê共產敵黨,人民心傳心,傳達『失望』、『無信任』、『恐怖』ê ià-siān,像電訊仝款chiaⁿ緊傳遍中國。

Kan-tāⁿ有台灣,m̄知國民黨政權過去ê剝削、腐敗、自私、無能,人心iáu無受敗類黨團製造ê污染滲透。雖然tī經濟、行政方面己經顯示出臭味,台灣人,尤其青少年iáu相信基督ê信息,ē-tàng tit-tio̍h為政者ê贊同kap維護。雖然經kòe二二八屠殺慘劇,hit時iáu無喪失kui-ê中國koh招致戒嚴令ê施行,禁止大型ê集會,lī-chhiaⁿ參會者lóng自然用台語(臺灣基督長老教會用語)做大會用語。

hō͘大會聘請做會長,是黃武東牧師,當時是台灣長老教會南部大會ê副議長,但是tī 1948年,因為議長楊士養牧師健康無好,chiông án-ne由副議長代行。為siaⁿh-mi̍h聘請南部大會人士,koh m̄是北部大會ê首長做會長neh?解答,可能就是因為tī初步夢想ê階段,黃彰輝kap鐘啟安ê前瞻、企圖lóng tit-tio̍h南部教會(少年)領首ê贊同kap熱誠所致。其實代表台灣長老教會ê人物lóng iáu chiaⁿ少年,黃武東chiah 39歲,黃彰輝34歲,鐘啟安mā chiah 30歲左右niā-tiā。

tùi 1947年9月27日,黃彰輝tī基隆登陸回國以來,iáu無kàu一年,伊kap受伊激勵ê青年同工,kā黃彰輝ê夢兌現,koh hō͘ in tī二二八暴力事件了後,差不多siōng kē-tiau ê台灣青年一sut-á ê希望。

Tī大會內,主題演講ê講員有三位,兩位是鐘啟安tùi上海YMCA請來..ê,另gōa有一位就是土產,tú tùi歐洲tòa 10年tńg來台灣ê黃彰輝。伊tī演講ê主題內底,講台灣教會應該團結合一。因為伊講ê是標準ê台灣話,所苦勸ê教會ê實情koh是真切實、要緊,伊ê演講引起一chūn ká螺á風。親像kui-koh月前,tī斗六所召開ê第九屆南部大會,伊講台灣ê南北教會應該ài合一,神學院mā ài繼續合辨,以求實質ê合一。伊koh重新講hit句有名ê『United we stand. Divided we fall.』一句話。M̄-koh這一pái,伊hō͘ chi̍t-ê chiaⁿ趣味koh實際ê例,講:『阮應該ài做Omelet (攪蛋煎),mài煎出兩粒目chiûe卵仁。指南北教會各一,bē-sái溶做一體。作Omelet,你tio̍h ài phah破外殼,然後phah碎koh 溶合ê一片,無簡單成做chi̍t-ê美好ê Omelet。』

黃彰輝tùi外國chhōa tńg來ê『信息』,大大ê開啟少年人ê眼光,tuo̍h án-ne在場ê青年決定以大會ê名義起稿,koh決定送交一封公開批,促進南北教會(大會)ê合一。青年ê呼籲,引發了教界為政者ê注意,進一步koh去考慮合一ê tāi-hci3。青年m̄是kan-tāⁿ作án-ne ê呼籲,koh進一步進行合一ê行動。1948年7月初2開始,青年家己進行合一籌備,隔tńg年tī 1949年5月初3,正式成立無分南北ê『台灣(T)教會(K)青年(C)團契』ê總會,簡稱做T.K.C.。

親像頂面己經提起,從事青年事工kap學生工作ê鐘啟安,伊是有非常出色ê組織能力者,koh是教會ê支持者。雖然tī YMCA組織內底服務,伊無bōe記tit kā青年會ê活動、組織,kap各地區ê教會繼續取tio̍h連絡。黃彰輝回國後chiah第一pái kap鐘啟安tī基隆見面,後來ê三工,in隨開始夢想án-chóaⁿ去建構青年ê大集會。10個月了後ê大會ê講師內底,hit兩位tùi上海YMCA來ê講師,是鐘啟安交涉聘請過來..ê。按照黃彰輝ê《回憶錄》,鐘啟安chit種ê人bē受教會政治ê束pa̍h,koh ē-sái喚醒少年人ê良知,去為南北教會ê合一籌謀計劃。信徒內底貢獻tī青年ê大盛會,kap南北合一ê呼籲ê『青年領導者』,有一位律師,名叫陳朝景,是東港教會ê長老,黃彰輝《回憶錄》內底起到伊tùi組織T.K.C.ê貢獻。(《回憶錄》p.123)tùi北部大會mā出現chin-chē合一『青年勇士』,親像:鄭連坤、張逢昌,kap長老董大成(台大醫學院教授)。

