《陳雷文選》

| | | 轉寄

主席萬萬歲

這個人口真chē ê國家有一個大獨裁者,一人統治已經20外年。Tī國內,伊ê地位bē輸人間ê神明,講烏tō烏,講白tō白,全國攏無人kap伊有無仝款ê意見。伊ê正式稱呼簡單叫做“偉大ê主席革命ê舵手萬歲萬萬歲”。

這個國家tī伊統治之下,社會改制作像軍隊hit樣ê組織。中央命令落來,上下一致,一通電話,全國動員,beh拍hô͘-sîn tō拍hô͘-sîn,beh掠niáu鼠tō掠niáu鼠,會使講,全國ê精牲鳥蟲kap百姓仝款,攏管kah好勢溜溜。其他ê國家大事,親像工業增產、農業大產種種,隨時beh外chē tō外chē,bē輸用hoah ê tō 有按呢。

這個偉大ê主席革命ê舵手雖然講是看起來若神,事實是人,年歲大來,身體也會有無tú好ê所在。特別是規日薰suh無停,肺部傷害,不時khuh-khuh喀,大khùi喘bē lī,造成一個全國憂心ê問題。Tú好hit年大水災,死人幾lōa 十萬。He百姓知影,自古以來ê傳說,凡是遇著這款百年天災,m̄是gâu人ài死,tō是朝代ài換。所以謠言四界,講主席病勢 siong-tiōng,m̄知tiâng時tō會死。總是主席kap in某tòa tī皇帝城內面,四圍koân城,警察衛兵,五步十步,m̄是báng-á hô͘-sîn會tàng烏白出入ê所在。關於這項代誌,一切消息封鎖,bē-tàng進一步證實,也無人知影詳細內容。

Taⁿ這個主席ê某比伊少年20外外歲,以前是作戲á ,chit má是革命同志。雖然伊tī政府內面無正式ê職位,總是有組織一個四人幫,靠in翁ê勢,利用主席ê名義控制權力,把握一切。He四人幫知影主席病重,會議決定,偉大ê主席絕對bē使死。所以全國四界派人chhōe奇巧(khá)ê藥草、祕方仙丹來hō͘伊食,to也無彩工。到尾無法度,叫留美ê專科醫生來看。in某kā留美醫生講:“偉大ê主席革命ê舵手絕對bē使死。”Koh kā伊警告:“主席若bē講話,你tō死; 主席若會講話,你tō活。”

這個醫生詳細檢查診斷,taⁿ苦ah,he主席現現肺癌尾期,thòaⁿ kah規身軀,心肝pak內攏pháiⁿ 去,明明作人到chia盡磅ah,taⁿ beh按怎?橫直拚也死,無拚也死,kā主席in某講:“Kan-na這個辦法。”結果手術大開刀,死牛作活馬醫,用最新ê科技,ngē救才救起來。

過來無外久,全國新聞電視報真chē消息,偉大ê主席身體真勇健。Liâm-mi去海邊phak日,liâm mi跳大河siû水,比全國選手代表siû khah緊koh khah hn̄g。按呢人心才安定落來,革命又koh充滿光iàⁿ-iàⁿ ê前途。

這個以後,佳哉主席真緊精神恢復,比以前重倍獨裁。國內年年革命,國外到處戰爭。Tī西南有一個已經受in軍事征服ê國家,主席講he蕃á 人種,文化攏m̄好,sóa百萬ê移民入去佔領,beh kā蕃á 改作像in按呢。又koh南旁ê隔壁國,講是無禮得失著主席,出兵beh kā in教示,顛倒hō͘人修理轉來。連hit個海峽外旁ê島國Hok-lu-mo͘-sah,講是in ê,自古以來kap in分bē開。後來全國發動文化大革命,教百姓相鬥爭,作革命。有讀冊ê就是pháiⁿ人,送去作sit;作sit ê tō是好人,送去讀冊。按呢舞過來舞過去,連續舞幾lōa 冬,舞死幾百萬人。到尾a舞一下siuⁿ大場,soah bē收腳。He反對派聯合起來,組織一個五人幫,姓鄧ê chhōa頭,用軍隊包圍皇帝城。

