《陳雷文選》

| | | 轉寄

素花老師

陳素花老師退休hit年進前,tō有五年級學生ê家長來學校chhōe伊,也有真chē去in tau拜訪,請伊m̄通退休,koh再教一冬,等in kiáⁿ六年級畢業了才退休。素花老師tī成功國小教冊30冬a,大家攏講伊上gâu教,上關心學生,是台南市上蓋好ê導師。有ê家長專工kā gín-á ùi別間學校轉來成功國小hō伊教。連校長曾銅鐘本人mā kā伊姑成,講:“Koh再教一冬”。這句話,前a三冬ta̍k冬攏按呢講,素花老師bē堪得伊姑成,tō koh再教一冬。不過這回,伊kā校長講,有一項代誌khǹg tī 心內,真久想beh作,bē tàng koh再chhiân遲。退休hit工,教育局特別賞伊一tè終身服務教育特優獎金牌。Mā有家長送名牌ê旅行袋、旅行箱。 因為in知影,真chē老師退休了後,第一項代誌tō是去大bú世界chhit-thô觀光,thàn這個身體勇勇,lak袋á錢飽飽ê時陣。

全台單親協會黃月美會長kā伊說明,這個gín-á名明治。照登記是姓陳,m̄-kú chēng細漢tī孤兒院,無pē無母,事實無人確實伊姓啥。看--起-來11、2歲,一粒頭尖尖,一個面扁扁,目睭kap鼻細細個,chhoa̍h-chhoa̍h排無四正,bē輸是chhìn-chhái tàu ê。大bú嘴kâm一枝舌thó͘-thó͘ ,若像半條斤蕉,that leh吞bē落去。黃會長真自信講:“攏會曉家己食飼。衫褲你kéng hō͘伊,家己會曉穿。”koh講:“攏聽有lah。不而過hīⁿ á有khah重,ài講khah大聲。”介紹明治,素花老師kā伊叫:“明治,我是陳素花。”明治無應,kan-na注意teh看素花ê phoa̍h鍊,súi-súi一kōaⁿ紅色ê kap綠色ê玻璃珠á,金金iāⁿ-iāⁿ,查某kiáⁿ彩娟退休hit日送伊ê。一晡久才gia̍h頭起來,講:“櫥á 。”素花老師知影伊ê意思,伊ê嘴舌kāu-kāu bē liàn轉,講bē清楚。笑笑tìm頭講:“Tio̍h lah。珠á。”Phoa̍h鍊pak落來hō͘伊摸。明治歡喜,伸過來牽素花ê手tê。全台灣四個月chhōe透透,今á日才chhōe著。Che tō是伊beh作ê代誌,計劃真久a。伊退休beh專工來照顧這個gín-á,教育伊。伊一直有特別瞭解關心,這個蒙古症概成生本tō kap伊有真深、真特別ê因緣。黃月美會長ê秘書張小姐講:“Ài hâ尿phe á。有時會bē赴,擋bē-tiâu,chhōa出來。”

所以tī厝裡ta̍k日家己教伊,教伊chhit-thô ī gian-muh (game),教伊唱歌講話,mā chhōa出去外面四界行,ta̍k項看。明治愛去菜市á看鬧熱。M̄是去看人。市á內面有一陣街頭狗十外隻,不時tī hia走chông nǹg-chǹg討食,明治愛看狗。Mā上愛畫圖,家己會the̍h筆the̍h紙來畫,若無人叫,坐khah久mā畫去。“你teh畫啥? ”素花會kā問。有時伊會應:“狗”。He紙規張大chōa細chōa,橫ê直ê,一chhok一chhok畫kah tīⁿ-tīⁿ,看m̄知是teh畫啥,ná有啥物狗抑是niau。“啥物款狗?”“狗…狗…”伊用筆比he圖。

