《陳雷文選》

| | | 轉寄

出外人阿燕

幹,早tō知知--lah,成實偷走--去-a。Che越南á bē信用--得。阿月講,早起出去買菜,過中tàu猶未轉--來。Tú-chiah才khà電話入--來,m̄知ùi tó位khà--ê,講伊m̄轉--來-a。問伊人tī tó位,攏m̄講。幹,按呢tō走--a,hō͘-liu soan入去臭溝á水,chhōe無--a-lah。

財--a講in無teh chhap che。He菲律賓á、越南á ta̍k ê teh走,chhap bē了。幹,che代誌in牽鉤á無teh chhap,啥人chhap?錢the̍h了,ta̍k項the lī-lī。Koh會kā我háⁿ,叫我緊去報警察。Ah無,阿燕--a tī外口出代誌,我負責bē了。規個the-the hō͘我。

阿月kan-na會曉顧háu,驚我罵,去報警察,賴伊kap阿燕--a鬥空,設計hō͘伊走。平平in越南á,二個厝--裡tòa隔壁庄,hioh-lah,ta̍k項mā講。阿燕--a beh走,ná有可能伊m̄知?!佳哉厝內物件無pháng--去。這個阿燕--a,連家己ê衫褲to無the̍h,行李攏tī--leh。講直是刁直,講gōng mā是tòng-gōng。厝內物件一大堆,chhìn-chhái偷--幾-項-a,ah m̄ tō有夠衰siâu,pháng見人koh pháng去物。

平平按呢teh tòa,人阿月tō加真會曉想。莫怪,khah chē歲--a,也來久--a,連咱ê話mā會曉講。我看,beh chhiàⁿ猶是像阿月這款,厝--裡有翁有kiáⁿ ê khah好用。像阿燕--a這款單身--ê,kha̍p bē著hoah走tō走,m̄是頭路。

這個阿燕--a生本成khah狗怪。頂回tī Lái(賴)--sàng hia tō走一擺--a。幹,這個財--a,也m̄ kā咱介紹一個好--ê。Lái--sàng大家攏講--伊,好額kah便所囤銀票,比乞食khah kia̍t,phēng賣鹽--ê khah kiâm。Beh叫人作,m̄叫人食,按呢kā人克薄。也m̄是第一回走人,已經chhiàⁿ幾lōa個攏tòa bē tiâu。老實講,作頭家無khah嚴--一-下,chia ê薪-hô-á m̄ tō peh上天。這個財--a,有錢通thàn,啥物白賊to講會出嘴。阿燕--a外乖tú外gâu。厝--裡一個老母,二個小弟,阿兄規家伙攏伊teh飼。Ta̍k項教tō會。

Ah che政府mā是teh糟踏人chhōe無空。本成作kah好好,雄雄kā你改按呢,限制簽二期。阿燕--a,前--a Lái--sàng hia簽一遍,作無了tō走,mā是有算。所以這回到期,bē使koh簽,一定ài轉--去,規氣走去bih。你敢有伊ê ta-ôa?koh二個月tō到期,無--lah,thài有beh轉--去,khah講mā咱chia好。有食有tòa,有薪水通領,定著是這個關係,阿月thài會m̄知?

Taⁿ這個黃董--ê,ta̍k項beh賴--咱。咱牽鉤á kā紹介,續--落tio̍h kā phāiⁿ一世人?越南á、菲律賓á偷走--ê一大堆,敢kan-na阿燕--a一個?講啥物咱tio̍h kā負責。幹,恁pē tō kā háⁿ,緊去報警察,ah無阿燕--a外口出代誌,越南hit旁in tau beh討人,你tō負責bē了。按呢才tiām--去。賴講咱無kā介紹好--ê。Taⁿ是看著鬼?頂斗簽約mā有kā講,第一回Lái--sàng hia偷走,m̄是阿燕ê問題。He Lái--sáng你m̄知,銀票khǹg tī便所拜,錢是teh看爽--ê,khah kia̍t he死人。Beh叫人作,m̄ hō͘人食,啥人chàn會tiâu? Che Lái--sáng,黃董ê好朋友,伊也m̄是m̄知。

