《台灣人e5先覺─黃彰輝傳》

| | | 轉寄

追憶黃彰輝牧師

Tī我ê人生,影響我siōng深ê一位牧師tio̍h是黃彰輝牧師。伊所留hō͘我tī教育領域各方面真好ê典範,成做我一生常存ê記憶,tû-liáu佩服koh有深深ê鼓勵。

會記得,早年tio̍h是感受tio̍h黃牧師是一位真好ê教育家,特別是關心青少年ê教育。會記得第二kái世界大戰了後伊tùi英國tńg來台灣,hit時我iáu是讀高中ê學生,我時常願意tī思考問題ê 時chūn馬上去chhōe伊,因為伊總是hō͘人感覺真親切、真有耐心,無計較時間真用心kap我講話。Hō͘我少年ê心,處處lóng得tio̍h鼓勵。

伊一方面用心關懷少年傳道人ê服事工作,另外一方面mā關懷散佈tī鄉村ê教會。神學生時代ê我,受派參與鄉村教會ê服事,bat tú-tio̍h黃牧師騎tio̍h腳踏車來探訪,又koh對一般信徒講道,chit種行為正是為tio̍h鼓勵少年ê傳道人。

續落來tī二次大戰了後復校ê台南神學院,經濟khah緊。當時黃牧師受命接院長ê職務,伊m̄驚艱苦,苦心經營ê結果,ta̍uh-ta̍uh-á hō͘台南神學院發展成做東南亞siōng大ê神學院,提升神學教育ê水準,伊真自然得tio̍h所有學生ê愛戴kap尊敬。

黃牧師關懷原住民ê宣教kap神學教育。Tī我畢業了後,擔任玉山神學院院長ê時,學院屬於草創期,為tio̍h起校舍,得tio̍h黃牧師大力協助向海外友好ê教會募款,二年內募款得tio̍h ê錢達到當時台票240萬元,chit-ê幫贊hō͘玉神ê建校有第一筆基金。

黃牧師是有國際聲望ê人。咱感謝tī小小ê台灣,上帝賜hō͘咱一位得tio̍h國際教會敬重ê神學家。Tī世界教會ê大舞台頂,伊bat擔任設tī日內瓦ê世界神學教育基金會ê總幹事,hit時kap伊共事ê部屬內底,後來有成做南非教會傑出領袖ê屠圖主教。

黃牧師英語ê優美tú好ē-tàng展現伊充滿智慧ê判斷,周旋tī各種國際會議場合中,mā得tio̍h眾人ê敬重。當伊有機會tī大世界教會舞台發展ê時,伊soah用 koh-khah chē感情來懷念台灣chit片鄉土kap同胞,致使伊對普世教會,特別是tī神學教育方面有傑出貢獻ê同時,伊ē-tàng通過kap世界教會領袖ê互動kap對話,喚起普世教會對台灣人民ê同情kap幫贊。

Tī 20世紀後半期,為tio̍h hō͘飽受國民黨政府高壓統治ê台灣ē-tàng早日出頭天,tī國內,本教會發起真chē發表聲明,一直想beh以神學上ê反省喚起國內kap國外對台灣政治前途ê關懷,tī海外,黃牧師koh-khah是盡全力為tio̍h圍護台灣ê民主kap人權koh四界奔走tī各國教會kap各國ê人權團體內底,伊mā領導海外ê台灣人教會展開台灣人民ê自決運動,hō͘海內外台灣人ê民主運動互相對應,一步一步來引導台灣整體走向民主ê正道。

黃彰輝牧師用伊一生宗教家kap教育家ê身教kap言教,已經化作台灣人出頭天史記非常重要ê篇幅。謹期待ē-tàng有koh-khah chē人讀chit本傳記,來學習造福眾人、榮耀上帝。