《Kah陳小小做伙讀台語》

 | | | 轉寄

她做一件美事

作者 陳小小，台譯：Lîm ChùnIo̍k 2023.05.21

她做一件美事
陳鳳翔

Ta̍k个基督徒chē少lóng傳過福音。耶穌教講：「我實在kā lín講，福音無論傳到啥物所在，人lóng ē講起chitê婦人人所做ê tāichì，來kā她記念。」（馬可福音14：9，《全民台語聖經》）m̄ koh你kah我傳福音ê時，心內kám bat想起chitê「她」ê故事？

Chitê chabó͘人所做ê tāichì，重要到三卷福音書──馬太、馬可、約翰福音lóng有記載。馬太福音26章13節mā記落來耶穌ê吩咐：「我實在kā lín講，chitê福音無論傳到普天下啥物所在，人ē講起chitê婦人人所做ê來記念她。」 M̄ koh，大多數基督徒傳福音ê時，m̄ kantaⁿ無想起chitê chabó͘人，甚至chitê chabó͘人ê故事內容究竟是啥物，mā無gōa清楚。領受福音使命ê你kah我，實在有必要知影chit个 chabó͘人是啥人、她做過啥物重要ê tāichì，竟然值得世世代代ê基督徒ánne來記念她。

她盡她所能

故事發生tī Pôaⁿ過節前六日。耶穌來到離耶路撒冷三公里無遠ê所在，橄欖山頂ê伯大尼庄頭。無gōa久進前，祂chiah tī chit所在做過一pái空前ê創舉──死人koh活ê神跡，hō͘死去四工ê拉撒路koh活。

耶穌去到伯大尼ê時bē赴á，亡者拉撒路已經照喪葬ê程序處理：清潔屍體、用布包起來、khǹg入去墓穴。眾親友當teh安慰拉撒路ê阿姊馬大kah馬利亞。偤太人掠準，人死四工後身軀開始腐爛，靈魂to̍h離開，絕對無可能koh再活起來。M̄ koh，耶穌hō͘死去腐爛ê人koh活，證明祂是性命kah koh活ê掌管者！M̄ koh mā因為chitê神跡，宗教高層ê祭司長kah法利賽人聚集tī公會，決定beh thâi耶穌。

耶穌teh beh受難，祂倒tńg來伯大尼。Tio̍h大癩ko ê西門邀請耶穌去in tau食飯，mā邀請馬大、馬利亞kah拉撒路ê姊弟三人參加筵席。拉撒路tī筵席中間，馬大teh服侍耶穌，馬利亞就ánne the̍h出一斤極貴ê真哪噠phang油，倒tī耶穌ê頭殼頂，koh抹耶穌ê腳，順sòa用kakī ê頭毛去拭，厝內充滿phang氣。

Chit罐phang油等於當時工人一年ê薪水，換算成現代年薪約有40萬台幣。當今幾个chapo͘人看tī眼內，心內不爽，隨時講出來責備ê話：「馬利亞，妳án怎chiahni̍h浪費！Ná tio̍h ánne枉費chiahê phang油leh？」

耶穌chitê時chūn卻一人ge̍k眾人，大大oló馬利亞，祂講：「她tī我身chiūⁿ做ê是一件美事。Lín tiāⁿtiāⁿ有sànchhiah人kah lín做伙，只要lín願意，隨時lóng ē tàng向in行善，m̄koh lín卻無tiāⁿtiāⁿ有我。她已經盡她所ē tàng ê來做。她tāi先用phang油膏我ê身軀，是為tio̍h我ê安葬。我實在kā lín講，福音無論傳到世界ê啥物所在，lóng tio̍h傳講chitê chabó͘人所做ê來記念她。」

她聽bat祂ê話

Ta̍k个文字工作者lóng有kakī慣用ê寫作風格，馬可意愛用三明治法，koh稱做「簡化ê交叉式結構」（chiastic structure），是tiāⁿtiāⁿ見tio̍h ê以色列文學技巧。三明治to̍h是兩片sio̍kpháng夾肉片，sio̍kpháng是配角，肉片chiah是精華；sio̍kpháng反映出肉片ê好味，hō͘主體koh khah顯明。

馬可福音chit段經文，頭一片sio̍kpháng是14：1～2，祭司長kah經學教師beh thâi耶穌；第二片sio̍kpháng是10～11節，跟tòe耶穌三年ê門徒偤大beh出賣耶穌。Á 3～9節是肉片，伯大尼ê馬利亞知影耶穌teh beh死，kā phang油倒tī耶穌ê身chiūⁿ，為耶穌ê埋葬做事先準備。

Chapo͘人beh殺害耶穌、beh出賣耶穌，兩者反映出一个chabó͘人對耶穌ê好。當權ê宗教領袖beh殺害耶穌，新興ê宗教領袖—耶穌ê學生beh出賣祂，兩批應該siōng敬虔、siōng óa近上主ê chapo͘人，lóng被權勢、貪慾kā頭殼沖昏去，tī政治爭鬥拚手尾場teh沐沐泅，kah hitê單純ê chabó͘人對耶穌ê體貼形成強烈ê對比。她聽bat耶穌ê話，知影祂teh beh死，就ánne kā siōng珍貴ê phang油獻chiūⁿ，為祂ê埋葬預做準備。

做耶穌ê好學生

Tī本段chìn前，馬可已經有鋪排相關ê筋脈。馬可記述耶穌四pái明言kakī teh beh死來做好事先ê準備，koh再連結到phang油事件。Tùi事件ē tàng看出學生lóng無kā耶穌ê話聽落去，突顯in ê愚戇！