五人幫kā四人幫攏總掠起來關。姓鄧ê kap劉司令同志入來皇帝城見主席。主席四四正正坐tī大交椅頂,四圍有槍子tōaⁿ bē過ê玻璃圍leh。看in入來大聲tō罵:“恁chia ê反革命ê走資派!出賣無產階級革命ê罪人!美國帝國主義ê走狗!…”目睭gîn ò͘ⁿ-ò͘ⁿ ,一支嘴一直罵,大聲hoah:“劉司令!你chit má馬上kā我拍原子彈!美國炸掉!…”一時siuⁿ 過激動,m̄知啥物原因,雄雄pông一下一聲,主席ê面kap嘴soah歪一旁。過來又koh pông一聲,主席ê頭soah khi去,目睭chhauh -chhauh nih,kan-na hit支大嘴ki-ki kia̍uh-kia̍uh猶teh罵。姓鄧ê驚一tiô,趕緊拍開玻璃chông óa去扶主席ê頭殼。Ná知taⁿ苦ah,摸一下he頭soah lo̍k-lo̍k hián,強beh落去。僥倖ah,tō是he ām-kún早tō切斷ah,下面接幾lōa條塑膠kóng kap一大堆電線,通tùi身軀後面去。斟酌kā看,taⁿ慘ah,he身軀有腳有手,原來是假ê,作來chhāi hit粒頭殼用ê niā-niā。

這時隔壁khin-khin-khong-khong,走去看,規房間ê儀器kap機器,幾lōa 排ê開關,一大堆紅紅綠綠ê電火閃閃sih sih,明明是電腦控制ê先進ê科技品,攏無人teh顧。原來偉大ê主席肺癌尾期,thòaⁿ kah規身軀,kan-na頭頭殼猶未有。He留美醫生kā伊手術大開刀,規個身軀切掉tàn thó-kak,留hit粒頭,用塑膠kóng kap電線接電腦kap機器,所以猶活leh 無死。因為當時主席in某有講:“主席若bē講話,你tō死; 主席若會講話,你tō活。”所以留美醫生有專工另外裝一台le-soh(laser) hip相機,主席ê嘴nā振動講話,le-soh hip相傳去電腦,照he嘴形換作人工發聲,所以會講話,會罵人,koh會hoah號令。In某問主席:“你按呢有舒是無?”主席應:“我beh suh薰。”真實會講話。醫生theh nih-ko͘-tin (nicotine) ê 射注入去塑膠kóng內面,按呢tō是hō͘伊suh薰。主席ê某問醫生:“按呢會tàng擋外久?”醫生講:“若照起工保養照顧,一百年無問題。”In某真歡喜,hoah:“主席萬萬歲!”

Taⁿ這個姓鄧ê khiā tī hia看kah gâng-gâng,he 主席ê二粒目睭chhauh-chhauh nih,kā伊看,明明嘴to歪一旁ah,猶koh teh罵:“原子彈!原子彈!美國炸掉!…”伊雙手phóng hit 粒頭,想著chiah chē冬來,天下大亂,liâm-mi戰爭,liâm-mi革命,hoah起hoah落,攏是手裡這粒圓圓ê物件teh作怪,chit-má koh命令拍原子彈…心肝會chhoah,m̄知beh如何處理?雄雄這時主席ê面色作一下變無去,目睭kheh 去,he嘴才tiām去…。Tō是劉司令tī隔壁出手kā先進ê機器ê開關攏總關hoa去。He姓鄧ê這時才決定,雙手kā hit粒頭抱leh ,kā伊koh chhāi轉去大交椅頂坐。

無外久政府宣佈,偉大ê主席革命ê舵手萬歲萬萬歲過身去。He百姓若像有預料著,無啥意外ê反應。因為hit時國內有發生大地動,強力八級,死四、五十萬人。He百姓知影,自古以來,不管有百年ê天災抑是無,一個國家見若經過這款chiah nih久人造ê苦難,m̄是gâu人ài死tō是差不多朝代ài換lah。

五人幫kā主席ê遺体khǹg tī水晶ê棺材內面,四圍khàm鮮花,排tī紀念館hō͘人敬看。He百姓看了,有人流目屎懷念主席ê偉大,總是攏無人知影,革命ê舵手頭殼已經切斷去ah,he ām-kún以下ê身軀是假ê。