素花特別去拜託學校教美術ê洪老師,來厝裡教明治畫圖。洪老師教伊畫鉛筆、畫臘筆、畫水彩。認真教二個月,khah畫mā是大筆細筆烏白chō,mā知teh畫啥。洪老師客氣kā素花講:“這個gín-á有伊家己特別ê天份,畫圖ê代誌上好hō͘伊家己發展,將來畫出來ê才是頭殼內、目睭內家己ê物件。”這個教育giá-á ê原則素花上會理解、ài鼓勵個人能力、隨伊去發展。所以hō͘洪老師辭掉無koh來教。放據在伊去畫,愛畫啥tō畫啥,愛按怎畫tō按怎畫,攏無去kā干涉。M̄-kú khah畫tō是仝款大chōa細chōa,chō kah亂糟糟,像大麵kiáu幼麵。“狗…狗…”畫了tō歡喜the̍h hō͘素花看。猶一項龜怪,攏畫烏ê,m̄ bat用別色。 特別去買一盒36色ê彩色筆,畫紅ê綠ê hō͘伊看,mā是攏m̄用。煩惱講是色盲bē曉分色,chhōa去醫生檢查,好勢好勢,也無têng-tâⁿ。大概是gín-á心智未開,頭腦猶未發展到hia。Mā是放據在伊。

蒙古症ê gín-á khah常身體bē勇,明治真gâu著感冒,hīⁿ á、鼻á發炎,不時teh看醫生。Hit cham雨季,著急性肺炎,入院幾lōa工才轉來,差一sut á無去。彩娟看老母bú kah thiám-thiám,驚伊家己身體bē堪得,勸講:“阿母,你家己身體也tio̍h顧。稍hioh一下。我來替你顧幾工。”難免有時chiù-chhàm,人退休是êng-êng來去運動peh 山,旅行chhit-thô。你專工chhōe這個kê來giâ。

Bú到尾a成實bē堪得。無代無誌雄雄頭殼hîn,心臟chhiáng,強強beh暈去。趕緊去入院,to也查無啥物要緊ê症頭。醫生勸伊,tiàm病院加hioh幾工。素花煩惱明治,tī病院chhiâu-chhe̍k,kā彩娟七吩咐八交代:尿chū á khah chia̍p巡leh,若tâm tio̍h隨換。…有摻牛奶ê物件m̄通hō͘食,pak肚bē堪得,會漏屎。…。心內想beh看gín-á,又koh驚病院傳染病chē,若來傳染著bai-khin tō費氣。吩咐娟a m̄通hō͘來。按呢tú好tī病院tòa一禮拜,人有khah爽a,tō出院轉來。

伊家己乖乖坐tī hia teh畫圖。桌頂一大張紙,畫kah chia一chōa hia一chōa,chō-chō一大遍。素花才放心,問伊:“明治a,你teh畫大隻狗?”明治gia̍h頭起來,目睭仁m̄ tin動,真真kā看,搖頭kah比手,叫:“阿母,阿母。”素花起先m̄知伊ê意思,叫是看著伊轉來,歡喜teh叫,講:“阿母轉來a。”koh看he圖,chia一撇hia一撇,一堆大麵kiáu幼麵,mā是看無是狗抑是niau。才無張持注意看,上蓋下面hia有畫幾粒細細ê圓kho͘ á,歪歪排一chōa。僥倖a,koh這幾粒chhat紅ê,hit幾粒chhat綠ê!驚一tiô ,第一擺伊畫有色ê,紅色koh綠色!敢有可能hahN?!“阿母!阿母!”明治直直kā giú手,雄雄…雄雄才去想著,tō是teh畫伊,tō是teh畫伊ê阿母!敢有可能hahN?!He紅ê綠ê圓kho͘ á tō是伊不時掛tī ām-kún ê hit kōaⁿ phoa̍h鍊,大粒紅玻璃珠á lām大粒綠ê。無料想ê十分意外,歡喜kā明治抱起來âⁿ,lám leh hit粒尖尖ê頭殼直直kā chim,tòe伊講:“阿母,…是lah!是阿母lah!…”