(下圖是tī 1948年熱天,空前盛大ê台灣基督教青年大會tī淡水開催ê記念留影,黃彰輝是三位主講者之一)

台南神學院第三任院長 1少年任重 1948年11月26日,台灣南部ê英長老教會宣教師會作了以下ê議決: 『(因為黃彰輝已經tńg來台灣,南部大會議決台南神學院復校,英長老教會宣教師,南神院長滿雄才牧師推薦黃彰輝接任院長一職),本會議決逐年補助黃彰輝300英磅,作為伊tī台南神學院院長ê年薪。其中200英磅,由台南宣教師會ê預算內底提出支付,chhun-ê 100英磅tùi本會hō͘台南神學院ê補助內底提供』。Án-ne ê決策,對宣教師會ê去向kap影響,台灣ê本土人士取代歐美人士負起自主、自育、自傳責任ê歷史性意義非常大。Tī人事頂面,台灣有黃彰輝chit位唯一ê人才,ē-sái慶幸。M̄-koh,tī財政方面,台灣長老教會iáu有chiaⁿ長ê路chiah tòe-ē-tio̍h財經上完全ê自立。

1949年8月22日,黃彰輝受封立牧師,koh就任台南神學院ê院長。以家族來講,伊是第三代做牧師。老父年歲高,腦溢血中風chē年,非常kà意聽tio̍h kiáⁿ做牧師,koh成做神學院院長。黃彰輝感覺讀長老教會中學(長榮中學,1927年kàu 1930年)kam-nā iáu是昨hng ê tāi-chì,chit-má tio̍h已經是身負重任ê院長。tùi台南神學院來講,伊是第三任ê院長,但是mā kan-tāⁿ是35歲ê少年人,自忖這是m̄是妥當?當時ê神學院院長理所當然ê認為應該完全參與教會各事工,伊就tī chit種ê眾人ǹg望之下,tī各地區kap各階層ê教會活動內底,開始扮演參謀指導ê角色。以當時ê台灣教育程度來講,伊是受tio̍h chiaⁿ高而且正規ê學術訓練。Tī教學方面,伊bat有tī英國ê SOAS教語言ê經驗,tńg來台灣了後mā bat tī長榮中學教英語。Tī牧會ê經驗方面,勉強ē-sái講是承接阿公kap父親tī教會內牧會ê經驗,thang做參考niā-tiā。比伊少年2歲ê安慕理做了副院長,tú tùi福建tńg來赴任,in倆人tio̍h tī án-ne經驗欠缺,差不多是一無所知ê情況之下,突然間ê扮演各教會中領導ê角色。

下圖是chit-má ê台南神學院校門,其小巧靜觀情景是tùi 1948年,戰後復校以來無變。(張瑞雄提供)

下圖是台南神學院ê禮拜堂,tī黃彰輝院長任內所建築。(張瑞雄提供)

佳哉,神學院內底有2位資深老師:一位是楊士養牧師;另外一位是黃主義牧師。楊牧師bat有牧會經驗,mā做過南部大會ê議長,tī戰爭非常困難ê期間,伊用議長身份,協調台灣長老教會kap日本基督教團ê隸屬問題。1948年1月初9,第9屆南部大會ê通常議會,是tī黃主義牧師所駐堂牧會ê斗六教會召開,此議會是黃彰輝tńg來台了後,第一pái參與ê議會,會中議決beh為台南神學院復校。黃主義牧師kap伊bat同時tī東京分別讀東京帝國大學kap東京神學院時就se̍k-sāi。雖然黃主義牧師tùi台南神學院ê復校是siōng有力ê擁護者kap發言人,mā tī神學院專任教學年gōa,但是當黃彰輝tú就任院長,伊就赴美讀協合神學院(Union Theological Seminary)lah。佳哉有黃李秀賢(黃主義)師母留tī神學院,tī總務kap會計方面做黃彰輝siōng大ê幫手。

2財政ê挑戰 黃彰輝承接ê有悠久歷史ê神學院,soah因為戰爭關..起來,無財源、欠人管理,受tio̍h chin chē滄桑,是koh破koh舊ê校舍,七修八調ê門窗,內底phàng-kìⁿ ia̍h-sī殘破ê家具。chin chē棟『新樓』建築物,mā欠缺修理tio̍h提供hō͘宣教師kap教授tòa。下底ê相片是1952年所hip ê眾老師ê留影,圖面ê背景是主棟校舍ê面目。伊受風雨kap日頭,年久失修,呈現出舊舊ā,壁頂hō͘染做kui-ê lah-sap ê灰烏顏色。

黃彰輝接任ê時,台灣ê經濟社會tú tī chiaⁿ驚hiâⁿ ê時期。1947年228事件,蔣政權ê軍隊大量ê移sóa台灣,施行殺戮,koh招致中國

下圖是1952年南神一部分ê老師,Tùi tò-pêng:白勵志宗教教育主任,黃彰輝院長,安慕理副院長,梁德慧牧師,楊士養教授。(張瑞雄提供)