「無--lah,你m̄通誤會,黃董--ê,我m̄是teh講--你,頭家人m̄好。阿燕--a會走,m̄是你ê關係。…絕對無這個意思……我知,我知…阿燕--a、阿月二個顧恁老--ê一個,一日三頓煮hō͘食,kā伊洗,kā伊拭,實在規日êng-lo-lo。若m̄是恁老--ê人大漢太粗重,扶起扶落ài二個人才有法--得,事實che是一個人ê頭路,無比che khah輕可。…m̄是--lah,你m̄通誤會。tio̍h,tio̍h,hō͘ in食,hō͘ in tòa,薪水也m̄ bat慢in。…無--lah,你thài會對in bái?你看,阿月tòa外久--a,人伊to攏無問題。」

「我kā你講,是這個關係。你家己mā知,這個阿燕,koh二個月到期,bē-tàng koh再申請。轉--去tō bē tàng koh來。政府新規定,che你mā知。」

佳哉咱這個秘書林小姐chhap嘴講:「Chit-má外勞--ê到期,無人beh轉--去,khah艱苦mā是比in越南、菲律賓khah好。」

「我kā你講,hia ê會轉--去-ê,攏是有家庭--ê,有翁有kiáⁿ,像阿月這款。…阿燕--a有老母,…老母無仝--lah。」

「免煩惱,黃董--ê,我才koh替你chhōe一個好--ê,有翁有kiáⁿ--ê。…免--lah,免三個月,liâm-mi tō有,一大堆teh等。」

幹,這個黃董--ê pháiⁿ剃頭。

「M̄通--lah! m̄通走!阿燕--a,你m̄通走!…chia你ta̍k項生疏,話koh bē通,beh走去tó位bih? 你猶少歲,m̄知外口hîm kap虎…無像你想--ê hiah簡單.。…啥物?…朋友?…tó一個?…你chiah bat伊二禮拜niâ,taⁿ你是知影伊是圓抑扁?!…阿燕--a,m̄通--lah,m̄通走!…你chit-má tī tó位?…電話幾號?…bē--lah,góa thài會去報警察?!…你聽我講,燕--a,…你m̄通háu,…阿燕--a...」

這個阿燕--a,kap我作伙tī chia二冬外--a,我上蓋知影…若我ê小妹,你看,按呢出--去,身軀邊無半項,連衫、褲to無the̍h,…taⁿ beh按怎bih?…連電話to m̄敢hō͘我,我會替伊煩惱--死。

早tō有kā講,錢m̄通攏總寄轉--去。家己身邊chhun一kóa,留轉去作老本。咱tī chia作三冬,牽鉤á抽16個月,敢有外好thàn?Beh來,m̄ kā in借錢也bē使,利息據在in算。這個燕--a,老母討tō koh寄--轉-去。M̄是bē曉想,心肝nńg,麻糬nóa--ê。Ah m̄ tio̍h想看māi,你心肝nńg,麻糬nóa--ê,老母敢有kap你仝心?我看,he老母心肝tēng,米心無透。Kan-na伊teh m̄甘hit個老母,…電話見來,講kah阿燕--a háu,錢tō koh寄轉--去,…hit lê in母--a,kan-na顧in兄嫂一家,m̄-tāⁿ tio̍h飼in規家伙大細,tio̍h koh寄錢轉去hō͘ in起厝.…兄哥無--去,無查甫人thàn錢,可憐無m̄ tio̍h。Ah這個查某kiáⁿ --leh? soah bē輸養女,專門thàn錢hō͘人用--ê。

阿燕--a ta̍k項kā我講,tō是這回一句tō無講。驚我反對,kā伊擋。定著--ê,我若知,早tō擋m̄ hō͘出--去。阿燕--a人單純,講hit個朋友外好tú外好,beh替伊chhōe tòa--ê,chhōe頭路。講khah好聽。才熟sāi二禮拜niâ,敢知影hîm抑虎?

Chiah-nih少年,猶是m̄通出外來khah有影。阿燕--a in老母,我看是khah顧in阿兄hit家伙kap in小弟。犧牲阿燕--a。查某gín-á家己生--ê,別人ê。我若講,阿燕--a tō應:「你家己m̄是相仝?」有影--lah,咱出外人攏仝款,心肝一個niā-niā,攏khǹg tī厝--裡,出外ê時無順續chah--來。別項無計較,tō是攏teh想hit個厝,khah散mā是hit個厝。我,計較kiáⁿ,計較翁,阿燕--a計較in母--a,規個心寄tī老母hia。Taⁿ chit-má,設使我若是阿燕,少年家己一個,…敢oan-nā走去bih?「你家己mā是仝款。」阿燕--a攏按呢kā我應。

阿月á講,等阿燕--a轉--來,才kā我chhia起來坐。伊家己一個無法--得,出去規日--a,阿燕猶無看轉--來。