咱歡喜ê腳步行過敢攏tio̍h留傷心ê腳號?世間事tō是按呢hahN?為啥物neh?因為歡喜抑是傷心攏bē使siuⁿ久。In 這二項tio̍h ài相併對比,咱才會心受深tah,ah無會慣勢bē記得?明治入院khah無二禮拜,tō無救來過身離開--去。醫生講是超急性白血病,蒙古症ê gín-á生成bē勇,gâu tio̍h這款病。

花月ê頭家娘thîn sa-kheh來敬in三個人,講:“恭喜退休一週年”詹安銘老師、朱靜水老師kap陳素花老師三人仝hit年退休,約束一年後tī花月見面。“詹老師,你氣色lú來lú好,ah退休攏teh創啥?”花月頭家娘kap大家乾。“無lah。Ah to食飽êng-êng,peh山運動,四界去旅行chhit-thô,ta̍k位看看leh。”詹老師應。“阮頂個月mā chhiah ùi埃及轉來。”“埃及o͘h!我一直攏想beh去。”“一定愛去一chōa。有價值lah。He金字塔、石像chiah大身、he 尼羅河…,你看,國王ê珠寶,連棺材mā金á作ê。”The̍h相片出來hō͘大家看,成實規khū棺材珠寶鑲kah滿滿。頭家娘講:“Ai-ioh,chiah-nih súi!若是會tàng tâi tī chin,死mā值lah。”Kan-na素花tiām-tiām,靜水問伊:“ Ah你去tó chhit-thô?”素花應:“無lah。Ah to攏無êng teh顧gín-á。”“顧gín-á?作媽a nih?”素花搖頭:“我認ê lah。”“有影nih?ah無chhōa來大家看māi。”素花講:“來阮tau坐一下。我報恁看。”

Chhōa詹老師kap朱老師轉來厝裡。桌頭排四張大張紙,攏畫kah花花花,大chōa細chōa,大麵幼麵,chō kah一chhok一chhok,m̄知teh畫啥。Kā看,ta̍k張上蓋下面攏畫幾lōa個細粒圓kho͘ á,歪歪排作一chōa,有ê chhat紅色,chhun ê chhat綠色。“你ê gín-á畫ê?”“Hioh lah”“Gâu a。ah是幾歲lah?”“12 a”“o͘h。”“恁看,畫我這條phoa̍h鍊。”比掛tī ām-kún ê phoa̍h鍊,大粒紅色koh綠色ê玻璃珠á。“有影tō tio̍h,畫你ê phoa̍h鍊。”詹老師kap朱老師二人攏有同意。這時厝裡電話giang,彩娟歡喜teh叫:“阿母,你緊來!我有一個好消息。”“啥物好消息?ah chín 電話先講hō͘我知。”“我有身a,阿母。”In彩娟今年34,結婚5冬a,chit-má才beh生。莫怪大歡喜好消息。一時一粒大tè石頭ùi koân-koân ê山崁poa̍h落來,teh tī心肝頭,重重ián bē起來,也無想beh kā ián走。伊思想明治,思想30幾冬前結婚了第一擺有身,醫生檢查講嬰á無正常,有蒙古症。上好是人工漏胎mài生。猶少年,才koh重生,…。伊無啥知影蒙古症是啥,總是無正常lah。

才koh重生,重生in彩娟。出世3公斤外,佳哉猶少年,重生了有好勢,這個無蒙古症。總是攏會想m̄甘,蒙古症、無蒙古症攏會lah。Che tō是女性生成固執ê母性,kap in ê性命仝一條根、一條脈。漏胎才koh重生,親像家己割一tè肉,teh挽根。留一個khî chiah大chōa,有tâng時á會giâ起來痛,khah chē冬mā猶會giâ起來痛。等退休了,io一個chit款ê gín-á來顧,想講這個khî會khah bē koh giâ。“恭喜lah。彩娟,阿母kā你恭喜。”伊電話中kā查某kiáⁿ叫。“Teh beh作媽a?”詹老師、朱老師mā歡喜,講:“恭喜lah。素花…後回阮beh去蘇聯chhit-thô才來招你。Thàn chit-má孫猶未出世,出去行行看看leh。”