下圖是1950年3月黃彰輝院長接任後第一pái ê畢業留念留影,前座中央是南大議長黃武東kap黃彰輝院長,後排是上年九月入學ê學生(張德香提供)

共產黨ê軍隊四界游擊成功。kàu 1949年ê兩年之間,蔣政權失去所有大陸ê領土,kan-ta chhun óa百萬ê軍隊kap統治官僚佔領台灣,一時tio̍h-ài強逼所有ê小學生停止上課,提供軍隊進駐使用。

台灣ê人民tī經濟方面受逼迫,tī非常短ê時間內底,tùi 1945年飼600萬人口ê島內資源生產量,增加了戰後ê新住民kàu 1949年ê 750萬人口,台灣民生ê大課題,tio̍h是四名舊台灣人tio̍h beh飼chi̍t-ê新台灣人。煩惱ê源頭,tio̍h是新ê台灣人m̄是beh來同甘受苦,soah是tī政權操縱之下享受『特權』。雖然in ê權益無像夢想ê局長、專員、主任ê富裕,但是tī基層ê台灣人民就受了挨餓kap苦慘ê年日。

1945年末期,當時ê日圓(日本投降了後變成台幣)對美元ê匯率是1:1,到1950年發行新台票,舊台票對新台票ê匯率飛漲為40,000:1。Bat有chi̍t-ê米商,建議黃彰輝先付八禮拜ê米錢,米商答應會tī八週內,無停止一直運送米來學校。但是米商送五禮拜ê米了後,就停止送米。伊無法度koh運米來,是因為米商破產倒擔。Tī貨起chiaⁿ hiông ê情況下,預付金tùi付款人是有利ē。

1950年,tī高雄新興教會召開台灣長老教會第十屆南部大會通常議會,議會中有台南神學院ê年度報告,黃彰輝以身為院長,第一pái創新向大會報告院務。當伊提起南神ê財政ê時chūn,因為伊tùi會計無熟,tī伊報告做壞chi̍t-ê買賣ê時chūn,感覺pháiⁿ勢。有一位長老是吳天錫,提問kám有督察做學校ê鑑查工作。黃彰輝chiaⁿ pháiⁿ-sè回答,學校ê帳目全tī伊口袋內底ê一本小冊子內底,tùi án-ne要求大會協助伊設立chi̍t-ê健全ê學校財務會計制度。Tī議會中,伊報告講,教務方面kan-tāⁿ有三位專任ê教授,kap四、五位兼職kap義務ê講師。Tī án-ne師資欠缺ê情況下繼續kàu 1952年,伊寫批hō͘英格蘭海宣會ê幹事Mr. Feⁿ ,報告講伊kap安慕理,逐禮拜lóng必須教學20小時以上,同時iáu-beh做學校行政工作,kap向教會募捐ê工作。伊向Mr. Feⁿ 求助如何加強學校ê師資陣容kap擴大招生ê tāi-chì。

Tī通貨膨漲下,伊逐工lóng ài用hiah-ê人所奉獻ê金錢,馬上買米來屯積置產,用來支付院內ê老師kap行政員工ê薪水,kap學生ê獎學金kap食住ê費用。(當時來就學ê學生,校方lóng是免費提供食住。)所以,chit種ê費用chiaⁿ大,tī當時台灣ê社會經濟chiaⁿ驚hiâⁿ ê時期,黃彰輝接任神學院院長,無論對神學院ia̍h-sī伊家己,lóng是非常大ê挑戰。

1951年3月7日,第一屆台灣基督長老教會總會,tī台北雙連教會舉行,此屆總會是南、北部大會ê總合。南、北部大會各派出20位牧師,20位長老,3位宣教師、一位幹事,kap一位神學院院長出席。Tī總會會中,議決ài台灣基督長老教會參加『世界長老教會聯盟』kap『普世教協議會(W.C.C.)』。參會者對前項無異議,但是對參加『普世教協議會』,就有chiaⁿ chē意見,無法度百分之百ê認同。因為共產黨篡國,國民黨退守台灣,隨蔣政權來台灣ê新台灣人,帶來óa 一百ê各種無仝ê基督教教派,基督教kap天主教會合..起來,至少有2,000 gōa位歐美籍宣教師轉移來台,致使本來差不多是長老教會獨佔地ê台灣基督教ê社會tāu-tāu-á複雜,面tùi須要考慮ê問題變成chiaⁿ chē。黃彰輝提議總會原則上參加,但是交由總會所組織ê委員會23人繼續研究,koh照會兩ê母會後進行。

