《Kah陳小小做伙讀台語》

 | | | 轉寄

「我是耶和華」

作者 陳小小，台譯：Lîm ChùnIo̍k 2023.05.06

「我是耶和華」tī舊約聖經出現超過一百pái，chit句話m̄ nā是kah其他神明ê名有區別。「我是耶和華」，m̄是埃及人拜ê尼羅河神「哈比」（Hapi）、日頭神「拉」（Ra），mā m̄是迦南人拜ê「巴力」、「亞斯她錄」，mài chhòng m̄ tio̍h去。「我是耶和華」，koh是beh彰顯「耶和華」名ê意義：「我是創始成終ê主宰」，「我是自有永有」，「我是永遠ê主」，「我是Hit位『我是』」。

Chitê「我是」穿越過去、現在、未來。時間、空間iáu未被創造chìn前，chitê「我」to̍h存在；tī時間、空間結束了後，chitê「我」mā繼續存在。Chitê名字說明祂是時間、空間ê創造主，祂掌握控制時間、空間！

Hit kóa神m̄知tī tó位？

聖經記載第一个m̄ bat啥物是「耶和華（我是）」ê人，是埃及ê法老王。摩西kah亞倫代表耶和華，要求法老王hō͘以色列人離開。法老王自高講：「上主是啥人？是án怎我tio̍h聽祂ê話，准以色列人離開？我m̄ bat上主，mā m̄准以色列人離開。」（《全民台語聖經》出埃及記5：2）

法老王ê藐視，hō͘上主決定主意，beh 好好á hō͘全埃及人、全以色列人、全人類lóng知影啥物是「耶和華」，啥物是「我是」──「我是」是時間、空間ê創造主；「我是」掌握控制時間、空間！

第一災水變血，尼羅河聽耶和華ê！尼羅河長6,650公里，是世界上第一長河，ta̍k年氾lām帶來肥ê lō͘kô͘moâi，hō͘農業興旺。尼羅河thang講是埃及之母，埃及人拜尼羅河神「哈比」，相信它有養飼、滋養大地ê神力。

摩西對法老王發出警告：「你ē tùi chit件事來知我是上主。你看，我beh用我手裡ê柺á phah河中ê水，水to̍h ē變做血；」（出埃及記7：17）亞倫照上主ê吩咐，gia̍h杖phah尼羅河裡ê水。尼羅河to̍h乖乖聽話，河水隨時tī眾人目chiu前變成血。埃及所有ê河流、運河、埤á、水聚集ê所在，貯水ê木器、石器裡，lóng總是血。尼羅河神m̄知tī tó位？上帝beh hō͘世間人知影，尼羅河聽耶和華ê，世界上第一長ê河流是耶和華（我是）創造ê。

第二災水蛙，水蛙聽耶和華ê！亞倫照上主ê吩咐，伸杖tī埃及有水ê所在，水蛙就遍滿埃及地。埃及人拜水蛙之神「海奎特」（Heqet），它是生育之神，庇佑產婦。四kè lóng是水蛙，巫師有能力叫水蛙，卻無能力趕水蛙。Chit時，法老王chiah趕緊chhōe摩西、亞倫來，請耶和華幫忙kā水蛙趕走。甚至提出要求，隔工to̍h ài kā水蛙lóng總趕走。摩西一嘴答應：「Τhang照你ê話，hō͘你知阮ê上帝—上主無一个ē比並得。」（出埃及記8：10）隔tńg工，水蛙lóng總死à。水蛙之神m̄知tī tó位？上帝beh hō͘世間人知影，耶和華掌握水蛙ê生死，水蛙是耶和華（我是）創造ê。

第三災土粉變蝨母，土粉聽耶和華ê！耶和華beh chhòngtī 埃及人敬拜ê大地之神蓋布（Geb）！亞倫伸杖phah大地，土粉變成蝨母，人kah chengseⁿ身chiūⁿ lóng是蝨母。大地之神m̄知tī tó位？上主hō͘世間人知影，祂有能力kā土粉變蝨母，大地是耶和華（我是）創造ê！

第四災胡蠅，胡蠅聽耶和華ê！耶和華beh chhòngtī埃及人敬拜ê蟲之神凱布利（Khepri）！上主派摩西去警告法老王：「你若kohm̄放我ê人民走，你ê埃及人民家家戶戶四界胡蠅滿滿是，m̄ koh我ê子民所tòa ê歌珊地區，一隻胡蠅to無。Thang hō͘ 你知影我是世界上獨一無二ê耶和華。」災難應驗，蟲之神m̄知tī tó位？上主hō͘世間人知影，胡蠅聽祂ê，各種蟲類lóng是耶和華（我是）創造ê。

Hit kóa神算啥物？

第五災瘟疫，耶和華beh chhòngtī埃及人敬拜ê創造之神、chengseⁿ之神「阿匹斯」（Apis）！上主派摩西去警告法老王，「你若kohm̄放我ê人民行，我beh hō͘埃及人所有ê chengseⁿ tú tio̍h瘟疫，á以色列人ê chengseⁿ一隻to bē死。」災難應驗ā，chengseⁿ之神m̄知tī tó位？上帝beh hō͘世間人知影，耶和華掌握chengseⁿ ê健康kah生死，所有動物lóng是耶和華（我是）創造ê。

