《Kah陳小小做伙讀台語》

 | | | 轉寄

先有恩典，chiah有工作kah事奉

作者 張文亮，台譯：Lîm Chùn Io̍k 2021.11.28

陳小小踏話頭： 以色列人過節ê氣氛是歡樂ê！上帝吩咐人民喜樂ê命令ná親像疼ê命令仝款。頂禮拜ê課程討論，我向指導教授報告華語聖經翻譯kā「歡樂」khǹg tī後面，á希伯來文「歡樂」khǹg tī頭前，後者chiah koh khah有歡樂ê感覺。另外和合本修訂版用「做伙慶祝」有減少歡樂ê氣氛。

「….lóng tio̍h tī上主—你ê上帝所beh揀選安置祂ê名ê所在，tī上主—你ê上帝ê面前歡喜。」（全民台語聖經 申命記 16:11）
「….tī上主─lín ê上帝所選定ê敬拜場所做伙慶祝」（和合本修訂版申命記 16:11）

Á指導教授指出「安息日mā是耶和華ê節期」，這我iáu無注意tio̍h。（參見利未記23:2）

原來，ta̍k禮拜，咱mā lóng應該歡樂。信望愛電子報主打文張文亮老師用安息日、主日，指出「先歇睏chiah工作，先有上帝ê恩典，chiah有工作kah事奉。」

我想我beh來用這調整讀冊kah工作心態：先安息、歡樂，充滿主ê力量進前。

【先有恩典，chiah有工作kah事奉】文/張文亮

主是我ê力量，是我ê平安kah喜樂。

「Lín chiah个 ài吞食sànchhiah人，hō͘ chit所在ê困苦人衰敗ê人，tio̍h聽chit个話！ Lín講：「月ê初一tang時過去，hō͘阮thang糶五穀？安息日tang時過去，hō͘阮thang賣麥á，用細ê伊法，用重ê舍客勒，用詭詐ê天秤來騙人。（阿摩司書8：4-5）

早期ê人無時鐘，幾月幾日是看月娘ê圓缺，「月朔」（new moon）是新月，he是月娘tùi烏暗開始現出月光ê頭一暝。新月是歡喜ê日子，暗時tùi無光到有光。

Tī舊約時代，「安息日」是每禮拜ê siōng尾一工，上帝ài咱工作六kang，siōng尾一工有歇睏。主耶穌ê死去koh活，是tī「七日ê頭一工」（約翰福音20:1），稱做主日，所以咱「守主日」，m̄是「守安息日」。

禮拜日是一禮拜七工ê頭一工（頭一工m̄是禮拜一），咱tī禮拜日ê主日，記念主，是表明咱m̄是tī舊約時代，工作了後chiah ē tàng歇睏，á是守tiâu律法chiah ē tàng安息。咱是tī新約時代，先有歇睏chiah工作，先有上帝ê恩典，chiah有工作kah事奉。

真chē學生認真讀冊了，chiah ē tàng sńg，考無好iáu ē tang sńg啥？Soahhō͘讀冊變kah真辛苦，這是舊約時代ê讀冊法。

應該是先sńg chiah koh讀冊，靠主喜樂來讀冊，是讀冊siōng好ê方法。有主ê力量，有主同在ê平安，是讀冊siōng好ê激勵，認bat主，是讀冊siōng好ê目的。這是新約時代ê讀冊法。

讀冊若是siuⁿ過致意世chiūⁿ ê成果，咱tiāⁿ-tiāⁿ ē看tio̍h，真chē名校畢業ê人，一下有工作to̍h志在必得，排除別人；一下有權力to̍h吞食別人，á是欺壓人。權力ê滋味，hō͘ in急beh爭取，努力掠tio̍h權力了後，tùi欺壓人民中，得tio̍h潛意識裡ê甘甜。這是多年來，普世共通ê現象，名校好無容易chiah培養出好ê領袖。

同學，我beh明確kā lín講，一个人有名校kah博士學歷，是學術能力，m̄是管理能力，m̄是政治領袖kah企業CEO ê必要條件，甚至kiámchhái是妨害ê因素。

咱選舉thang考慮選後段班ê，成績無好koh學歷偏kē ê人選，因為in已經tāi先tam過啥物是失敗者ê傷害，啥物是讀冊困苦ê滋味，chit種人出社會，反敗為勝了後，ē是一流ê好領袖。

願你ê讀冊方法，是先靠主喜樂，你ê工作秘訣，是先靠主得勝。這mā是我ê讀冊、工作kah婚姻觀。

我是靠主喜樂。Kah牽手分享主內ê喜樂，m̄是牽手beh照我ê看法，我chiah喜樂，因為做bó͘是我tùi上帝hia借來ê，m̄是我ê。（圖片提供/張文亮）