  1951年,tùi外國尤其是美國來ê kúi位特別ê人物,來訪問台南神學院,第一位是Dr. Stanley Smith,當時伊是南京神學基金會ê代表,因為中國大陸ê竹幕已經關..起來,所有tī大陸ê宣教師lóng hō͘趕..出來,無任何傳道人thang..入去,基督教若無講是受tio̍h阻斷,mā ē-sái講是受tio̍h非常大ê限制,kap外界已經完全隔離。Dr. Stanley Smith bat tī英國劍橋Westminster神學院讀冊,án-ne算..起來是kap黃彰輝、安慕理同是校友,mā bat tī南京ê金陵神學院教kòe冊,tī中日戰爭ê時,mā bat hō͘日本liah去,伊chin-chiàⁿ ē-sái代表南京金陵神學基金ê重要人物。伊tiām-tiām聽黃彰輝說明台南神學院ê現況,mā kàu學校內四界參內底ê建築kap環境,伊tùi華人ê神學院ê教育非常認真kap關心。伊參觀ê時,tùi黃彰輝講:『我iáu無看tio̍h你ê圖書館。』黃彰輝感覺有tām-pô-á pháiⁿ勢,因為神學院根本無圖書館,tùi大門入去後ê tò-pêng有一間房間,大概是三米乘五米大,thang tī房間內讀冊,但是根本bē-sái算是圖書館,黃彰輝tùi Dr. Stanley Smith ê說明無完全ê理由是,因為台南神學院已經關7年ā,其間無人管理所以流失書kap資料。Dr. Smith對黃彰輝講,圖書館ê設立是非常重要ê tāi-chì,應該khah緊籌設。

Dr. Stanley Smith結束訪問ài離開ê時,kā黃彰輝講有關伊ê希望,是請黃彰輝將所談ê tāi-chì列出提議書寄hō͘伊,伊會為伊籌款,果然kàu 1952年,chit筆籌備ê款項就來lah,mā因為án-ne成立chi̍t-ê『在職傳教師進修班』。

另外一位重要人物是Dr. Pit Van Dusen,伊當時是美國紐約協合神學院院長,mā是南京金陵神學基金會ê董事長。當時作者讀一年級,一年級學生坐tī禮拜堂內底ê前第一排座椅,我當時tio̍h坐tī第一排ê siōng中央ê座位,黃彰輝請所有tī chia ê師生唱一首歌來歡迎Dr. Pit Van Dusen,黃彰輝問ta̍k-ke ài唱to一首歌,góa因為知影有一首歌是所有學生lóng會唱,mā唱kah chiaⁿ好,gōa大聲講:『第333首』。黃彰輝chiaⁿ清楚聽tio̍h gōa講ê話,就ài ta̍k-ke同齊唱chit首詩『咱tio̍h來吟詩,吟詩讚美耶和華』。當ta̍k-ke齊聲合唱非常有力有精神ê時,響亮ê歌聲充滿 kui-ê會堂,ta̍k-ke感覺有聖靈ê充滿。我kàu chin-má iáu相信,hit-pái透kòe全體師生ê歌聲,感動Dr. Van Dusen ê心,hō͘伊感覺m̄-nā tī台灣教會ia̍h-sī亞洲教會,將來世界傳道ê希望,就tī chit群少年ê神學生ê身上。我m̄敢講是m̄是阮所唱ê歌hō͘伊chit種ê靈感,ia̍h-sī伊早有ê想法,伊講ài tī少年新興ê教會開chi̍t-ê『少年新興教會領導者ê研習班』(非歐美ê教會),而且請黃彰輝做研習班ê主席。Chit-ê研習班是等黃彰輝ē-tàng撥時間ê 1959年kàu 1960年間chiah開辦..ê,除了有黃彰輝參加之外,tùi台南來ê iáu有劉華義牧師hō͘邀請參加。

筆者ē記tit tī Dr. Van Dusen來訪ê前後期間,有一工,黃彰輝院長騎鐵馬經kòe通往長中ê長女南pêng牆圍á piⁿ ê巷á,hō͘茂盛ê竹叢中ê荊莿hôe tio̍h目珠受傷,有二禮拜hiah久,伊一直感覺目睭無爽快。從來m̄-bat因為破病請假ê黃院長,soah為tio̍h chit-pái ê眼疾,有二禮拜無授課,hō͘我印象chiaⁿ深。

1951年,金陵神學基金會ê執行幹事Dr. Frank Cartwright mā來訪問台南神學院。筆者tùi伊無印象,可能伊是tī我iáu無入學ê九月以前來訪,mā可能伊來訪ê時chūn,無kap學生交往ê機會。M̄-koh hit年以後,伊ê名字成做神學院大筆財源ê代名詞。因為ta̍k-ke用台灣話稱伊為『卡到來(Kha-to-lai)』。

下圖是tī 1952得tio̍h金稜神學基金會資助後第一pái招開ê進修科結業紀念留影(張瑞雄提供).