耶穌頭一pái提起kakī ē死（馬可福音8：27～34）

耶穌問學生：「人講我是啥人？」學生紛紛搶答「行洗禮約翰、以利亞」、先知內底ê一位」。

耶穌koh問：「Lín講我是啥人？」

班長彼得真súi氣講出正確ê答案：「祢to̍h是基督（希伯來文是彌賽亞）。」

耶穌就ánne開拆彌賽亞講：「人子一定tio̍h受真chē苦，被長老、祭司長kah經學家棄sak、殺害，三工後koh活。」

耶穌刷新彌賽亞ê畫面，kah傳統ê認知cheng差真大！傳說中ê彌賽亞是君王，beh推翻一切ê外來政權，hō͘以色列復國，甚至以色列ē péngpêng，成做萬國之國，統治全世界，彌賽亞chiah是萬王之王、萬主之主。彼得chiahê人tútú to̍h是因為ánne，願意棄sak一切來跟tòe耶穌。In ǹg望一人得道、雞犬chiūⁿ天，當耶穌坐起lì君王ê寶座，ná親像teh做總統，支持、跟tòe ê人thang做五院院長，享受高官厚祿。M̄ koh耶穌卻講彌賽亞一定tio̍h受苦，而且hôngthâi，若是ánne，講好ê富貴榮華leh？

彼得ê認知失調，忍bētiâu kā耶穌giú去一pêng，kā祂剔斥！Chia ê原文「ἐπιτιμάω」並m̄是「勸」，卻是「罵」。耶穌當眾責備（ἐπετίμησεν）tńg去，用ê是同一个希臘文，對彼得pháiⁿ聲嗽講：「撒旦，退去我後面！因為你m̄是思念上主ê tāichì，kantaⁿ思念人ê tāichì。」

耶穌koh一pái對學生說明：「若是有人願意跟tòe我，to̍h應當捨己，揹起伊ê十字架來跟tòe我。」學生ta̍k个lóng清楚啥物是十字架，he是siōng驚人、siōng殘忍ê死亡刑具！行刑前，犯人giâ十字架ê橫木遊街。到刑場，犯人雙腕、雙腳被釘tī柴頭頂，koh再kā十字架chhāi起來，chhutchāi伊慢慢á死去。「彌賽亞tio̍h死，阮mā tio̍h死？這是啥物道理？」學生完全bē清楚。

耶穌第二pái提起kakī ē死（馬可福音9：1～10）

耶穌chhōa彼得、雅各、約翰，偷偷á chiūⁿ去koân山，tī in面前變形像，衫褲發光，白siaksiak。忽然，以利亞kah摩西顯現，teh kah耶穌講話。Mā有聲音tùi雲彩裡傳出來，講：「這是我所疼ê kiáⁿ，lín tio̍h聽祂ê話。」

落山ê時，耶穌吩咐：「人子tùi死人中koh活chìn前，m̄ thang kā所看見ê kā人講。」耶穌koh一pái透露彌賽亞ē死，m̄ koh學生á是m̄ bat，彼此議論「tùi死人中koh活」究竟是啥物意思。

耶穌第三pái提起kakī ē死（馬可福音9：31～32）

耶穌經過加利利，教學生講：「人子teh beh被交tī人ê手裡，in beh殺害祂，死後三工，祂ē koh活。」

學生bē明白，koh m̄敢問老師，驚親像班長彼得ánne hông罵kah臭頭。

耶穌第四pái提起kakī ē死（馬可福音10：32～41節）

耶穌kah學生chiūⁿ耶路撒冷去。耶穌siōng尾koh叫十二个門徒過來，kā in講kakī teh beh遭遇ê tāichì：「咱chitmá來去耶路撒冷，人子ē被交hō͘祭司長kah經學家，in ē定祂ê罪，而且kā祂交hō͘外族人。In ē蹧躂祂，向祂phùi嘴瀾，鞭phah祂，殺害祂，三工以後，祂ē koh活。」Chit pái，耶穌kā彌賽亞án怎受苦、受辱、受死ê細節，交帶kah koh khah清楚。

學生頭殼teh想ê卻是老師得榮光ê時到，in to̍h ē tòe teh發達。雅各、約翰進前來對耶穌講：「Tī祢ê榮光裡，咱來一个坐tī祢ê正pêng，一个坐tī祢ê tòpêng。」實在悲哀，chit兩个學生ê彌賽亞考試無及格！

其他十个學生ê狀況koh án怎leh？In聽見了後，並無糾正：「彌賽亞ê榮光m̄是ánne lah，是十字架。Lín兩位án怎到chitmá iáu m̄ bat？」In顛倒來激心雅各、約翰ná ē sái先搶先贏，妄想行政院長kah立法院長ê職位！

十二門徒ê彌賽亞考試，lóng總死當à。M̄ koh，一个旁聽ê女學生，竟然通過彌賽亞考試！伯大尼ê馬利亞聽bat彌賽亞ē死，to̍h盡她所ē kā phang油事先倒tī耶穌ê身chiūⁿ。

咱tùi伯大尼ê馬利亞身chiūⁿ thang學tio̍h兩件tāichì。第一，tio̍h詳細注意聽耶穌ê話。第二，聽bat了後ài有積極ê行動。講tio̍h hit kóa chapo͘人是án怎聽bē tio̍h主ê聲音？祭司長、經學教師是已經有權勢者，無願意放落，耶穌ê門徒就ánne利慾薰心。領受福音使命ê基督徒，實在ài知影權力、金錢ê驚人，ē hō͘咱聽bē tio̍h耶穌ê話，á是聽tio̍h mā bē明白。

但願奔走天路ê你kah我，lóng ē tàng tùi chitê chabó͘人ê故事，學tio̍h án怎放落世俗ê纏累，來做耶穌ê好學生。