第六災瘡皰，耶和華beh chhòngtī 埃及人敬拜ê智慧、醫藥之神「托特」（Thoth）！摩西kah亞倫照耶和華ê吩咐，tùi爐á裡the̍h一把hóehu，當法老王ê面kā chiahê hóehu掖tī空中。Chiahê hóehu一tú tio̍h人á是chengseⁿ，人kah chengseⁿ lóng ē生皰、生瘡。醫藥之神m̄知tī tó位？上帝beh hō͘世間人知影，耶和華掌管健康kah病症，耶和華（我是）是創造主。

第七災冰雹，冰雹mā聽耶和華ê！耶和華beh chhòngtī埃及人敬拜ê天頂之神努特（Nuit）！上主對法老王講：「若是我用瘟疫處罰你kah你ê子民，lín早to̍h lóng毀滅à。M̄ koh為tio̍h beh向你顯出我ê力量，我iáu hō͘你活leh，thang hō͘我ê名傳遍天下。到明á載，我一定落重koh大ê雹。」隔工，摩西向天伸杖，天to̍h tân雷公、落雹，有火閃sih到地chiūⁿ，雹kah火參雜，真正厲害。法老王求諒情講：「已經有夠á。請lín去求耶和華，我to̍h容允lín去，無koh kā lín留tiâu leh。」摩西kā伊講：「我一下出城to̍h ē ǹg上主gia̍h起我雙支手，雷ē soah，雹mā無koh落，hō͘你知全地lóng屬tī上主。」（出埃及記9：29）天頂之神m̄知tī tó位？上帝beh hō͘世間人知影，耶和華掌握控制蒼穹，天頂ê一切lóng是耶和華（我是）創造ê。

第八災草蜢，草蜢聽耶和華ê！耶和華beh chhòngtī埃及人敬拜ê破壞之神「塞特」（Seth）！摩西kā杖舉起；地面起東風，打擊地面一工一暝，到早起時，吹來真chē草蜢。草蜢chia滿地面，全地烏暗，草蜢食盡一切菜蔬kah果chí。法老王koh一pái求諒情。耶和華轉換起極大ê西風，kā草蜢掃入去紅海，一隻mā無留落來。破壞之神算啥物？上帝beh hō͘世間人知影，耶和華帶來ê破壞力量koh khah驚人，風kah草蜢lóng是耶和華（我是）創造ê。

第九災烏暗，日頭聽耶和華ê！耶和華beh chhòngtī埃及人敬拜ê神中之神──日頭神「拉」！摩西向天gia̍h手，厚密ê烏暗罩tiâu全國三工久。埃及人彼此看bē tio̍h，m̄ koh以色列人所tòa ê所在lóng有光明。日頭神算啥物？上帝beh hō͘世間人知影，耶和華掌握光明kah烏暗，地球倚靠ê恆星日頭是耶和華（我是）創造ê。

第十災頭胎ê kiáⁿ，死亡聽耶和華ê！耶和華beh chhòngtī埃及人敬拜ê人中之神法老王。耶和華對摩西講：「我beh降落siōng尾一災。了後，法老王一定放lín行。約tī半暝，我beh巡視埃及。埃及ê每一个大kiáⁿ lóng tio̍h死亡，頭水ê chengseⁿ mā lóng tio̍h死亡。」

尊耶和華「我是」做聖

法老王無koh是以色列人ê王，耶和華beh做以色列人ê王。以耶和華做王ê新國度teh beh開始，離開埃及ê chit個月to̍h是正月。上主ê人民以色列人beh守Pôaⁿ過節，to̍h ē tàng避開死亡。Ta̍k戶ê戶長一定tio̍h為伊一家擔一隻細隻羊á，tī正月14 hit晚，宰殺hit隻羊，kā血抹tī厝宅ê門框kah門楣頂。上主koh一pái講tio̍h kakī ê名，「Chitê血tī lín所tòa ê厝，beh做lín ê記號；我一下看tio̍h chitê血，to̍h ētùi lín pôaⁿ過去。我phah埃及地ê時，災禍bē臨到lín來kā lín毀滅。」（出埃及記12：13）

Hit暝，埃及四界ê家家戶戶lóng有死人；hit日，耶和華kā以色列人按照in ê軍隊，tùi埃及地領出來。法老王無論是án怎ê神，mā是耶和華創造ê。耶和華掌握生kah死，人類是耶和華（我是）創造ê！

萬神莫敵！「我是」beh懲罰所有埃及ê神明，祂是耶和華。上主用十災來回應法老王ê提問：「耶和華是啥人ah？」祂kā法老王講：「耶和華」to̍h是「我是」！祂是時間、空間ê創造主，祂掌握控制時間、空間，祂是宇宙萬物ê主！

上主ê名何等奇妙可畏。願咱kah以色列人仝款，tī一年ê開始，人人lóng尊上主ê名──耶和華（我是）做聖。