3戶口登記制度ê刁難 日本政權tī台灣設置戶口制度是tī 1900年。對台灣ê統治來講,戶口制度算是殖民政策執行上siōng有力ê工具。M̄-koh,tī國民黨政權ê統治下,kàu 1947年ê二二八事件,kap 1949年國民黨hō͘徹底趕出中國大陸,全然佔領殖民地台灣為僅有ê『領土』為止,所做ê戶口政治,thang講是馬馬虎虎。後來,逃kàu台灣ê『中央政府』,看tio̍h日本政府所留..落來ê是chiah-nih好,免拍拼tio̍h tit-tio̍h siōng有效果ê控制人口行動ê武器:『戶口登記』制度,就開始koh-khah嚴厲ê使用。

1947年,當黃彰輝tńg去台灣ê時chūn,伊遵守做chi̍t-ê國民ê規矩,去登記戶口(註一)。但是,伊隨時受國際結婚者ê問題。會記tit he是二二八大屠殺發生ê當年。伊tī 9月tńg去台灣ê時chūn,iáu是恐怖漫延全島,因公務執行ê愚昧,民心非常無安定,尤其是受高等教育,mā就是受了日本教育ê人,tú-teh隱藏身份,向地下避難ê時期。因為án-ne,英籍ê朋友hō͘彰輝chi̍t-ê提議,koh安慰mā希望án-ne做,就是kā伊kap細漢kiáⁿ大衛ê英國國籍守tiâu。

黃彰輝chhōa厝內底ê人tńg來,而且全家tī台南ê新樓時常作伙生活。但是國民黨政權就用『戶口登記』制度ê『武器』來牽制伊。chiaⁿ-chió數ê人知影伊tī國民黨政權下是chi̍t-ê孤星。因為筆者tī台南神學院求學期間,bat kā戶口sóa kàu南神地址,當時ê戶長是黃彰輝院長。筆者mā由黃明輝醫師tit-tio̍h in兩兄弟記載作伙ê戶口謄本,其中關於黃彰輝ê記載,確實有非常奇怪ê所在。以下將兩節記載抄錄koh紹介hō͘讀者做參考。

『民國肆拾年(1951年)拾月拾参日遷出(改編)台南市東區東北里伍鄰参肆戶,東門路貳貳捌號。民國肆貳年(1953年)拾壹月貳肆日遷徒地遷移台南市東區泉北里伍鄰四一戶,東門二二八號,戶長黃彰輝ê戶內為遷徒人口。……』 (請看下面『戶口謄本』圖片)

下圖(1)是黃彰輝1956年以後ê戶口抄本ê一欄。Tī這戶籍記載,ia̍h-sī講『無記載』事項值tit特別ê注意。看伊ê配偶欄是空白,伊當時ê戶長是伊ê繼母黃吳櫻桃女士,所以ē-sái講是『家屬』。黃氏出國拿『中華民國』護照,Tī護照頂面記載『iah bōe結婚』,tī這戶口謄本thang看tio̍h國民黨政權ê『作祟根據』。

圖(2)是筆者ê『廢戶』(『現住所』kā資料寄kàu籍貫後存留..落來ê戶籍記錄)戶籍謄本ê一欄。Tī這戶籍記載內底,tùi 1951年10月13日起,遷徙戶口入tī台南神學院地址,1953年當時ê戶長就是黃彰輝院長。

奇怪! ia̍h-sī講是上帝特別ê恩典kap安排,tùi伊當了院長ê時chūn開始,伊就是神學院戶口上ê家長,所有留宿tī台南神學院ê眾學生,lóng是加入以院長黃彰輝為戶長(tòa tī東門路228號)ê 大家庭(註一)。這是jōa-ni̍h-á親切,做學生ê人是jōa-ni̍h-á榮幸,歷史上ê稀奇ê tāi-chì。

依照頂面ê圖,黃彰輝ê戶籍有雙重ê記載,一方面,伊是神學院戶ê戶長,另外一方面,tùi 1957年,伊mā tī伊ê繼母黃吳櫻桃做戶長ê東區圍下里博愛一巷22號ê戶內,tùi伊ê『家屬』,黃俟命kap林金ê長男(註二)。記載配偶姓名hit欄,留tio̍h空白。Án-ne ê戶籍,就是表示tio̍h伊ê身分等於是未婚,mā無任何關於伊兒女ê記載。筆者bat有機會kap辦理戶籍ê人談論起黃彰輝所受ê戶籍待遇,伊一直講,án-ne抹消配偶ê名字,是bē符合戶籍規定ē。筆者ê歸納,是認為tī台南市政府ê背後,有『中央』ê意圖,要冷待ia̍h-sī貶低黃彰輝ê人格kap信譽。

固然,當黃彰輝申請護照出國ê時chūn(第一pái是1951年),伊ê婚事記欄內底,就明明ê標示為『未婚』。Tī伊ê回憶錄內底,記述伊bat向官方指正chit-ê嚴重ê teng-tâⁿ,但是伊所得tio̍h ê回答是:『因為你ê配偶是外籍人士。』『若伊歸化,而當伊歸化了後,就ē-sái設置戶口,mā就ē-sái承認伊ê配偶稱謂。』中央級ê官員刻意ài『迫求』án-ne chi̍t-ê kap外國籍人士有深密交往,koh有外國ê勢力ia̍h-sī保護ê人,無法度tī伊ê身上加害ê情況之下,想盡辦法tī人格上侮辱伊。真正是án-ne mah?

黃彰輝感覺siōng震怒ê是,因為政府人員向有關教育kap宗教圈ê社會人士告稱:『黃彰輝chit-ê人做什麼基督教牧師,什麼神學院院長!伊kap外國婆(女子)同居,而且生育四個gín-á!』(請看『回憶錄』p.237)伊向筆者講,伊所處ê境遇是,『中國官員』tiâu-kang ài醜化台灣ê領導者,ài hō͘ in失去道德kap領導ê魄力,koh呈現出台灣人ê次等卑賤ê『劣根性』,低陋ê『氣質』。Chit種ê中央政府政策,mā正是反應tio̍h二二八屠殺事件ê懼民心態,kap抹殺台灣領導人才kap『台灣意識』ê意圖。(請參考『回憶錄』 p.236)

4回國後第一pái koh再出國 1951年7月,是回國後第一pái出國,短時間受Stephen Neil會督kap Dr. Rajah Manikam邀請,到瑞士ê日內瓦。主要ê目的是參加亞洲宣教策略會,kap關於台灣基督長老教會參加為普世教會協會W.C.C.會員ê事工。雖然是真短ê旅行kap會談,chit-ê行程,thang講是伊踏上世界舞台ê第一pái。

除了 Bishop Neill kap Dr. Rajah Manikam之外,mā kap Dr. Pradervand會面。(因為日內瓦方面ê總幹事Visser t-Hooft kap神學家正無閒討論神學問題,kap 1954年第二pái總會ê總題,無法度會見黃彰輝。)加拿大聯合教會派駐台灣ê明有德宣教師(台灣基督長老教會英文幹事),己經寫批通知普世教會協會有關台灣長老教會,chit-má己經成立chi̍t-ê南北合一ê總會,而且有參加W.C.C.意向ê議決。日內瓦ê W.C.C.當局就kap黃彰輝作深入ê討論,關於台灣教會ê往來kap現況。Neil會督bat tī 1949年訪問kòe台灣,mā提議台灣長老教會參加W.C.C.。這一pái kap Neill會督kap Dr. Pradervand交談,探知in tùi台灣ê總會m̄是以全議會裁決,soah是留hō͘總委會kap英格蘭母會chham-siông後處理ê tāi-chì,有質疑ê所在。In ài知影tī準備W.C.C.總會ê委員會處理該案kám妥當,ē-sái進行接納ia̍h-sī等kàu後pài ê總會chiah受理。Neill會督是án-ne細膩,Dr. Pradervand khah無掛慮hit點程序ê問題,伊beh聽看māi台灣總會議決ê討論過程,kap交代總委處理ê理由。黃彰輝為in說明全議程ê結果kap理由了後,in兩人tio̍h感覺chiaⁿ放心。

chit-pái ê日內瓦會議上,tú-tio̍h Pit Van Dusen(紐約市拹和神學院院長),tùi黃彰輝個人kap tùi南神來講,是chi̍t-ê轉捩點。因為tī無久ê將來,台南神學院ê發展得tio̍h伊chin大幫贊。台灣長老教會mā tùi英格蘭母會ê扶持成熟了後,得tio̍h『外交』上ê自由因而得tio̍h以 Van Dusen院長為首ê美國基督教會各教派ê協助,行入普世化、國際化ê路途。(節錄自《回憶錄》p.153)

5 tùi安慕理牧師ê談話講起 1947年Shoki tńg來台灣,先tòa入兩連宿舍。1948年9月,安慕理tùi泉州來台灣,就搬入兩連宿舍ê tò-pêng。(起先,1948年2月,安慕理來台灣,tī傳教師會ê大會講『今á日ê新約神學動向』,根據安牧師所講,是『beh試我是m̄是ē-sái(有資格)教神學院』)。黃彰輝kap安慕理兩戶之間有門ē-sái相通往,有tāi-chì ài參商,ia̍h-sī ài互相通知時,to̍h ē-sài使用。這門親像是故意留tio̍h ē-sài隨意通往,mā ē-sài講是無安置隔戶ia̍h-sī分家ê,án-ne,有kúi-nā-pái,安牧師ang-á-bó͘醒來,看見小大衛(黃牧師ê大kiáⁿ兒)khiā-tī in ê門外向內底探視tio̍h。

  tùi 1948年到1963年,這兩戶tī校務上、家務上,甚至tī生活上ê親近合作,kap支持上ê密切,thang窺見一斑。這期間,tùi安牧師全家搬入,後來koh搬出回英國,前後共有15年。親像頭前所講ê,1959年,Winifred帶四個gín-á回到英國,以此計算,就是11年,兩個家庭和睦相處,親近生活。

  tio̍h者會記tit tī 1951年7月考台南神學院ê時chūn,安牧師在場主持口試,chit入學,伊tio̍h tńg去英國做一年ê休假。安牧師全家回英國ê時chūn,仝船有黃武東牧師,預定tī英國學習一年,吳基福醫師tī英國學習三個月。ē記tit安牧師kúi-nā-pái提過hit時ê經驗講:『黃武東牧師chiaⁿ熱心講道。』安牧師tī 1952年度開始ê時,就己經tńg來教筆者hit班,進入第二年ê新約課目。

下圖是黃彰輝任南神院長時所tòa ê宿舍外觀。正pêng ê一半是黃彰輝院長kap家族ê居處,tò-pêng ê一半是安慕理副院長kap家族ê居處。(張千惠提供)

  關於國民黨(KMT)政府ê恐怖影響tio̍h台南神學院,特別有兩件tāi-chì,ē-sái tī chia提起。大約tī 1950年後半,ia̍h-sī 1951年前半,那時沈毅敦iáu tī leh,伊大約是tī 53年上半年離開台灣回英國ê。當時KMT政府己經搬káu台灣,KMT除了台灣以外,tio̍h無領土ah。有chi̍t-ê暗時,己經過了半暝以後,有一隊講北京話ê秘密警察人員,來黃彰輝牧師ê厝頭前phah門,講:『黃院長!』ài伊開門,黃牧師就開相通ê門,到安牧師hit-pêng來,短短ê商量以後,決定以安牧師為應門者,伊就khiā-tī涼台頂,向樓腳五、六個人問:『beh什麼?』in講:『有人beh邀請黃院長去,beh招待伊。』安牧師用北京話講:『lín若beh邀請伊,為什麼半暝以後來neh?伊無tī-teh!睏ê時chūn,án-ne大聲,會影響四周圍ê人睏眠!』in講kah jú大聲,安牧師mā無細jī講:『阮chia是外國人tòa ê所在,lín án-ne阮必須向英領事館報告,請in向政府當局取締!』in tī-hia hoah大概有30分鐘,就離去。隔暝,沈毅敦kā通往宣教師樓ê鐵門鎖起來,但是到半暝以後,聽tio̍h大聲kiāu鐵門ê聲音,無人去chhap in。連連kui夜繼續án-ne搞門,日時黃牧師出去,一定有安牧師同齊行路。

  當時有侯全成醫師kap陳朝景律師,黃彰輝牧師kap安慕理牧師就向in參商,侯全成醫師因為有國民黨籍,得tio̍h效果,要求特務機構tī抓人以前,一定beh向教會ê國民黨人士通知,了後,tio̍h無án-ne ê攪擾發生。

  另外一pái,大概是1952年10月,特務人員tī禮拜日透早來到神學院,我就向黃彰輝牧師kap安慕理牧師報告,黃牧師ài我叫楊士養、梁德慧lóng來chia,特務ài學校交出四年級學生卓榮祥。Tī院內庭園上臨時形成ê教授會,kap特務人員ê會談內特別有趣味而且有意義ê,就是神學院方用英語,由梁牧師翻成北京語,特務用北京語,梁牧師就以北京語翻hō͘對方。我感覺chin稀奇,tī台灣有án-ne chi̍t-ê神學院,伊ê教授只ē-tàng講英語kap台灣語niā-tiā ê情景!
  hit工,卓榮祥是tī北港事奉,特務特別等候,kàu卓榮祥講道結束了後,chiah下手lia̍h伊。後來koh kā神學院kap院長卓君講關tī什麼所在,mā答允無體罰卓榮祥,ia̍h-sī phah伊,12月chiong近ài放伊ê時,學校有大餐,就因為校方知影卓榮祥ê監獄,所以ē-tàng送一份去hō͘伊食。

  án-ne,mā ē-sái看出1950年到1951年,KMT tī台灣iáu是懷tio̍h新佔領,『勦共產黨』ê恐怖心態,特別是驚台灣ê精英,無惜總勦滅。到1952年秋天,國民黨『亂政團』己經鎮壓了台灣各地,對真正ê『共匪』kap『kap外國有連繫』ê『世界級人士』可能會有辨別,就khah chió黑白來lah。

  筆者tī 1954年9月kap鄭連明牧師、陳滄發牧師仝團,kap孫鴻沂牧師仝連,hō͘徵召去受訓6個月ê通信兵。Hit時tī營舍內ê長排木板床頂,睡tī我邊á ê人,有一工the̍h出伊ê『特務証』hō͘我看,mā說明了伊ê任務:一是,伊出示該証時,坐公共交通施設m̄免付錢;二是,伊ē-sái向特務組織密告任何人,hit人就隨時會hō͘ lia̍h去;三是,in特務人員ē-sái領普通工作單位ê薪水,加上特務機構ê薪水。
  可能就是有人誣告黃彰輝牧師,藉此the̍h真好ê獎金,而且誣告伊ê人,大概mā是tī神學院近處ia̍h-sī校園內生活,ē-sái用任何紙片,批信『投書』作密告ê根據。講到卓榮祥後來透露,是tī嘉義農業學校讀冊ê時chūn,有一位老師疼惜伊,hit位老師hō͘認為是共產分子,就因此伊mā hō͘連坐誣告。假使伊hit時無tī南神,得tio̍h侯全成醫師、陳明清、陳朝景律師等ê保護、參謀,可能in就無管張三李四,就先kā卓榮祥牧師殲除掉lah。

  1947年,二二八事件ê時chūn,里港ê陳朝景長老幫贊了一位戰後來台灣ê人,bē致使hō͘憤怒ê台灣人無理無法度ê害死。但是害--a,國民黨政府kap軍人平靜了台灣人『叛徒』以後,陳朝景長老失蹤lah,連一點訊息lóng無。佳哉hit位受陳長老保謢、救活ê朋友拼命去chhōe伊。兩個月後,tùi秘密、烏暗ê監獄救伊出來,免冤枉死。

6彌迪理牧師關於Shoki 彌迪理(Daniel Beeby)牧師到台灣是1950年,一開始受派tī長榮中學教學。當時伊iáu teh適應台灣ê生活,mā tī南神思考伊來kàu台灣ê使命。伊寫批去設tī美國紐約ê Board of Higher Education and Ministry (基督教高等教育機構),因為伊聽講美國基督教協議會有1,300,000美金,是歸屬tī中國教會ê高等教育基金,等待beh開支hō͘適當ê基督教教育院校。伊發現tī台灣koh無隸屬於教會ê高等教育施設,tùi án-ne伊寫批hō͘設tī紐約ê高等教育機構。

  基金會hō͘伊tio̍h驚,因為批講beh伊去探究到底什麼款ê教育方式ē-tàng象徵新時代ê教育理想。伊就向宣教師會請假三個月,遍訪美國ê基督教大學教育施設,然後提出報告,建議設置手腦並用ê教學,勞學並重ê學府,he就是chin-má ê東海大學設校siōng原先ê起點。

  彌迪理對Shoki ê判斷kap領導是chiaⁿ威服..ê,因為tùi伊ê遊覽探討tńg來時,伊發現Shoki己經tī伊出差期間,向董事會kap總會稟請派任Beeby做南神ê舊約學教授。當時伊感覺黃院長kan-tāⁿ以單方ê需要為優先,實在有點á受強制ê感覺,但是mā感覺ē-sái順南神ê需要接受落來,這影響tio̍h後來伊tio̍h-ài到紐約接受2年ê神學博士ê課程。伊回想當時ê『委屈』是上帝ê恩典,因為1972年伊突然hō͘蔣政權ê KMT踼出伊所愛ê『故鄉』台灣,tī無親無戚、無路、無望ê時chūn,來了 Selly Oak College hō͘伊舊約學教授ê職位。以西理屋為據點,伊tio̍h-ài繼續伸手,幫贊栽培台灣kap台灣長老教會ê愛鄉土、愛自由民主ê學者kap鬥士。

彌迪理起先做宣教師派去廈門ê時chūn,起薪hit年俸200英磅,實在是sàn kah可憐,但是後來到台灣ê時chūn,發覺到tī台灣ê眾牧師ê薪俸kan-taⁿ是伊所領收入ê十分之一。伊當時所受tio̍h,關於台灣ê生活kap文化衝激是bē chió..ê。

彌迪理tī台灣體驗了第二pái ê金元貶值,是四萬元舊台票兌換一元新台票。伊講第一pái ê體驗是tī福建,伊所看tio̍h ê,中國政府ê撤底腐敗、無能、自私是無法度thang形容ê。Tī伊離開廈門以前,伊經驗了 1比1,000,000 ê金元貶值。Tī台灣,社會、教會kap家庭ē-tàng tī財難ê幽谷下繼續成長,追究根底,就是有現代化ê經濟基礎kap教育ê普及。黃彰輝kap台灣教會ê領導者,得引chhōa台南神學院,行過曠野荒地,進入新koh光明ê境地,mā嘉惠了台灣島國民ê心靈建設,實在應得精神史上bē貶值ê中心格位。

註一:黃彰輝留英期間,伊ê戶籍隨父由員林遷回台南青年一橫巷7號,1951年改為博愛路一巷22號。講到怎樣分設新戶做住寮神學生ê戶長ê經過kap理由,則不詳。 註二:根據黃澄輝(黃俟命ê五男)講:『當年由員林遷戶口到台南ê時,bat發生遷移上ê teng-tâⁿ。因為澄輝tī員林ê戶籍無取消,hō͘彰化縣控告為「逃兵」受通緝,koh遭遇台中地方法院受審之難。』